ଜଗତସିଂହପୁର: ଜିଲ୍ଲାର ବିରିଡି ବ୍ଲକ ଅନ୍ତର୍ଗତ ଶିବପୁର ଗ୍ରାମରେ ଗତ ସୋମବାର ଦିନ ହୋଇଥିବା ନାବାଳକ ଅପହରଣ ଘଟଣାର ପର୍ଦ୍ଦାଫାଶ କରିଛି ବିରିଡି ଥାନା ପୋଲିସ । ପୋଲିସ କହିବା ଅନୁଯାୟୀ ସେହି ଗ୍ରାମର ଜନୈକ ମହିଳା ଓ ତାଙ୍କ ପୁଅ ବାଉଁଶ ବୁଦାରୁ ବାଉଁଶ ହାଣୀ ବାହାର କରିବା ସମୟରେ ସେଠାରେ ଖେଳିବା ପାଇଁ ସେହି ନାବାଳକଟି ଚାଲି ଆସିଥିଲା । ହଠାତ ବାଉଁଶ ବାହାର କରିବା ସମୟରେ ଅସାବଧାନତା ବଶତଃ ନାବାଳକ ଛାତିରେ ମାଡ଼ ହୋଇଯାଇଥିଲା । ଫଳରେ ସେଠାରେ ନାବାଳକ ଜଣଙ୍କ ଅଚେତ ହୋଇ ପଡ଼ିଥିଲା।
ଏହାଦେଖି ବାଉଁଶ କାଢୁଥିବା ମହିଳା ଓ ତାଙ୍କ ପୁଅ ଚତୁରତାର ସହ ନାବାଳକକୁ ନେଇ ଏକ ଜଳାଶୟରେ ଫିଙ୍ଗି ଦେଇଥିଲେ । କାଳେ କିଏ ସନ୍ଦେହ କରିବ ଏହାକୁ ନେଇ ନାବାଳକର ପରିବାର ସହ ସେହି ମା’ ପୁଅ ପିଲାକୁ ଖୋଜିବାରେ ଅଭିନୟ କରିଥିଲେ ଓ ତଦନ୍ତକୁ ବାଟବଣା କରିବା ପାଇଁ ପିଲାଟି ଏକ ଫେରିବାଲା ସହ ଯାଇଥିବା ଅଭିଯୁକ୍ତ ମହିଳା ଜଣଙ୍କ ଦେଖିଛି ବୋଲି ପୋଲିସକୁ କହିଥିଲା ।
ଏହାକୁ ନେଇ ପୋଲିସର ସନ୍ଦେହ ହେବାରୁ ସମ୍ପୃକ୍ତ ମହିଳା ଓ ତାଙ୍କ ପୁଅଙ୍କୁ ପୋଲିସ ଡାକି ପଚରା ଉଚାର କରିବା ପରେ ସତ ପଦାକୁ ଆସିଛି । ଏହି ଘଟଣାରେ ଉଭୟ ମହିଳା ଓ ତାଙ୍କ ପୁଅକୁ ଆଜି (ଶନିବାର) ପୋଲିସ କୋର୍ଟ ଚାଲାଣ କରିଥିବା ସୂଚନା ମିଳିଛି।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
