ବୌଦ୍ଧ: ଜିଲ୍ଲାର ଏକମାତ୍ର ପୌରାଞ୍ଚଳରେ ସରିଲା ମତଦାନ ପ୍ରକ୍ରିୟା । ଶାନ୍ତି ଶୃଙ୍ଖଳାର ସହିତ ପୌରାଞ୍ଚଳର ସମୁଦାୟ 17 ଗୋଟି ଓ୍ବାର୍ଡରେ ମତଦାନ ସମାପ୍ତ ହୋଇଛି । ଜିଲ୍ଲାର ଏକମାତ୍ର ପୌରାଞ୍ଚଳ ବୌଦ୍ଧଗଡ ଏନଏସିରେ ଆଜି ସକାଳ 8 ଟା ରୁ ସଂଧ୍ୟା 5 ଟା ପର୍ଯ୍ୟନ୍ତ ମତଦାନ ଅନୁଷ୍ଠିତ ହୋଇଥିଲା । ତେବେ ଗୋଟିଏ ମାତ୍ର ବୁଥ ଖଲିଆବଗିଚା ବିଦ୍ୟାଳୟରେ ଥିବା 15 ନଂ ଓ୍ବାର୍ଡରେ ବିଳମ୍ବିତ ସମୟ ପର୍ଯ୍ୟନ୍ତ ମତଦାନ ଚାଲୁ ରହିଥିଲା ।
ତେବେ ମତଦାନ ସମ୍ପୂର୍ଣ୍ଣ ଶାନ୍ତି ଶୃଙ୍ଖଳାର ସହିତ ସମାପନ ହୋଇଥିଲା । କେବଳ ବୁଟୁପାଲି ଓ ରାଜନପାଲି ବୁଥରେ କିଛିଟା ଉତ୍ତେଜନା ପ୍ରକାଶ ପାଇଥିବା ବେଳେ ମୋଟାମୋଟି ଅବାଧରେ ନିର୍ବାଚନ ଅନୁଷ୍ଠିତ ହୋଇଥିଲା । ନୂତନ ଯୁବ ଭୋଟର ମାନେ ମତଦାନ କୁନେଇ ବେଶ ଉତ୍ସାହିତ ଥିବା ବେଳେ ବୌଦ୍ଧ ଏନଏସି ପ୍ରତିଷ୍ଠା ଦିନଠାରୁ ମତଦାନ କରି ଆସୁଥିବା ବୟୋଜ୍ୟେଷ୍ଠ ସ୍ବାଧୀନତା ସଂଗ୍ରାମୀ ନିଜ ସ୍ମୃତିକୁ ବର୍ଣ୍ଣନା କରିଥିଲେ ।
ସେପଟେ ଜିଲ୍ଲାର ଏକମାତ୍ର ପୌରାଞ୍ଚଳରେ ମତଦାନର ହାର ଶତକଡା 74.87 ପ୍ରତିଶତ ହୋଇଛି । ତେବେ ଭୋଟ ଗଣନା ପାଇଁ ଆଉ ଗୋଟିଏ ଦିନ ବାକି ଥିବାରୁ ଇଭିଏମ ମେସିନ ଗୁଡିକୁ ପଞ୍ଚାୟତ ମହାବିଦ୍ୟାଳୟରେ କଡା ସୁରକ୍ଷା ବଳୟ ମଧ୍ୟରେ ରଖାଯାଇଛି ।
ବୌଦ୍ଧ ଜିଲ୍ଲା ପ୍ରଶାସନ, ପୌର ପ୍ରଶାସନ ଓ ପୋଲିସ ପ୍ରଶାସନ ପକ୍ଷରୁ ଶାନ୍ତି ଶୃଙ୍ଖଳାର ସହିତ ନିର୍ବାଚନ କୁ ପରିଚାଳନା କରାଯାଇ ଥିବା ବେଳେ ସାଧାରଣ ଭୋଟର ମାନେ ମଧ୍ୟ ଆନନ୍ଦ ଉଲ୍ଲାସର ସହିତ ମତଦାନ କରିଥିଲେ ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
