ଅକଲାଣ୍ଡ(ନ୍ୟୁଜିଲାଣ୍ଡ): ମହିଳା ବିଶ୍ବକପ ମ୍ୟାଚରେ ଆଜି ଭାରତ ଓ ଅଷ୍ଟ୍ରେଲିଆ ମଧ୍ୟରେ ଲଢେଇ ଆରମ୍ଭ ହୋଇଯାଇଛି । ସକାଳ ସମୟରେ ଖେଳ ଆରମ୍ଭ ହୋଇଥିବା ବେଳେ ଟସ ଜିତି ବୋଲିଂ ନିଷ୍ପତ୍ତି ନେଇଥିଲା କଙ୍ଗାରୁ ଟିମ୍ । ତେବେ ୫୦ ଓଭର ଶେଷ ସୁଦ୍ଧା ଭାରତ ୭ ଓ୍ବିକେଟ ହରାଇ ୨୭୭ ରନ ସଂଗ୍ରହ କରିଛି । ଫଳରେ ବିପକ୍ଷ ଦଳକୁ ବିଜୟୀ ହେବା ପାଇଁ ୨୭୮ ରନର ଟାର୍ଗେଟ ଦେଇଛି ଭାରତୀୟ ମହିଳା ଦଳ ।
ଦଳ ପକ୍ଷରୁ ଅଧିନାୟକ ମିତାଲି ରାଜ ୯୬ଟି ବଲରେ ୬୮ ରନ କରି ଅର୍ଦ୍ଧଶତକ ହାସଲ କରିଥିବା ବେଳେ ହରମନପ୍ରିତ କୌର ୫୭ ଓ ପୂଜା ବସ୍ତ୍ରକର ୩୪ ରନ କରି ପାଭିଲିୟନକୁ ଫେରିଥିଲେ । ଏହି ମ୍ୟାଚ ଖେଳିବା ପରେ ଭେଟେରାନ ଭାରତୀୟ ଦ୍ରୁତ ବୋଲର ଝୁଲଣ ଗୋସ୍ବାମୀଙ୍କ ୨୦୦ତମ ଦିନିକିଆ ମ୍ୟାଚ୍ ପୂରଣ ହୋଇଛି ।
ତେବେ ଆଜିର ମ୍ୟାଚରେ ବିଜୟୀ ହେବା ଭାରତ ପାଇଁ ଗୁରୁତ୍ବପୂର୍ଣ୍ଣ ରହିଛି । ଆଜିର ମ୍ୟାଚରେ ଦଳ ବିଜୟୀ ହେଲେ ଶୀର୍ଷ ୪ଟି ସ୍ଥାନ ମଧ୍ୟରେ ରହି ସେମିଫାଇନାଲ ଟିକେଟ ହାତେଇବାକୁ ଲକ୍ଷ୍ୟ ପୂରଣ ହେବ । ପୂର୍ବରୁ ୪ଟି ମ୍ୟାଚ ଖେଳି ୨ଟିରେ ବିଜୟୀ ହୋଇଥିବା ବେଳେ ୨ଟିରେ ପରାଜିତ ହୋଇଥିଲା ଭାରତ । ଅକଲାଣ୍ଡର ଇଡେନ ପାର୍କରେ ଖେଳା ଯାଉଛି ଏହି ମ୍ୟାଚ ।
