ହାଇଦ୍ରାବାଦ: ଚଳିତ ICC ମହିଳା କ୍ରିକେଟ ବିଶ୍ବକପ ୨୦୨୨ରେ ଆଜି(ମାର୍ଚ୍ଚ ୨୨)ରେ ଦୁଇଟି ମୁକାବିଲା ଅଷ୍ଟ୍ରେଲିଆ-ଦକ୍ଷିଣ ଆଫ୍ରିକା ଓ ଭାରତ-ବାଂଲାଦେଶ ମଧ୍ୟରେ ଖେଳାଯାଇଥିଲା । ଏଥିରେ ଅଷ୍ଟ୍ରେଲିଆ ଓ ଭାରତ ସହଜ ବିଜୟ ହାସଲ କରିଛନ୍ତି । ଏହି ଫଳାଫଳ ପରେ ମହିଳା ବିଶ୍ବକପର ପଏଣ୍ଟ ଟେବୁଲରେ ପରିବର୍ତ୍ତନ ଦେଖିବାକୁ ମିଳିଛି ।
ଅଷ୍ଟ୍ରେଲିଆ ପୂର୍ବପରି ନମ୍ବର ୧ ସ୍ଥାନରେ ରହିଛି ଓ ସେମିଫାଇନାଲରେ ସ୍ଥାନ ପକ୍କା କରିସାରିଛି । ଅନ୍ୟପଟେ ଭାରତ ବିଜୟ ପରେ ଗୋଟିଏ ସ୍ଥାନ ଉପରକୁ ଉଠି ତୃତୀୟ ସ୍ଥାନରେ ପହଞ୍ଚିଯାଇଛି । ଏବେ ମିତାଲି ରାଜଙ୍କ ନେତୃତ୍ବାଧୀନ ଟିମ ଇଣ୍ଡିଆ ପାଇଁ ସେମିଫାଇନାଲ ରାସ୍ତା ସହଜ ହୋଇଛି । ମାତ୍ର ଏବେ ବି ଭାରତ ସମେତ ସେମିଫାଇନାଲ ଦୌଡରେ ୱେଷ୍ଟଇଣ୍ଡିଜ, ଇଂଲଣ୍ଡ ଓ ଦକ୍ଷିଣ ଆଫ୍ରିକା ରହିଛନ୍ତି ।
| ସ୍ଥାନ | ଟିମ | ମ୍ୟାଚ୍ | ବିଜୟ | ପରାଜୟ | କିଛି ପରିଣାମ ନାହିଁ | ପଏଣ୍ଟ | ନେଟ୍ ରନ୍ ରେଟ୍ |
| ୧ | ଅଷ୍ଟ୍ରେଲିଆ | ୬ | ୬ | ୦ | ୦ | ୧୨ | ୧.୨୮୭ |
| ୨ | ଦକ୍ଷିଣ ଆଫ୍ରିକା | ୫ | ୪ | ୧ | ୦ | ୮ | ୦.୦୯୨ |
| ୩ | ଭାରତ | ୬ | ୩ | ୩ | ୦ | ୬ | ୦.୭୬୮ |
| ୪ | ୱେଷ୍ଟଇଣ୍ଡିଜ | ୬ | ୩ | ୩ | ୦ | ୬ | -୦.୮୮୫ |
| ୫ | ଇଂଲଣ୍ଡ | ୫ | ୨ | ୩ | ୦ | ୪ | ୦.୩୨୭ |
| ୬ | ନ୍ୟୁଜିଲାଣ୍ଡ | ୬ | ୧ | ୪ | ୦ | ୪ | -୦.୨୨୯ |
| ୭ | ବାଂଲାଦେଶ | ୫ | ୧ | ୪ | ୦ | ୨ | -୦.୭୫୪ |
| ୮ | ପାକିସ୍ତାନ | ୫ | ୧ | ୪ | ୦ | ୨ | -୦.୮୭୮ |
ଭାରତୀୟ ଟିମ ଏଯାବତ ୬ଟି ମ୍ୟାଚ୍ ଖେଳି ୩ଟି ବିଜୟ ସହିତ ୬ ପଏଣ୍ଟ ହାସଲ କରିଛି । ପଏଣ୍ଟ ତାଲିକାରେ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ପରେ ତୃତୀୟ ସ୍ଥାନରେ ରହିଛି ଭାରତ । ଟିମର ନେଟ ରନରେଟ୍ରେ ମଧ୍ୟ ସୁଧାର ଆସିଛି । ନେଟ୍ ରନ ରେଟ୍ +୦.୭୬୮ ହୋଇଛି, ଯାହାକି ଅଷ୍ଟ୍ରେଲିଆ ପରେ ଦ୍ବିତୀୟ ସର୍ବାଧିକ । ଭାରତ ନିଜର ଶେଷ ଲିଗ୍ ମ୍ୟାଚ୍ ୨୭ ମାର୍ଚ୍ଚରେ ଦକ୍ଷିଣ ଆଫ୍ରିକା ବିପକ୍ଷରେ ଖେଳିବ । ଏହି ମ୍ୟାଚ୍ରୁ ସେମିଫାଇନାଲରେ ଖେଳିବାକୁ ଯାଉଥିବା ତୃତୀୟ ଓ ଚତୁର୍ଥ ଟିମ କିଏ ହେବ ସ୍ପଷ୍ଟ ହୋଇଯିବ ।
ଦକ୍ଷିଣ ଆଫ୍ରିକାର ମାର୍ଚ୍ଚ ୨୪ରେ ଭାରତ ପୂର୍ବରୁ ୱେଷ୍ଟଇଣ୍ଡିଜ ବିପକ୍ଷରେ ଖେଳିବ । ଏପରି ସ୍ଥିତିରେ ଦକ୍ଷିଣ ଆଫ୍ରିକା ଯଦି ବିଜୟୀ ହୁଏ, ତେବେ ଭାରତର ସେମିଫାଇନାଲ ଖେଳିବା ପ୍ରାୟତଃ ପକ୍କା ହୋଇଯିବ । ୱେଷ୍ଟଇଣ୍ଡିଜ ଟିମ ୬ଟି ମ୍ୟାଚ୍ରୁ ୩ଟି ବିଜୟ ସହ ଚତୁର୍ଥ ସ୍ଥାନରେ ରହିଛି । ମାତ୍ର ଇଣ୍ଡିଜ ଟିମର ନେଟ୍ ରନ୍ ରେଟ୍ ମାଇନସ ରହିଛି । ଇଂଲଣ୍ଡ ଟିମ ମଧ୍ୟ ଶେଷ ୪ଟିମ ମଧ୍ୟରେ ରହିବାର ଦାବିଦାର ରହିଛି । ଇଂଲଣ୍ଡର ଏବେ ଦୁଇଟି ମ୍ୟାଚ୍ ବାକି ରହିଛି । ଏଯାବତ ଖେଳିଥିବା ୫ଟି ମ୍ୟାଚ୍ରୁ ଦୁଇଟି ବିଜୟ ସହ ପଏଣ୍ଟ ଟେବୁଲର ପଞ୍ଚମ ସ୍ଥାନରେ ରହିଛି ଗତ ଥରର ଚାମ୍ପିୟନ ଇଂଲଣ୍ଡ । ଏପରି ସ୍ଥିତିରେ ଶେଷ ଦୁଇଟି ମ୍ୟାଚ୍ ଜିତି ସେମି ଟିକେଟ ହାସଲ କରିବାର ସମ୍ଭାବନା ରହିଛି ।
ବାଂଲାଦେଶ-ପାକିସ୍ତାନ ଟୁର୍ଣ୍ଣାମେଣ୍ଟରୁ ବାଦ୍:
ବାଂଲାଦେଶର ଏହା ୫ଟି ମ୍ୟାଚ୍ରୁ ଚତୁର୍ଥ ପରାଜୟ, ଫଳରେ ସେମିଫାଇନାଲ ଦୌଡରୁ ବାଦ୍ ପଡିଛି ଟିମ । ଖେଳିଥିବା ୫ଟି ମ୍ୟାଚ୍ରୁ ଗୋଟିଏ ବିଜୟରୁ ୨ ପଏଣ୍ଟ ହାସଲ କରି ପଏଣ୍ଟ ଟେବୁଲର ସପ୍ତମ ସ୍ଥାନରେ ରହିଛି ବାଂଲାଦେଶ । ପାକିସ୍ତାନ ଟିମ ମଧ୍ୟ ପଏଣ୍ଟ ଟେବୁଲର ଶେଷରେ ରହି ସେମିଫାଇନାଲ ଦୌଡରୁ ବାଦ୍ ପଡିସାରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
