ହାଇଦ୍ରାବାଦ: ମେଘନା ଗୁଲଜାରଙ୍କ ଦ୍ୱାରା ନିର୍ଦ୍ଦେଶିତ ବହୁ ପ୍ରତିକ୍ଷୀତ ଫିଲ୍ମ ସାମ ବାହାଦୂରର ଡିସେମ୍ବର ୧ରେ ରିଲିଜ ହେବ । ଏହି ଫିଲ୍ମରେ ବଲିଉଡ୍ ଅଭିନେତା ବିକି କୌଶଲ, ଅଭିନେତ୍ରୀ ସାନ୍ୟା ମଲହୋତ୍ରା, ଫାତିମା ସାନା ସେକ୍ ପ୍ରମୁଖ ନଜର ଆସିବେ । ତେବେ ଆଜି ଫିଲ୍ମର ଟ୍ରେଲର ରିଲିଜ ହେବାକୁ ଯାଉଛି । ଦିଲ୍ଲୀରେ ଟ୍ରେଲର ଲଞ୍ଚ୍ ଇଭେଣ୍ଟ ଆୟୋଜିତ ହେବାକୁ ଥିବା ବେଳେ ଏଥିରେ ସାମିଲ ହେବାକୁ ରାଜଧାନୀ ଦିଲ୍ଲୀ ଅଭିମୁଖେ ବାହାରିଛନ୍ତି ବିକି କୌଶଲ, ମେଘନା ଗୁଲଜାର ଏବଂ ସାନ୍ୟା ମଲହୋତ୍ରା । ସୋସିଆଲ ମିଡିଆରେ ପୋଷ୍ଟ ସେୟାର କରି ଅଭିନେତା ଏବଂ ଅଭିନେତ୍ରୀ ଏହି ସୂଚନା ଦେଇଛନ୍ତି ।
ରିପୋର୍ଟ ଅନୁସାରେ, ନୂଆଦିଲ୍ଲୀର ମାନିତଶାହ ସେଣ୍ଟରରେ ସାମ ବାହାଦୂର ଫିଲ୍ମର ଟ୍ରେଲର ଲଞ୍ଚ ଇଭେଣ୍ଟ ଅନୁଷ୍ଠିତ ହେବ । ଏହି ଗ୍ରାଣ୍ଡ୍ ଲଞ୍ଚ୍ ପାଇଁ ଫିଲ୍ମର ନିର୍ଦ୍ଦେଶକ ମେଘନା ଏବଂ ଷ୍ଟାର୍ କାଷ୍ଟ ବିକି ଏବଂ ସାନ୍ୟା ଦିଲ୍ଲୀରେ ପହଞ୍ଚିଛନ୍ତି । ବିକି କୌଶଲ ନିଜ ଇନଷ୍ଟାଗ୍ରାମ ଷ୍ଟୋରୀରେ ଏକ ପୋଷ୍ଟ ସେୟାର କରି ସୂଚନା ଦେଇଛନ୍ତି । ସେୟାର ହୋଇଥିବା ଏହି ଫଟୋରେ ବିକିଙ୍କ ସହ ମେଘନାଙ୍କୁ ଦେଖିବାକୁ ମିଳିଛି । ଏହାକୁ ସେୟାର କରି ବିକି ଲେଖିଛନ୍ତି, 'ସାମ ବାହାଦୂର ଟ୍ରେଲର ଲଞ୍ଚ୍ ଡେ ପାଇଁ ଦିଲ୍ଲୀ ପହଞ୍ଚିଛୁ, ଖୁବଶୀଘ୍ର ଦେଖାହେବା ।'
ସେହିପରି ସାନ୍ୟା ମଲହୋତ୍ରା ନିଜ ଇନଷ୍ଟାଗ୍ରାମ ଷ୍ଟୋରୀରେ ଏକ ପୋଷ୍ଟ ସେୟାର କରିଛନ୍ତି । ସେ ଲେଖିଛନ୍ତି, 'ଦିଲ୍ଲୀ ଆସିଗଲା । ଗୁଗୁଲ ମ୍ୟାପ୍ ଉପରେ ଅନ୍ଧବିଶ୍ବାସ କରି ଦିଲ୍ଲୀରେ ପହଞ୍ଚି ସାରିଛି । ସାମ ବାହାଦୂର ଟ୍ରେଲର ଲଞ୍ଚ ଡେ ।' ସୂଚନା ଥାଉ କି, ବିକି କୌଶଲ ଗତକାଲି (ଅକ୍ଟୋବର ୬) ସାମ ବାହାଦୂରର ଏକ ନୂଆ ପୋଷ୍ଟର ରିଲିଜ କରି ଟ୍ରେଲର ରିଲିଜ ନେଇ ସୂଚନା ଦେଇଥିଲେ ।
ଏହା ମଧ୍ୟ ପଢନ୍ତୁ: କ୍ୟାଟ୍ରିନା କୈଫଙ୍କ ସହ ସମ୍ପର୍କକୁ ନେଇ ବିକିଙ୍କ ଖୁଲାସା, ଏମିତି କ୍ୟାଟ୍ରିନାଙ୍କ ପ୍ରେମରେ ପଡିଥିଲେ
'ସାମ ବାହାଦୂର'ର କାହାଣୀ ବିଷୟରେ କହିବାକୁ ଗଲେ, ଭାରତର ପ୍ରଥମ ଫିଲ୍ଡ ମାର୍ଶଲ ତଥା ସୈନ୍ୟ ପରାକ୍ରମୀ ସାମ୍ ମାନିକଶାହଙ୍କ ଜୀବନ ଉପରେ ଆଧାରିତ । ଏହି ଚଳଚ୍ଚିତ୍ରରେ ବିକି ସାମ ମାନିକଶାହଙ୍କ ଭୂମିକାରେ ଅଭିନୟ କରିଥିବାବେଳେ ଫାତିମା ସାନା ଶେଖଙ୍କୁ ଇନ୍ଦିରା ଗାନ୍ଧୀ ଏବଂ ସାନ୍ୟା ମାଲହୋତ୍ରାଙ୍କୁ ସାମ ମାନିକଶାହଙ୍କ ପତ୍ନୀ ସିଲୁଙ୍କ ଭୂମିକାରେ ଦେଖିବାକୁ ମିଳିବ । ମେଘନା ଗୁଲଜାରଙ୍କ ଦ୍ୱାରା ନିର୍ଦ୍ଦେଶିତ ଏବଂ ରୋନି ସ୍କ୍ରୁ'ଭାଲାଙ୍କ ଦ୍ୱାରା ନିର୍ମିତ ଏହି ଚଳଚ୍ଚିତ୍ରଟି ଡିସେମ୍ବର ୧ରେ ପ୍ରେକ୍ଷାଳୟରେ ମୁକ୍ତିଲାଭ କରିବ । ଯାହା ରଣବୀର କପୁରଙ୍କ ଆନିମଲ ସହ କଡ଼ା ଟକ୍କର ଦେବ । କାରଣ ଡିସେମ୍ବର ୧ରେ ଆନିମଲ ମଧ୍ୟ ରିଲିଜ ହେବ ।
