ବ୍ରହ୍ମପୁର: ଭୋକ ପାଇଁ ନିଷ୍ଠୁର ହେଲା ସାପ । ବ୍ରହ୍ମପୁର ସହରରେ ଏକ ଛଅ ଫୁଟର ନାଗ ସାପ ନିଜର ଭୋକ ମେଣ୍ଟାଇବା ପାଇଁ ଅନ୍ୟ ଏକ ତିନି ଫୁଟର ନାଗ ସାପକୁ ଗିଳି ଦେଇଥିବା ବେଳେ ନାଗର ପେଟରୁ ନାଗ ଉଦ୍ଧାର କରି କରିଛନ୍ତି ସର୍ପ ଉଦ୍ଧାରକାରୀ ଜଣେ ସଦସ୍ୟ ।
ସାଧାରଣତଃ ସାପ ବେଙ୍ଗ କିମ୍ୱା ମୂଷାକୁ ଖାଇଥାଏ । ହେଲେ ରେଶମ ସହରରେ ଏକ ଛଅ ଫୁଟର ନାଗ ସାପ ପେଟରୁ ଅନ୍ୟ ଏକ ତିନି ଫୁଟର ନାଗ ସାପକୁ ବାହାର କରିବା ଘଟଣା ପ୍ରଥମ ବୋଲି କହିଛନ୍ତି ଉଦ୍ଧାରକାରୀ ତାରା ପ୍ରସାଦ ଦାଶ ।
ବ୍ରହ୍ମପୁର ଏମକେସିଜି ମେଡିକାଲ ପରିସରରେ ଥିବା ଜନସ୍ୱାସ୍ଥ୍ୟ ବିଭାଗର ଏକ ଷ୍ଟୋର ରୁମ ପରିସରରେ ଗୋଟିଏ ନାଗ ସାପ ରହିଥିବା ଖବର ପାଇ ସର୍ପ ଉଦ୍ଧାରକାରୀ ସଦସ୍ୟ ତାରା ପ୍ରସାଦ ଦାଶ ପହଞ୍ଚିଥିଲେ । ଗୁରବାର ରାତିରେ କିଛି କର୍ମଚାରୀ ଏହି ସାପଟିକୁ ଦେଖିଥିବା ବେଳେ ଆଜି ସକାଳେ ପୁଣି ସେହି ସାପଟି ରହିଥିବାର ଦେଖି ଆଶ୍ଚର୍ଯ୍ୟ ହୋଇଯାଇଥିଲେ ।
ଖବର ପାଇବା ପରେ ଉଦ୍ଧାରକାରୀ ସଦସ୍ୟ ତାରା ପ୍ରସାଦ ସାପଟିକୁ ଉଦ୍ଧାର କରିବା ସମୟରେ ସେ କିଛି ଖାଇଦେଇଥିବା ଦେଖି ତାକୁ କିଛି ସମୟ ହାତରେ ଧରି ରଖିବା ପରେ ସାପଟି ପେଟ ମଧ୍ୟରୁ ପ୍ରାୟ ତିନି ଫୁଟର ଅନ୍ୟ ଏକ ନାଗ ସାପକୁ ଧିରେ ଧିରେ ପାଟିରୁ ବାହାର କରିଥିଲା । ଉଦ୍ଧାର କରାଯାଇଥିବା ନାଗ ସାପଟିକୁ ବନ ବିଭାଗର ପରାମର୍ଶ କ୍ରମେ ମହୁରୀ କାଳୁଆ ଜଙ୍ଗଲରେ ଛଡାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
