ହାଇଦ୍ରାବାଦ: ବହୁଚର୍ଚ୍ଚିତ ଦିଲ୍ଲୀ ଅବକାରୀ ପଲିସି ଘୋଟାଲା ମାମଲାରେ ପ୍ରାୟ ବର୍ଷେ ହେବ କେନ୍ଦ୍ରୀୟ ତଦନ୍ତକାରୀ ସଂସ୍ଥା ସ୍କାନରରେ ଥିବା ତେଲେଙ୍ଗାନା ମୁଖ୍ୟମନ୍ତ୍ରୀ କେ.ସି.ଆରଙ୍କ ଝିଅ ତଥା ରାଜ୍ୟ ବିଧାନ ପରିଷଦ ସଦସ୍ୟା କେ. କବିତାଙ୍କୁ ପୁଣି ନୋଟିସ ଜାରି କରିଛି ଇଡି । ହେଲେ ଏହାକୁ ବିଜେପି ସରକାରର ଉଦ୍ଦେଶ୍ୟମୂଳକ କାର୍ଯ୍ୟାନୁଷ୍ଠାନ ଦର୍ଶାଇ ମୋଦି ନୋଟିସ ପାଇଲି ବୋଲି କବିତା କହିଛନ୍ତି ।
କବିତା କହିଛନ୍ତି, ଏହି ନୋଟିସ ସେମାନଙ୍କ ଦଳର ସଫଳତାର ଏକ ଅଂଶ । ତେଣୁ ଏଥିପ୍ରତି ଅଧିକ ଧ୍ୟାନ ଦେବାର ଆବଶ୍ୟକତା ନାହିଁ । ସେ ମଧ୍ୟ ସ୍ପଷ୍ଟ କରିଛନ୍ତି ଯେ ତାଙ୍କୁ ମିଳିଥିବା ନୋଟିସ ଦଳ (ବିଆରଏସ) ଲିଗାଲ ଟିମକୁ ପଠାଯାଇଛି । ଏ ସମ୍ପର୍କରେ ଆଇନଗତ ତର୍ଜମା ଜାରି ରହିଛି । ଲିଗାଲ ସେଲର ପରାମର୍ଶ ଅନୁଯାୟୀ ସେ ପରବର୍ତ୍ତୀ କାର୍ଯ୍ୟପନ୍ଥା ଗ୍ରହଣ କରିବେ ।
ଆହୁରି ମଧ୍ୟ କବିତା କହିଛନ୍ତି,‘‘ଏହି ମାମଲାରେ ଗତ ଏକ ବର୍ଷ ଧରି ଇଡିର ତଦନ୍ତ ଚାଲିଛି । ଏବେ ନିର୍ବାଚନ ଆସିଛି । ତେଣୁ ସେମାନେ ପୁଣି ଏକ ନୂଆ ଏପିସୋଡ୍ ଆରମ୍ଭ କରିଛନ୍ତି । ତେଣୁ ଏହା ସେମାନଙ୍କ (ବିଜେପି)ର ଏକ ରାଜନୈତିକ ସଫଳତା । ଏହାକୁ ଆମେ ଗମ୍ଭୀରତାର ସହ ବିଚାର କରୁନାହୁଁ । ଏପରି ପ୍ରକ୍ରିୟା କେତେଦିନ ଚାଲିବ ତାହା ମଧ୍ୟ ମୁଁ ଜାଣେ ନାହିଁ । ମୁଁ ଏହି ରାଜନୈତିକ ଉଦ୍ଦେଶ୍ୟମୂଳକ କାର୍ଯ୍ୟାନୁଷ୍ଠାନରେ ଭୟଭୀତ ମଧ୍ୟ ନୁହେ । କେବଳ ଆଇନଗତ ପରାମର୍ଶ ଅନୁସାରେ ଏହାକୁ ସାମ୍ନା କରିବା ଜାରି ରଖିବି ।"
ଏଠାରେ ଉଲ୍ଲେଖଯୋଗ୍ୟ, ଦିଲ୍ଲୀରେ ନୂଆ ଅବକାରୀ ନୀତି ଲାଗୁ ସମୟରେ ଆପ୍ ସରକାର କୋଟିକୋଟି ଟଙ୍କା ଦୁର୍ନୀତି କରିଥିବା ପ୍ରଥମେ ଦିଲ୍ଲୀ ଉପରାଜ୍ୟପାଳ ଭି.କେ ସକ୍ସେନା ଅଭିଯୋଗ ଆଣିଥିଲେ । ସେ ଏହି ମାମଲାର ସିବିଆଇ ତଦନ୍ତ ପାଇଁ ଆବେଦନ କରିଥିଲେ । ଏହାପରେ ଏହି ଅନିୟମିତତା ମାମଲାରେ ଦିଲ୍ଲୀ ଉପମୁଖ୍ୟମନ୍ତ୍ରୀ ସିସୋଦିଆଙ୍କ ସମେତ ଦିଲ୍ଲୀ ଓ ହାଇଦ୍ରାବାଦ ଭିତ୍ତିକ ଅନେକ ବଡ଼ବଡ଼ ମଦ ବ୍ୟବସାୟୀଙ୍କ ନାଁ ଉଠିଥିଲା । ଗତ କିଛି ମାସ ତଳେ ସିସୋଦିଆଙ୍କୁ CBI ଗିରଫ କରିଛି । ସେ ଏବେ ବିଚାର ବିଭାଗୀୟ ହାଜତରେ ଅଛନ୍ତି । ଅନ୍ୟ ଅଭିଯୁକ୍ତଙ୍କୁ ମଧ୍ୟ କେନ୍ଦ୍ରୀୟ ସଂସ୍ଥା ସମୟ ସମୟରେ ନୋଟିସ ଜାରି କରି ଜେରା କରୁଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
