ଭୁବନେଶ୍ବର: ସୋସିଆଲ ମିଡିଆରେ ଜୀବନ୍ତ ସାପର ଭିଡିଓ ପୋଷ୍ଟ କରି ଜଣେ ବ୍ୟକ୍ତି ଗିରଫ । ଭଦ୍ରକର ସାପ ଧରାଳି ମିର୍ଜା ଏମଡି ଆରିଫକୁ ଗିରଫ କରିଛନ୍ତି ବନ ଅଧିକାରୀ । ଏକାଧିକ ଭାବରେ ବିଭିନ୍ନ ପ୍ରଜାତିର ସାପମାନଙ୍କୁ ନେଇ ଭିଡିଓ କରି ସୋସିଆଲ ମିଡିଆରେ ପୋଷ୍ଟ କରିଆସୁଥିଲେ ଏହି ବ୍ୟକ୍ତି । ବେଆଇନ ଭାବରେ ଜୀବନ୍ତ ସାପଙ୍କୁ ଧରିବା ସହ ଦୁଇଟି ମୋନୋକଲେଡ୍ କୋବ୍ରାଙ୍କୁ ଧରିବା ସମୟର ଦୃଶ୍ୟକୁ ଉତ୍ତୋଳନ କରି ସୋସିଆଲ ମିଡିଆରେ ପୋଷ୍ଟ କରିଥିଲେ ।
ତେବେ କିଛି ଦିନ ପୂର୍ବରୁ ପିସିସିଏଫଙ୍କ ପକ୍ଷରୁ ବନ୍ୟଜନ୍ତୁଙ୍କ ସହ ଫଟୋ ଉଠାଇ ସୋସିଆଲ ମିଡ଼ିଆରେ ପୋଷ୍ଟ କଲେ କାର୍ଯ୍ୟନୁଷ୍ଠାନ ଗ୍ରହଣ କରାଯିବା ନେଇ ସତର୍କ କରାଯାଇଥିଲା । ଏହା ପରେ ମଧ୍ୟ ବେଆଇନ ଭାବରେ ଜୀବନ୍ତ ସାପ ଭିଡ଼ିଓ ପୋଷ୍ଟ କରିବା ଅଭିଯୋଗରେ ଭଦ୍ରକର ମିର୍ଜା ଏମଡି ଆରିଫଙ୍କୁ ଗିରଫ କରିଛି ଭଦ୍ରକ ଫରେଷ୍ଟ ରେଞ୍ଜର । ସେ ଏକା ୧୦୦ କୋବ୍ରା ସାପକୁ ଉଦ୍ଧାର କରିବା ସହ ଅନ୍ୟାନ୍ୟ ପ୍ରଜାତିର ସାପକୁ ମଧ୍ୟ ଉଦ୍ଧାର କରିବା ସମୟର ଭିଡିଓ ସୋସିଆଲ ମିଡିଆରେ ପୋଷ୍ଟ କରିଥିଲେ । ଏହାସହ ସାପମାନଙ୍କୁ ଖେଳାଉଥିବାର ଦୃଶ୍ୟ ସୋସିଆଲ ମିଡିଆରେ ପୋଷ୍ଟ କରିଥିଲେ । ଯାହା ସମ୍ପୂର୍ଣ୍ଣ ଭାବରେ ବେଆଇନ ।
ତେବେ ସାପମାନଙ୍କ ଉଦ୍ଧାର ସମୟର ଦୃଶ୍ୟ ସୋସିଆଲ ମିଡିଆରେ ପୋଷ୍ଟ କରି ତାଙ୍କର ଫେସବୁକରେ ଯଥାକ୍ରମେ ୨. ୮୨ ମିଲିୟନ୍ ଏବଂ ୧୪୪ ହଜାର ଫଲୋଅର୍ସ ରହିଛନ୍ତି । କେବଳ ଏହା ଗୋଟିଏ ନୁହେଁ ବିଭିନ୍ନ ସୋସିଆଲ ମିଡ଼ିଆ ପ୍ଲାଟଫର୍ମରେ ଏକାଧିକ ଭାବରେ ଆକାଉଣ୍ଟ ରହିଛି । ଏହି ଆକାଉଣ୍ଟ ଗୁଡିକକୁ ସ୍ଥଗିତ ବା ବାତିଲ କରିବାକୁ ପିସିସିଏଫଙ୍କ ପକ୍ଷରୁ ସୋସିଆଲ ମିଡ଼ିଆ ପ୍ଲାଟଫର୍ମକୁ ଅନୁରୋଧ କରାଯାଇଛି ।
ସେପଟେ ମିର୍ଜା ଏମଡି ଆରିଫ ତାଙ୍କର ୟୁଟ୍ୟୁବ ନାଁ "ଭଦ୍ରକ ନାଗଲୋକ" ରଖିଥିବା ବେଳେ ଏହି ଆକାଉଣ୍ଟ ୨୦୨୦ ମସିହାରେ ଆରମ୍ଭ କରିଥିଲେ । ମିର୍ଜା ଏମଡି ଆରିଫ ଜଣେ ତାଲିମପ୍ରାପ୍ତ ସାପ ଉଦ୍ଧାରକାରୀ । ବିଭିନ୍ନ ବନ୍ୟାପ୍ରାଣୀ ଏବଂ ଜଣେ ପଶୁପ୍ରେମୀ ମଧ୍ୟ । ତାଙ୍କର ଏକ ସମୟରେ ୧୦୦ରୁ ଅଧିକ କୋବ୍ରା ସାପ ଉଦ୍ଧାର କରିବାର ରେକର୍ଡ ରହିଛି । ସେ ବନ୍ୟଜନ୍ତୁ ସୁରକ୍ଷା ଏବଂ ସାମାଜିକ କାର୍ଯ୍ୟରେ ଜଡିତ ବୋଲି ସୋସିଆଲ ମିଡିଆରେ ଉଲ୍ଲେଖ କରିଛନ୍ତି ।
ସୂଚନା ଅନୁଯାୟୀ, ଗତ କିଛି ଦିନ ପୂର୍ବେ ପିସିସିଏଫଙ୍କ ପକ୍ଷରୁ ଜନସାଧାରଣଙ୍କୁ କୁହାଯାଇଥିଲା ଯେ, ଯଦି କୌଣସି ବ୍ୟକ୍ତି ବନ୍ୟଜନ୍ତୁଙ୍କ ସହ ଫଟୋ ଉଠାଇବା ପରେ ଏହାକୁ ସୋସିଆଲ ମିଡିଆରେ ଅପଲୋଡ଼ କରନ୍ତି ତେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏପରିକି ୭ ବର୍ଷ ପର୍ଯ୍ୟନ୍ତ ମଧ୍ୟ ଜେଲ ହୋଇପାରେ । ତେବେ ବନ୍ୟଜନ୍ତୁଙ୍କ ସୁରକ୍ଷା ଦୃଷ୍ଟିରୁ ଏଭଳି ନିଷ୍ପତି ଗ୍ରହଣ କରାଯାଇଛି ।
ଇଟିଭି ଭାରତ, ଭୁବନେଶ୍ବର
