ନିଆଳି: ନିର୍ବାଚନକୁ ନେଇ ରାଜ୍ୟରେ ବଢ଼ୁଛି ଉଷ୍ଣତା । କଳବଳ କୌଶଳେ ଆସନ ଅକ୍ତିଆର କରିବା ଲକ୍ଷ୍ୟରେ ପ୍ରାଣମୁର୍ଚ୍ଛା ଉଦ୍ୟମ ଚଳାଇଛନ୍ତି ନେତା । ଏହାରି ଭିତରେ ନିର୍ବାଚନକୁ ନେଇ ଏବେ ଆକ୍ସନ ମୁଡରେ କଂଗ୍ରେସ । ନିଜ ସପକ୍ଷରେ ଭୋଟ ଭିକ୍ଷା କରିବା ସହ ପରିବର୍ତ୍ତନ ନାରା ଦେଇ ଭୋଟରଙ୍କୁ ବୁଝାଉଛନ୍ତି ଜୟଦେବ ବିଧାନସଭା ନିର୍ବାଚନ ମଣ୍ଡୀ କଂଗ୍ରେସ ପ୍ରାର୍ଥୀ । ଦିନ ରାତିକୁ ଏକ କରି କର୍ମୀ ସମ୍ମିଳନୀ, ବୈଠକ ଏବଂ ଅସନ୍ତୁଷ୍ଟମାନଙ୍କୁ ଏକାଠି କରିବା ପାଇଁ ବଳ ଲଗାଛି ଦଳ ।
ତେବେ ଖୋର୍ଦ୍ଧା ଜିଲ୍ଲା ଜୟଦେବ ବିଧାନସଭା ନିର୍ବାଚନ ମଣ୍ଡଳୀରେ କଂଗ୍ରେସ ବିଧାୟକ ପ୍ରାର୍ଥୀ ହୋଇଛନ୍ତି କୃଷ୍ଣ ଚନ୍ଦ୍ର ସଗରିଆ । ଭୋଟ ଗ୍ରହଣକୁ ଆଉ ଦିନ କେଇଟା ବାକି ଥିବା ବେଳେ ପ୍ରଚାରକୁ ଜୋରଦାର କରିଛନ୍ତି କୃଷ୍ଣ । ଡୋର ଟୁ ଡୋର ବୁଲି ଭୋଟଙ୍କୁ ଆକୃଷ୍ଟ କରି ନିଜ ସପକ୍ଷରେ ଭୋଟ ଭିକ୍ଷା କରୁଛନ୍ତି କୃଷ୍ଣ । ପ୍ରଚାର ବେଳେ ଗଣମାଧ୍ୟମକୁ ପ୍ରତିକ୍ରିୟା ଦେଇ କୃଷ୍ଣ ଚନ୍ଦ୍ର ସଗରିଆ କହିଛନ୍ତି, "କଂଗ୍ରେସର ମାରାଥନ ରାଲି ଚାଲିଛି । ଗତଥର ବିଜେଡିରୁ ଲଢ଼ି ଯିଏ ବିଧାୟକ ହୋଇଥିଲେ ତାଙ୍କୁ କେବଳ କ୍ଷମତା ଦରକାର । ସେଥିପାଇଁ ସେ ବିଜେପି ଯାଇ ଲଢ଼ୁଛନ୍ତି । ତାଙ୍କର କୌଣସି ବିଚାରଧାରା ନାହିଁ । ବିଚାରବିହୀନ ରାଜନେତା ସମାଜ ପାଇଁ କ୍ଷତିକାରକ । ଜୟଦେବ ବିଧାନସଭା ନିର୍ବାଚନ ମଣ୍ଡଳୀର ଭୋଟର ଭାଇ ଭଉଣୀମାନେ ସଚେତନ ହୋଇସାରିଲେଣି ଏବଂ ନିଷ୍ପତ୍ତି ନେଲେଣି ଯେ, ବିକଳ୍ପ କେବଳ କଂଗ୍ରେସ ।"
ସେହିପରି କୃଷ୍ଣ ଚନ୍ଦ୍ର ସଗରିଆ ଆହୁରି ମଧ୍ୟ କହିଛନ୍ତି, "ଭୁବନେଶ୍ବର ଉପକଣ୍ଠରେ ଜୟଦେବ ଅବସ୍ଥିତ । କିନ୍ତୁ ଚାଷୀ ଏଠାରେ ହନ୍ତସନ୍ତ । ଏଠି ବିଜେଡିର 24 ବର୍ଷର ଶାସନ ଭିତରେ ଖଣ୍ଡେ ହେଲେ ଶୀତଳଭଣ୍ଡାର ନାହିଁ । ଜୟଦେବ ଅଞ୍ଚଳର ହେଉଛି ଚାଷୀ ପ୍ରବଣ ଅଞ୍ଚଳ କିନ୍ତୁ କୃଷକମାନଙ୍କ ପାଇଁ ଆଜି ପର୍ଯ୍ୟନ୍ତ ବ୍ୟବସ୍ଥା ନାହିଁ । ଚାଷୀଙ୍କ ପାଇଁ କୌଣସି ସହାୟତା ନାହିଁ । ଚାଷୀମାନଙ୍କର ପବିତ୍ର ଅକ୍ଷୟ ତୃତୀୟ ଦିନ ବିହନ ଆସିନଥିଲା । ଧାନ ଚାଷ ପାଇଁ ଜୟଦେବ ନିର୍ବାଚନ ମଣ୍ଡଳୀର ଚାଷୀ ବିହନ ମୁଠେ ପାଇନାହାନ୍ତି । ଭାରତରେ ଜୟ ଯବାନ ଜୟ କିଷାନର ନାରା ଦିଆଯାଉଛି । ହେଲେ ଚାଷୀ ଏଠି ଅବହେଳିତ । ଜୟଦେବବାସୀ ନିଷ୍ପତ୍ତି ନେଇ ସାରିଲେଣି ଯେ, ଏଥର ବିଜେଡି ଓ ବିଜେପିକୁ ପ୍ରତ୍ୟାଖାନ କରିବେ ଓ କଂଗ୍ରେସକୁ ଭୋଟ ଦେବେ ।" କଂଗ୍ରେସ ପକ୍ଷରୁ ଆଜି ଅଭୟମୁଖି, ଗିରିଙ୍ଗଶ୍ବର, ବିଭିନ୍ନ ବଜାର ଘାଟରେ ଭୋଟରଙ୍କୁ ଭେଟି ନିଜ ସପକ୍ଷରେ ଭୋଟ ଭିକ୍ଷା କରୁଛନ୍ତି କଂଗ୍ରେସ ପ୍ରାର୍ଥୀ କୃଷ୍ଣ ଚନ୍ଦ୍ର ସଗରିଆ ।
ଇଟିଭି ଭାରତ, ନିଆଳି
