തിരുവനന്തപുരം: ഫെബ്രുവരി 25 ഞായറാഴ്‌ചയാണ് ഈ വർഷത്തെ ആറ്റുകാൽ പൊങ്കാല (Attukal Pongala) നടക്കുന്നത്. പൊങ്കാലയോടനുബന്ധിച്ച് ഭക്ത ജനങ്ങൾക്കുള്ള അഗ്നി സുരക്ഷ സേനയുടെ നിർദേശങ്ങൾ.
- അടുപ്പ് കത്തിക്കുന്നതിന് മണ്ണെണ്ണയോ മറ്റ് ദ്രവ ഇന്ധനങ്ങളോ ഉപയോഗിക്കാതിരിക്കുക. ഇത്തരം ഇന്ധനങ്ങൾ കൈവശം സൂക്ഷിക്കാതിരിക്കുക.
- പെട്രോൾ പമ്പുകൾ, ട്രാൻസ് ഫോർമറുകൾ എന്നിവയ്ക്ക് സമീപം അടുപ്പ് കത്തിക്കരുത്. നിർത്തിയിട്ടിരിക്കുന്ന വാഹനങ്ങളിൽ നിന്നും സുരക്ഷിതമായ അകലം പാലിച്ച് മാത്രം അടുപ്പ് കത്തിക്കുക.
- ഭക്തജനങ്ങൾ മുഖാമുഖമായി നിൽക്കുന്ന നിലയിൽ അടുപ്പുകൾ ക്രമീകരിക്കുക. പൊങ്കാലയിടുന്ന ഒരാൾക്ക് പിന്നിലായി മറ്റൊരു അടുപ്പ് വരാതിരിക്കാൻ പ്രത്യേകം ശ്രദ്ധിക്കുക.
- അടുപ്പുകൾ തമ്മിൽ സുരക്ഷിത അകലം പാലിക്കുക.
- സാരിത്തുമ്പുകൾ, ഷാളുകൾ, അയഞ്ഞ വസ്ത്രങ്ങൾ എന്നിവ ശരീരത്തോട് ചേർത്ത് ചുറ്റിവയ്ക്കുക. വസ്ത്രത്തിന്‍റെ തുമ്പ് അലക്ഷ്യമായി നീണ്ടുകിടക്കുന്നത് ഒഴിവാക്കുക.
- അത്യാവശ്യമുണ്ടായാൽ തീ അണയ്ക്കുന്നതിന് ഉപയോഗിക്കുന്നതിനായി സമീപത്തായി അൽപം വെള്ളം കരുതുക.
- പെർഫ്യൂം ബോട്ടിലുകൾ, സാനിറ്റൈസറുകൾ എന്നിവ കൈവശം സൂക്ഷിക്കാതിരിക്കുക.
- അടുപ്പ് കത്തിക്കുന്നതിന് മുൻപായി അധികമുള്ള വിറക് സുരക്ഷിതമായി മാറ്റിവയ്ക്കുക.
- അടുപ്പ് കത്തിച്ച ശേഷം അണയ്ക്കുന്നതിന് മുൻപായി അവരവരുടെ സ്ഥാനം വിട്ട് മാറാതിരിക്കുക. അടുപ്പിൽ നിന്നും പുറത്തേയ്ക്ക് തീ പടരുന്നില്ല എന്നത് ഉറപ്പാക്കുക.
- പൊങ്കാലയ്ക്ക് ശേഷം അടുപ്പ് പൂർണമായി അണഞ്ഞതായി ഉറപ്പാക്കിയ ശേഷം മാത്രം സ്ഥാനം വിട്ട് പോകുക. അടുപ്പിൽ നിന്നും മാറ്റുന്ന വിറകിൽ നിന്നും മറ്റ് വസ്‌തുക്കളിലേയ്ക്ക് തീ പടരാതിരിക്കുന്നതിനായി അത് പൂർണമായി അണച്ചു എന്ന് ഉറപ്പാക്കുക.
- വസ്ത്രങ്ങളിൽ തീ പിടിച്ചാൽ നിലത്തുകിടന്ന് ഉരുളുക. സമീപത്ത് നിൽക്കുന്നവർ വെള്ളമൊഴിച്ചോ കട്ടിയുള്ള തുണികൊണ്ട് മൂടിയോ തീ അണയ്ക്കുക.
- കുട്ടികളെ പൊങ്കാല അടുപ്പിന് സമീപം നിൽക്കുന്നതിന് അനുവദിക്കാതിരിക്കുക.
- അടിയന്തിര സാഹചര്യങ്ങളിൽ ഫയർ ഫോഴ്‌സ് / പൊലീസ് വാഹനങ്ങൾ, ആംബുലൻസ് എന്നിവയുടെ സുഗമമായ യാത്ര ഉറപ്പുവരുത്തുന്നതിനായുള്ള സ്ഥ‌ലം ഒഴിവാക്കി മാത്രം അടുപ്പ് കത്തിക്കുക.
- ഡ്യൂട്ടിയിലുള്ള ഫയർ ഫോഴ്‌സ് / പൊലീസ് സേനാംഗങ്ങളുടെ സുരക്ഷ നിർദേശങ്ങൾ അനുസരിക്കുക.
- ഹൈഡ്രജൻ ബലൂണുകളും സമാന വസ്‌തുക്കളും തീർത്തും ഒഴിവാക്കുക.
- അടിയന്തിര ഘട്ടത്തിൽ 101ൽ ബന്ധപ്പെടുക.
