ധര്‍മ്മശാലയില്‍ ഇംഗ്ലണ്ടിന്‍റെ മുട്ടിടിക്കും; ബുംറ മടങ്ങിയെത്തിയേക്കും

ന്യൂഡല്‍ഹി: ഇംഗ്ലണ്ടിനെതിരായ അഞ്ചാമത്തേയും അവസാനത്തെയും ടെസ്റ്റിന് മുന്നോടിയായി ഇന്ത്യന്‍ ആരാധകര്‍ക്കൊരു സന്തോഷ വാര്‍ത്ത. റാഞ്ചിയില്‍ നടന്ന നാലാം ടെസ്റ്റില്‍ വിശ്രമം അനുവദിച്ച സ്റ്റാര്‍ പേസര്‍ ജസ്‌പ്രീത് ബുംറ (Jasprit Bumrah) ധര്‍മശാലയില്‍ നടക്കുന്ന അഞ്ചാം ടെസ്റ്റില്‍ കളിച്ചേക്കും. ജോലി ഭാരം ക്രമീകരിക്കുന്നതിന്‍റെ ഭാഗമായി ആയിരുന്നു പരമ്പരയില്‍ ഇന്ത്യന്‍ വൈസ് ക്യാപ്റ്റനായ ബുംറയ്‌ക്ക് റാഞ്ചിയില്‍ വിശ്രമം അനുവദിച്ചത്.

ഇതിന് മുന്നെ കളിച്ച മൂന്ന് ടെസ്റ്റുകളില്‍ നിന്നും 17 വിക്കറ്റുകള്‍ വീഴ്‌ത്താന്‍ 30-കാരന് കഴിഞ്ഞിരുന്നു. ഒരു മത്സരം നഷ്‌ടമായെങ്കിലും പരമ്പരയിലെ വിക്കറ്റ് വേട്ടക്കാരുടെ പട്ടികയില്‍ ജസ്‌പ്രീത് ബുംറ രണ്ടാമതുണ്ട്. 20 വിക്കറ്റുകളുള്ള ഇംഗ്ലണ്ടിന്‍റെ ടോം ഹാര്‍ട്‌ലിയാണ് തലപ്പത്ത്.

മാര്‍ച്ച് ഏഴിനാണ് അഞ്ചാം (India vs England 5th Test ) ടെസ്റ്റിന് തുടക്കമാവുന്നത്. നാല് മത്സരങ്ങള്‍ കഴിഞ്ഞപ്പോള്‍ തന്നെ 3-1ന് പരമ്പര ഉറപ്പിക്കാന്‍ ഇന്ത്യയ്‌ക്ക് കഴിഞ്ഞിട്ടുണ്ട്. ഇതോടെ പ്രധാന ബാറ്റര്‍മാരില്‍ ഒരാള്‍ക്ക് വിശ്രമം നല്‍കാന്‍ സാധ്യതയുണ്ടെന്നാണ് വിവരം.

ഹൈദരാബാദില്‍ നടന്ന ആദ്യ ടെസ്റ്റില്‍ തോല്‍വി വഴങ്ങിയ ശേഷം തുടര്‍ന്ന് കളിച്ച മൂന്ന് മത്സരങ്ങളും വിജയിച്ചാണ് ഇന്ത്യ പരമ്പര സ്വന്തമാക്കിയത്. ഹൈദരാബാദില്‍ 28 റണ്‍സിന്‍റെ അപ്രതീക്ഷിത തോല്‍വിയായിരുന്നു ആതിഥേയര്‍ വഴങ്ങിയത്. എന്നാല്‍ വിശാഖപട്ടണത്ത് നടന്ന രണ്ടാം ടെസ്റ്റില്‍ 106 റണ്‍സിന് വിജയം പിടിക്കാന്‍ ഇന്ത്യയ്‌ക്ക് കഴിഞ്ഞു.

രാജ്‌കോട്ടില്‍ നടന്ന മൂന്നാം ടെസ്റ്റില്‍ 434 റണ്‍സിന്‍റെ റെക്കോഡ് വിജയമാണ് രോഹിത് ശര്‍മയും (Rohit Sharma) സംഘവും നേടിയത്. തുടര്‍ന്ന് റാഞ്ചിയില്‍ അഞ്ച് വിക്കറ്റിന് കളിപിടിച്ച ഇന്ത്യ പരമ്പരയും ഉറപ്പിക്കുകയായിരുന്നു. ബെന്‍ സ്റ്റോക്‌സിനും ബ്രണ്ടന്‍ മക്കല്ലത്തിനും കീഴില്‍ ബാസ്‌ബോള്‍ കളിക്കാന്‍ തുടങ്ങിയതിന് ശേഷം ഇംഗ്ലണ്ടിന് നഷ്‌ടമാവുന്ന ആദ്യ പരമ്പരയാണിത്.

ഇതിന് മുമ്പ് കളിച്ച ഏഴ്‌ പരമ്പരയില്‍ നാലെണ്ണം വിജയിച്ച ഇംഗ്ലീഷ് ടീം മൂന്നെണ്ണം സമനിലയിലാക്കിയിരുന്നു. അതേസമയം ഹൈദരാബാദ് ടെസ്റ്റിനിടെ പരിക്കേറ്റ കെഎല്‍ രാഹുല്‍ (KL Rahul) ധര്‍മശാലയിലും കളിക്കുന്ന കാര്യം അനിശ്ചിതത്വത്തിലാണ്. തുടയ്‌ക്കേറ്റ പരിക്കിന് വിദഗ്ധ പരിശോധനകള്‍ നടത്തുന്നതിനായി 31-കാരനെ ബിസിസിഐ ലണ്ടനിലേക്ക് അയച്ചുവെന്നാണ് വിവരം.

മൂന്നാം ടെസ്റ്റിന് മുന്നോടിയായി 90 ശതമാനം ഫിറ്റ്‌നസിലേക്ക് എത്താന്‍ രാഹുലിന് കഴിഞ്ഞിരുന്നു. എന്നാല്‍ പൂര്‍ണ ഫിറ്റ്‌നസിലെത്തിയാല്‍ മാത്രം താരത്തെ കളിപ്പിച്ചാല്‍ മതിയെന്ന തീരുമാനമാണ് ടീം മാനേജ്‌മെന്‍റ് എടുത്തത്.

ഇന്ത്യന്‍ സ്‌ക്വാഡ്: രോഹിത് ശർമ (സി), യശസ്വി ജയ്‌സ്വാൾ, ശുഭ്‌മാൻ ഗിൽ, കെഎൽ രാഹുൽ, രജത് പടിദാർ, സർഫറാസ് ഖാൻ, ധ്രുവ് ജുറെൽ (ഡബ്ല്യുകെ), കെഎസ് ഭരത് (ഡബ്ല്യുകെ), ജസ്‌പ്രീത് ബുംറ, ആർ അശ്വിൻ, രവീന്ദ്ര ജഡേജ, അക്‌സർ പട്ടേൽ, വാഷിംഗ്ടൺ സുന്ദർ, കുൽദീപ് യാദവ്, മുഹമ്മദ് സിറാജ്, മുകേഷ് കുമാർ, ആകാശ് ദീപ്.