ഹൈദരാബാദ്: അയോധ്യയിലെ രാമക്ഷേത്ര പ്രാണ പ്രതിഷ്‌ഠാ ചടങ്ങിനെക്കുറിച്ച് തന്‍റെ സമൂഹ മാധ്യമത്തിലൂടെ അതി വൈകാരികമായി പ്രതികരിച്ച് സൂപ്പര്‍ സ്റ്റാര്‍ അല്ലു അർജുൻ. "ഇന്ത്യയിൽ ഒരു പുതിയ യുഗത്തിന്‍റെ തുടക്കം" എന്ന് വിശേഷിപ്പിച്ചായിരുന്നു താരത്തിന്‍റെ പോസ്റ്റ് (Ram Mandir Pran Pratishtha).
പ്രഭാസും, കൃതി സനോണും അഭിനയിച്ച ആദിപുരുഷ് എന്ന ചിത്രത്തിലെ ജയ് ശ്രീറാം ഗാനത്തോടൊപ്പമുള്ള ശ്രീരാമന്‍റെയും സീതയുടെയും ലക്ഷ്മണന്‍റെയും ചിത്രം ഉൾക്കൊള്ളുന്ന ഒരു വീഡിയോയും താരം തന്‍റെ ഇൻസ്റ്റാഗ്രാം സ്റ്റോറിയിൽ പങ്കുവെച്ചു. ജനുവരി 22ന് നടന്ന ചരിത്ര പ്രസിദ്ധമായ രാമക്ഷേത്ര പ്രാണ പ്രതിഷ്‌ഠാ ചടങ്ങിന് തൊട്ടുപിന്നാലെയാണ് അല്ലു അർജുൻ തന്‍റെ സമൂഹ മാധ്യമത്തിലൂടെ പ്രതിഷ്‌ഠാ ചടങ്ങിനോടുള്ള ആദര സൂചകമായി വീഡിയോ പങ്കിട്ടത് (Allu Arjun About Ram Mandir Inauguration).
വരും വർഷങ്ങളിൽ ആഗോളതലത്തിൽ തന്നെ ഏറ്റവും വലിയ തീർത്ഥാടന കേന്ദ്രമായി അയോധ്യ മാറണമെന്നാണ് ആഗ്രഹമെന്നും താരം തന്‍റെ പോസ്റ്റില്‍ കുറിച്ചു. "ജയ് ശ്രീറാം ജയ് ഹിന്ദ്" എന്ന ശക്തമായ വാക്കുകളോടെയാണ് അദ്ദേഹം തന്‍റെ പോസ്റ്റിന് വിരാമമിട്ടത്.
2021ല്‍ ഇറങ്ങിയ ബ്ലോക്ക് ബസ്റ്റർ ചിത്രമായ പുഷ്‌പ: ദി റൈസിന്‍റെ വിജയശേഷം, അതിന്‍റെ രണ്ടാം ഭാഗമായ പുഷ്‌പ: ദി റൂളിന്‍റെ ചിത്രീകരണത്തിലാണ് താരം. ചിത്രം ഓഗസ്റ്റ് 15-ന് റിലീസ് ചെയ്യാനാണ് അണിയറ പ്രവര്‍ത്തകര്‍ തീരുമാനിച്ചിരിക്കുന്നത്. കൂടാതെ, അനിമലിന്‍റെ സംവിധായക സന്ദീപ് റെഡ്ഡി വംഗയ്‌ക്കൊപ്പം മറ്റൊരു ചിത്രവും അണിയറയില്‍ ഒരുങ്ങുന്നുണ്ട്. അല്ലു അർജുന്‍റെ വരാനിരിക്കുന്ന ചിത്രങ്ങള്‍ക്കായുള്ള കാത്തിരിപ്പിലാണ് ആരാധകര്‍.
