ഭുവനേശ്വര്‍: ഒഡിഷ നിയമസഭ തെരഞ്ഞെടുപ്പിനുള്ള സ്ഥാനാര്‍ത്ഥികളുടെ അഞ്ചാം പട്ടിക ബിജു ജനതാദള്‍ പ്രഖ്യാപിച്ചു. ബിജെഡി അധ്യക്ഷന്‍ നവീന്‍ പട്‌നായിക്കാണ് പട്ടിക പുറത്തിറക്കിയത്. ഒന്‍പത് നിയമസഭാ മണ്ഡലങ്ങളിലേക്കുള്ള സ്ഥാനാര്‍ത്ഥികളെയാണ് അദ്ദേഹം പ്രഖ്യാപിച്ചത്.
സംസ്ഥാന മുഖ്യമന്ത്രി കൂടിയായ നവീന്‍ പട്‌നായിക് പശ്ചിമ ഒഡിഷയിലെ ബാലംഗിര്‍ജില്ലയിലെ കന്തബഞ്ചി നിയമസഭ മണ്ഡലത്തില്‍ നിന്ന് ജനവിധി തേടും. ഇതിന് പുറമെ അദ്ദേഹത്തിന്‍റെ പരമ്പരാഗത മണ്ഡലമായ ഗഞ്ചം ജില്ലയിലെ ഹിന്‍ജിലി സീറ്റില്‍ നിന്നും മത്സരിക്കുന്നുണ്ട്. 2019 ലെ തെരഞ്ഞെടുപ്പിലും അദ്ദേഹം രണ്ട് സീറ്റില്‍ നിന്ന് ജനവിധി തേടിയിരുന്നു. ഹിന്‍ജിലിയിലും പശ്ചിമ ഒഡിഷയിലെ ബര്‍ഗഡ് ജില്ലയിലുള്ള ബിജെപൂര്‍ നിയമസഭാ മണ്ഡലത്തിലും വിജയിക്കാന്‍ അദ്ദേഹത്തിന് കഴിഞ്ഞിരുന്നു.
പിന്നീട് അദ്ദേഹം ബിജെപൂര്‍ മണ്ഡലം ഉപേക്ഷിച്ചു. ഇന്ന് ബിജെഡി പ്രഖ്യാപിച്ച ഒന്‍പത് സ്ഥാനാര്‍ത്ഥികളില്‍ ആറ് പേരും വനിതകളാണ്. ബാക്കിയുള്ളവര്‍ അടുത്തിടെ പാര്‍ട്ടിയിലേക്ക് ചേക്കേറിയവരാണ്.
ഇവര്‍ സ്ഥാനാര്‍ത്ഥികള്‍:
- ചിറ്റകോണ്ട- ലക്ഷ്‌മിപ്രിയ നായക്
- കാന്ത്ബഞ്ചി- നവീന്‍ പട്‌നായിക്
- പദംപൂര്‍- ബര്‍ഷ ബാരിഹ
- കുച്ചിന്‍ദ- രാജേന്ദ്ര ഛത്രിയ
- ദിയോഗഡ്- അരുന്ധതി ദേവി
- അങ്കുള്‍- സഞ്ജിത സിങ്
- നിമപാദ- ദിലീപ് നായക്
- സങ്കേമുണ്ടി- സുലഖന ദേവി
- ജയ്‌പൂര്‍- ഇന്ദിര നന്ദ്
Also Read: വീരപ്പന്‍റെ മകള്‍ ബിജെപി ടിക്കറ്റ് നിരസിച്ചത് എന്തുകൊണ്ട്; എക്‌സ്ക്ലൂസീവ് അഭിമുഖം
രണ്ട് നേതാക്കളുടെ മണ്ഡലം അങ്ങോട്ടുമിങ്ങോട്ടും മാറ്റിയിട്ടുമുണ്ട്. റൈയ്‌റഖോള്‍ എംഎല്‍എ രോഹിത് പൂജാരി സബല്‍പൂര്‍ നിയമസഭാ മണ്ഡലത്തില്‍ നിന്ന് ജനവിധി തേടും. പ്രസന്ന ആചാര്യ റൈയ്‌റഖോലില്‍ നിന്ന് മത്‌സരിക്കും.
