ന്യൂഡൽഹി: ബിജെപിയുടെ പ്രകടന പത്രികയെ വിമര്‍ശിച്ച് കോൺഗ്രസ് അധ്യക്ഷൻ മല്ലികാർജുൻ ഖാർഗെ. രാജ്യത്തെ യുവാക്കള്‍ക്കും കർഷകര്‍ക്കും ബിജെപിയുടെ പ്രകടന പത്രികയെ വിശ്വസിക്കാൻ കഴിയില്ലെന്ന് ഖാർഗെ പറഞ്ഞു. യുവാക്കള്‍ക്കും കർഷകര്‍ക്കും ഗുണം ചെയ്യുന്ന യാതൊന്നും ഈ കാലയളവില്‍ സര്‍ക്കാര്‍ ചെയ്‌തിട്ടില്ലെന്നും ഖാര്‍ഗെ കുറ്റപ്പെടുത്തി.
'കർഷകരുടെ വരുമാനം ഇരട്ടിയാക്കുമെന്നാണ് പ്രധാനമന്ത്രി നരേന്ദ്ര മോദി പറഞ്ഞിരുന്നത്. എംഎസ്‌പി വർധിപ്പിക്കുമെന്നും നിയമപരമായ ഗ്യാരണ്ടി നൽകുമെന്നും അദ്ദേഹം പറഞ്ഞിരുന്നു- ഇതായിരുന്നു ഗ്യാരണ്ടി. ഈ പറഞ്ഞവയൊന്നും അദ്ദേഹം തന്‍റെ ഭരണകാലത്ത് ചെയ്‌തിട്ടില്ല. യുവാക്കള്‍ ജോലി തേടുകയാണ്, രാജ്യത്ത് പണപ്പെരുപ്പം വര്‍ധിക്കുകയാണ്. ഇതിനെ കുറിച്ചൊന്നും മോദി ആശങ്കപ്പെടുന്നില്ല.
ജനങ്ങൾക്കായി ഒന്നും ബിജെപിക്ക് നൽകാനില്ലെന്നാണ് പ്രകടന പത്രിക തെളിയിക്കുന്നതെന്നും കോൺഗ്രസ് അധ്യക്ഷൻ വിമര്‍ശിച്ചു. സാധാരണക്കാരൻ വിലക്കയറ്റത്താല്‍ ഉഴലുന്നത് എന്തുകൊണ്ടാണെന്ന് കോൺഗ്രസ് നേതാവും സ്ഥാനാര്‍ഥിയുമായ മനീഷ് തിവാരി ചോദിച്ചു.
'ജനങ്ങൾക്ക് അറിയേണ്ടത് എന്തുകൊണ്ടാണ് പണപ്പെരുപ്പത്തിന്‍റെ ഭാരം സാധാരണക്കാരെ കുഴക്കുന്നത് എന്നാണ്. 10 വർഷമായി ജനങ്ങൾ ബുദ്ധിമുട്ടുന്ന അടിസ്ഥാന പ്രശ്‌നങ്ങൾ രാജ്യത്ത് നിലവിലുണ്ട്. മണ്ഡലത്തിലെ അതൃപ്‌തി എൻഡിഎയുടെ തെരഞ്ഞെടുപ്പ് പരാജയമായി മാറും'- അദ്ദേഹം പറഞ്ഞു.
'മോദിയുടെ ഗ്യാരണ്ടി 2024' എന്ന ടാഗ്‌ലൈനോടെയാണ് ബിജെപി ലോക്‌സഭാ തെരഞ്ഞെടുപ്പിനുള്ള പ്രകടന പത്രിക പുറത്തിറക്കിയത്. സ്‌ത്രീ ശാക്തീകരണത്തിലും യുവാക്കളുടെയും പാവപ്പെട്ടവരുടെയും ഉന്നമനത്തിലും ശ്രദ്ധ കേന്ദ്രീകരിക്കുന്നതാണ് പ്രകടന പത്രിക എന്നാണ് ബിജെപി അവകാശപ്പെടുന്നത്.
