മാനസിക ആരോഗ്യം നിലനിർത്തുന്നതിൽ സംഗീതത്തിന്‍റെ പങ്കിനെക്കുറിച്ചും മ്യൂസിക്ക് തെറാപ്പിയുടെ പ്രയോജനങ്ങളെക്കുറിച്ചും ധാരാളം ഗവേഷണങ്ങളും പഠനങ്ങളും നടക്കുന്നുണ്ട്. മാനസിക പ്രശ്‌നങ്ങള്‍ നേരിടുന്നവരില്‍ മ്യൂസിക്ക് തെറാപ്പി സഹായകരമാകുമെന്നാണ് പല പഠനങ്ങളും തെളിയിക്കുന്നത്.
മാനസികാരോഗ്യവും മ്യൂസിക്ക് തെറാപ്പിയും
മാനസികാരോഗ്യത്തിന് സംഗീതം വളരെ പ്രയോജനകരമാണെന്ന് വിവിധ രാജ്യങ്ങളിൽ നടത്തിയ നിരവധി ഗവേഷണങ്ങൾ സ്ഥിരീകരിക്കുന്നു. വിഷാദം, പോസ്റ്റ് ട്രോമാറ്റിക് സ്ട്രെസ് ഡിസോർഡർ അഥവാ പിടിഎസ്‌ഡി, സ്‌കീസോഫ്രീനിയ തുടങ്ങിയ മാനസിക പ്രശ്‌നങ്ങള്‍ക്ക് സംഗീതത്തിലൂടെ പരിഹാരം കാണാനാകുമെന്ന് മാനസികാരോഗ്യത്തില്‍ സംഗീതത്തിന്‍റേയും മ്യൂസിക്ക് തെറാപ്പിയുടേയും സ്വാധീനത്തെ അടിസ്ഥാനമാക്കിയുള്ള ഗവേഷണങ്ങളും പഠനങ്ങളും തെളിയിച്ചിട്ടുണ്ട്.
മ്യൂസിക്ക് തെറാപ്പിയെക്കുറിച്ചുള്ള പഠനങ്ങൾ
2012ൽ യുകെയിലെ ബ്രണൽ യൂണിവേഴ്‌സിറ്റിയിലെ ശാസ്‌ത്രജ്ഞർ ഇലക്‌ട്രോ എൻസഫലോഗ്രാമിന്‍റെ (ഇഇജി) സഹായത്തോടെ ഒരു പഠനം നടത്തി. സംഗീതത്തോടൊപ്പം വ്യായാമം ചെയ്യുമ്പോഴോ സംഗീതമില്ലാതെ വ്യായാമം ചെയ്യുമ്പോഴോ മസ്‌തിഷ്‌ക തരംഗങ്ങളിലെ മാറ്റങ്ങൾ നിരീക്ഷിച്ചു. സംഗീതത്തോടൊപ്പം വ്യായാമം ചെയ്യുമ്പോള്‍ തലച്ചോറിലെ വൈദ്യുത തരംഗങ്ങളില്‍ മാറ്റങ്ങള്‍ ഉണ്ടാകുന്നതായി ശാസ്‌ത്രജ്ഞർ കണ്ടെത്തി.
സംഗീതമില്ലാതെ തുറന്ന അന്തരീക്ഷത്തിൽ വ്യായാമം ചെയ്യുന്നവരിൽ ആസ്വാദനത്തിന്‍റെ തോത് 13 ശതമാനം വർധിച്ചപ്പോള്‍ സംഗീതത്തോടൊപ്പം വ്യായാമം ചെയ്‌തവരില്‍ ആസ്വാദനത്തിന്‍റെ തോത് 28 ശതമാനമാനമാണ് വര്‍ധിപ്പിച്ചത്. സംഗീതം വ്യക്തികളുടെ പ്രകടനം മെച്ചപ്പെടുത്തുന്നതിനും ക്ഷീണം കുറയ്‌ക്കുന്നതിനും പോസിറ്റിവിറ്റി പങ്ക് വയ്ക്കുന്നതിനുമുള്ള മാര്‍ഗമായാണ് ശാസ്‌ത്രജ്ഞര്‍ വിലയിരുത്തിയത്.
കുട്ടികളില്‍ സംഗീതത്തിന്‍റെ സ്വാധീനം
അമേരിക്കൻ അക്കാദമിയിലെ റിസർച്ച് ജേണലിൽ വെർമോണ്ട് യൂണിവേഴ്‌സിറ്റിയിലെ കോളജ് ഓഫ് മെഡിസിനിൽ നിന്നുള്ള പീഡിയാട്രിക് സൈക്യാട്രി സംഘം ഇതേ വിഷയത്തില്‍ മറ്റൊരു ഗവേഷണ പ്രബന്ധം പ്രസിദ്ധീകരിച്ചിരുന്നു. കുട്ടികളുടെ തലച്ചോറിൽ സംഗീതത്തിന്‍റെ സ്വാധീനം നിരീക്ഷിച്ച ഗവേഷക സംഘം സംഗീതോപകരണങ്ങള്‍ വായിക്കുന്നത് കുട്ടികളിലെ തലച്ചോറിന്‍റെ വികാസത്തെ ആഴത്തിൽ സ്വാധീനിക്കുമെന്ന് കണ്ടെത്തി.
6 മുതൽ 12 വയസ് വരെയുള്ള 232 കുട്ടികളുടെ തലച്ചോറാണ് പഠനത്തിന് വിധേയമാക്കിയത്. സംഗീതം മസ്‌തിഷ്‌ക പ്രവർത്തന കേന്ദ്രങ്ങളെ സജീവമാക്കുന്നുവെന്നും ഇത് പെരുമാറ്റത്തെ നിയന്ത്രിക്കുന്ന തലച്ചോറിന്‍റെ ഭാഗങ്ങളിൽ മാറ്റങ്ങൾ വരുത്തുന്നുവെന്നുമായിരുന്നു ഗവേഷകരുടെ കണ്ടെത്തല്‍.
മ്യൂസിക്ക് തെറാപ്പിയുടെ ഗുണങ്ങള്‍ :
1. ന്യൂറോളജിക്കൽ അവസ്ഥകളില്‍ ആശ്വാസം
അൽഷിമേഴ്‌സ്, ഡിമെൻഷ്യ ഉള്‍പ്പെടെയുള്ള ന്യൂറോളജിക്കൽ അവസ്ഥകൾക്ക് മ്യൂസിക് തെറാപ്പി വലിയ ആശ്വാസം നൽകുന്നുവെന്നാണ് പഠനങ്ങള്‍ ചൂണ്ടികാട്ടുന്നത്. ഒരു വ്യക്തിയുടെ ജീവിതനിലവാരം നിലനിർത്താൻ സഹായിക്കുന്ന സംവേദനാത്മകവും ബൗദ്ധികവുമായ ഉത്തേജനത്തിന്‍റെ രൂപമായും സംഗീതം ഉപയോഗിക്കാമെന്ന് വിദഗ്‌ധര്‍ പറയുന്നു.
2. ഉറക്കം മെച്ചപ്പെടുത്തുന്നു
പെരിഅനസ്‌തേഷ്യ നഴ്‌സിങ് ജേണലിൽ പ്രസിദ്ധീകരിച്ച ഒരു ഗവേഷണ പ്രബന്ധത്തില്‍ മ്യൂസിക്ക് തെറാപ്പിക്ക് ഉറക്ക ഗുളികകളുടേതിന് സമാനമായ ഫലങ്ങളുണ്ടെന്നാണ് പറയുന്നത്. കുട്ടികളിലും പ്രായമായവരിലും ഉറക്കമില്ലായ്‌മ (ഇന്‍സോമ്‌നിയ) പോലുള്ള പ്രശ്‌നങ്ങൾക്ക് പ്രതിവിധിയായും ഉറക്കത്തിന്‍റെ ഗുണനിലവാരം മെച്ചപ്പെടുത്താനും സംഗീതത്തിന് കഴിയുമെന്നാണ് വിദഗ്‌ധര്‍ പറയുന്നത്.
3. പക്ഷാഘാത സാധ്യത കുറയ്ക്കുന്നു
ഇന്‍റർനാഷണൽ ജേണൽ ഓഫ് കാർഡിയോളജിയിൽ പ്രസിദ്ധീകരിച്ച മ്യൂസിക് തെറാപ്പി, ബ്ലഡ് പ്രഷർ എന്നിവയെക്കുറിച്ചുള്ള ഒരു ഗവേഷണത്തിൽ സിസ്റ്റോളിക് രക്തസമ്മർദ്ദത്തിന്‍റെ അളവ് കുറയ്ക്കാൻ മ്യൂസിക് തെറാപ്പിക്ക് കഴിയുമെന്ന് ഗവേഷകര്‍ പറയുന്നു. ഇത് പക്ഷാഘാതത്തിന്‍റെ സാധ്യത കുറയ്ക്കുന്നു.
4. സെൻസറി പ്രശ്‌നങ്ങൾക്ക് പരിഹാരം
സംവേദനാത്മക പ്രശ്‌നങ്ങൾ, സാമൂഹിക കഴിവുകൾ, സ്വാശ്രയത്വം, വൈജ്ഞാനിക കഴിവ് തുടങ്ങിയവ മെച്ചപ്പെടുത്താനും മ്യൂസിക്ക് തെറാപ്പി ഉപയോഗിക്കുന്നു.
ലോകമെമ്പാടുമുള്ള ധാരാളം ആളുകളാണ് വിഷാദവും മറ്റ് മാനസിക അവസ്ഥകളും നേരിടുന്നത്. പാര്‍ശ്വഫലങ്ങളൊന്നുമില്ലാത്ത മ്യൂസിക് തെറാപ്പിയിലൂടെ മാനസിക പ്രശ്‌നങ്ങള്‍ക്ക് ഒരു പരിധി വരെ ആശ്വാസം കണ്ടെത്താനാകും.
Also read: പ്രതിദിനം 7000 ചുവടുകള്‍ നടന്നാല്‍ 70 ശതമാനം വരെ മരണ സാധ്യത കുറയ്‌ക്കാം; ഗവേഷണ ഫലം പുറത്ത്
