പത്തനംതിട്ട : പാര്‍ട്ടിക്കുള്ളില്‍ കുലംകുത്തികളുണ്ടെന്ന് സിപിഎം പത്തനംതിട്ട ജില്ല സെക്രട്ടറി കെ.പി ഉദയഭാനു. കുലംകുത്തികള്‍ അടുത്ത സമ്മേളനം കാണില്ലെന്നും ഉദയഭാനു മുന്നറിയിപ്പ് നല്‍കി. സിപിഎം പത്തനംതിട്ട ഏരിയ സമ്മേളനത്തിലെ ചര്‍ച്ചയ്ക്ക് മറുപടി പറയുമ്പോഴായിരുന്നു വിമർശനം.
വീണ ജോര്‍ജ് ഉള്‍പ്പടെയുള്ളവര്‍ക്കെതിരെ വ്യക്തിഹത്യ ഉയര്‍ന്നുവന്നത് അത്തരം ആളുകളുടെ നീക്കങ്ങളുടെ ഭാഗമാണ്. അവര്‍ അടുത്ത സമ്മേളനം കാണില്ല. മന്ത്രി വീണ ജോര്‍ജിനെതിരായ വ്യക്തിഹത്യ 2016ല്‍ തുടങ്ങിയതാണ്. 2016ലും 2021ലും വീണ ജോര്‍ജിനെ തോല്‍പ്പിക്കാന്‍ ശ്രമിച്ചവരുണ്ട്. ജില്ല കമ്മിറ്റിയിലും സംസ്ഥാന സെക്രട്ടറിയേറ്റിലും ഉള്‍പ്പടെയുള്ളവര്‍ അക്കൂട്ടത്തിലുണ്ട്. പാര്‍ലമെന്‍ററി മോഹമുള്ളവരാണ് അവര്‍. അവരെ തിരുത്താന്‍ പാര്‍ട്ടിക്ക് അറിയാമെന്നും അദ്ദേഹം വ്യക്തമാക്കി.
Also Read: ഗ്രാമസഭ പദ്ധതി ലിസ്റ്റുകളില്‍ വന്‍ തിരിമറി ; അനര്‍ഹര്‍ കയറിക്കൂടുന്നു
വിശ്വാസികള്‍ക്ക് പാര്‍ട്ടി എതിരല്ല. വിശ്വാസികള്‍ക്ക് പാര്‍ട്ടിയില്‍ സ്ഥാനമുണ്ടെന്നും അദ്ദേഹം പറഞ്ഞു. വീണ ജോര്‍ജ് ദൈവനാമത്തില്‍ സത്യപ്രതിജ്ഞ ചെയ്‌തതിനെ ചിലര്‍ വിമര്‍ശിച്ചിരുന്നു. വീണ ജോര്‍ജ് ജനപ്രതിനിധിയായ ശേഷം പാര്‍ട്ടി അംഗത്വത്തില്‍ വന്ന ആളാണെന്നും അവര്‍ സംഘടനാ ചട്ടക്കൂടിലേക്ക് വരാന്‍ സമയമെടുക്കുമെന്നും അദ്ദേഹം പറഞ്ഞു.
ശനിയാഴ്‌ച ആരംഭിച്ച ഏരിയാസമ്മേളനം ഇന്നാണ് സമാപിച്ചത്. ആരോഗ്യമന്ത്രി വീണ ജോര്‍ജിനെതിരെ രൂക്ഷമായ വിമര്‍ശനമാണ് സമ്മേളനത്തില്‍ ഉയർന്നത്. വീണ ജോർജ് ദൈവനാമത്തിൽ സത്യപ്രതിജ്ഞ ചെയ്‌തു, വിളിച്ചാല്‍ ഫോണ്‍ എടുക്കുന്നില്ല. തുടങ്ങിയ ആക്ഷേപങ്ങളാണ് പ്രതിനിധികള്‍ ഉയര്‍ത്തിയത്.
സമ്മേളനത്തിലുയർന്ന വിമര്‍ശനങ്ങള്‍ക്കെല്ലാമുള്ള മുന്നറിയിപ്പായിരുന്നു ഉദയഭാനുവിന്‍റെ മറുപടി പ്രസംഗം. സമ്മേളനത്തിൽ വിമർശന ശരങ്ങൾ ഏറ്റുവാങ്ങിയ വീണ ജോർജിനെ സംരക്ഷിച്ച് രംഗത്തെത്തുകയായിരുന്നു ജില്ല സെക്രട്ടറി.
