കോട്ടയം: ഏറ്റുമാനൂർ കാരിത്താസിൽ യുവതിയും യുവാവും പിടിയിലായത് 47 ഗ്രാം എംഡിഎംഎയുമായി. മൂന്ന് കുട്ടികളുടെ അമ്മയായ യുവതി സുഹൃത്തിനൊപ്പം പോയത് എംഡിഎംഎ കച്ചവടം ലക്ഷ്യമിട്ടാണ് എന്ന് പൊലീസ് പറഞ്ഞു (MDMA caught in Kottayam). തൃക്കൊടിത്താനം സ്വദേശി അശ്വതി, ഇവരുടെ സുഹൃത്ത് പുതുപ്പള്ളി സ്വദേശി ജെബി എന്നിവരെയാണ് ജില്ലാ പൊലീസ് മേധാവി കെ. കാർത്തിക്കിന്‍റെ നേതൃത്വത്തിലുള്ള ലഹരി വിരുദ്ധ സ്ക്വാഡും ഏറ്റുമാനൂർ പൊലീസും ചേർന്ന് പിടികൂടിയത്.
കഴിഞ്ഞ ദിവസമാണ് ഇരുവരും ബംഗളൂരുവിലേയ്ക്ക് പോയത്. തുടർന്ന് ലഹരി മരുന്നുമായി തിരികെ വരാനായിരുന്നു പദ്ധതി. എന്നാൽ, മുൻപ് കഞ്ചാവ് മാഫിയ സംഘങ്ങളുമായി ബന്ധമുണ്ടായിരുന്ന ജെബി ജില്ലാ പൊലീസ് മേധാവിയുടെ ലഹരി വിരുദ്ധ സംഘത്തിന്‍റെ നിരീക്ഷണത്തിലായിരുന്നു. തുടർന്ന്, ഇന്ന് പുലർച്ചെ കോട്ടയം ഏറ്റുമാനൂർ കാരിത്താസിൽ അന്തർ സംസ്ഥാന ബസിൽ വന്നിറങ്ങിയ ഇരുവരെയും ജില്ലാ പൊലീസ് മേധാവിയുടെ നേതൃത്വത്തിലുള്ള ലഹരി വിരുദ്ധ സ്ക്വാഡും ഏറ്റുമാനൂർ പൊലീസും ചേർന്ന് പിടികൂടുകയായിരുന്നു.
കോട്ടയം ഡി വൈ എസ് പി കെ.ജി അനീഷ്, ഏറ്റുമാനൂർ സ്റ്റേഷൻ ഹൗസ് ഓഫിസർ ഇൻസ്പെക്‌ടർ പ്രസാദ് എബ്രഹാം വർഗീസ് എന്നിവരുടെ നേതൃത്വത്തിൽ നടത്തിയ പരിശോധനയിൽ ജെബിയുടെ അടിവസ്ത്രത്തിൽ ഒളിപ്പിച്ച നിലയിൽ എംഡിഎംഎ കണ്ടെത്തുകയായിരുന്നു. പോയിന്‍റ്‌ അഞ്ച് ഗ്രാമിൽ കൂടുതൽ എം ഡി എം എ കൈവശം വയ്ക്കുന്നത് കൊമേഷ്യൽ ക്വാണ്ടിറ്റിയായി കണക്കിലെടുത്ത് പത്ത് വർഷത്തിലധികം തടവ് ലഭിക്കാവുന്ന കുറ്റമാണ്. പ്രതികളെ കോടതിയിൽ ഹാജരാക്കി.
തൃശൂരില്‍ ലഹരി വേട്ട: 37 ഗ്രാം എംഡിഎംഎയുമായി 21 കാരന്‍ പിടിയില്‍ (നവംബര്‍ 23). കൊല്ലം കരുനാഗപ്പള്ളി സ്വദേശി തിരുവോണം വീട്ടിൽ അങ്കിത് ആണ് അറസ്റ്റിലായത്. തൃശൂർ സിറ്റി ലഹരി വിരുദ്ധ സ്ക്വാഡും ഈസ്റ്റ് പൊലീസും ചേർന്ന് പിടികൂടുകയായിരുന്നു. ബെംഗളൂരുവിൽ നിന്നുള്ള ട്രെയിനിൽ തൃശൂർ റെയിൽവേ സ്റ്റേഷനിൽ വന്നിറങ്ങിയപ്പോഴാണ് യവാവ് പൊലീസ് പിടിയിലായത്. തൃശൂരിലും പരിസര പ്രദേശങ്ങളിലും വിൽപ്പനക്കായി എത്തിച്ചതാണ് പിടികൂടിയ മയക്കുമരുന്ന്. സംഭവത്തില്‍ ഈസ്റ്റ് പൊലീസ് കേസ് രജിസ്റ്റർ ചെയ്‌ത് അന്വേഷണം ആരംഭിച്ചു.
ടാറ്റു സ്‌റ്റുഡിയോയില്‍ ലഹരി മരുന്ന് വേട്ട: തിരുവനന്തപുരം തമ്പാനൂരിലെ ടാറ്റു സ്‌റ്റുഡിയോയില്‍ നിന്ന്‌ (നവംബര്‍ 3) 78 ഗ്രാം എംഡിഎംഎ പിടികൂടി. രാജാജി നഗർ സ്വദേശി മജീന്ദ്രൻ, പെരിങ്ങമല സ്വദേശി ഷോണ്‍ അജി എന്നിവരാണ് അറസ്റ്റിലായത്. മൂന്ന് ലക്ഷത്തോളം രൂപ വിലവരുന്ന ലഹരി മരുന്നാണ് ഇരുവരില്‍ നിന്നും പിടികൂടിയത്. ടാറ്റു സെന്‍ററിന്‍റെ മറവില്‍ ഇരുവരും മയക്ക് മരുന്ന് വില്‍പ്പന നടത്തുണ്ടെന്ന് എക്‌സൈസിന് രഹസ്യ വിവരം ലഭിച്ചിരുന്നു. ഇതിന്‍റെ അടിസ്ഥാനത്തില്‍ നടത്തിയ പരിശോധനിയലാണ് മയക്ക് മരുന്ന് കണ്ടെത്തിയത്. അറസ്റ്റിലായ മജീന്ദ്രന്‍ ലഹരി വില്‍പ്പന കേസുകളിലും പൊലീസിനെ ആക്രമിച്ച കേസിലും പ്രതിയാണെന്ന് എക്‌സൈസ് അറിയിച്ചു
