എറണാകുളം : പന്തീരാങ്കാവ് യുഎപിഎ കേസിലെ കുറ്റാരോപിതന്‍ (Pantheeramkavu UAPA Case accused) അലൻ ഷുഹൈബിനെ ആലുവയിലെ ഫ്ലാറ്റിൽ അവശനിലയില്‍ കണ്ടെത്തി. അമിത അളവിൽ ഉറക്ക ഗുളിക കഴിച്ച നിലയിലായിരുന്നു. ഇതോടെ അലനെ ഉടന്‍ ആശുപത്രിയിൽ പ്രവേശിപ്പിച്ചു. കൊച്ചിയിലെ സ്വകാര്യ ആശുപത്രിയിലെ തീവ്ര പരിചരണ വിഭാഗത്തിലാണ് അലൻ ഷുഹൈബ് ചികിത്സയിൽ തുടരുന്നത് (UAPA Case Accused Hospitalized).
കൂടുതൽ അളവിൽ ഉറക്ക ഗുളിക കഴിച്ച് ഗുരുതരാവസ്ഥയിലായ അലന്‍റെ മൊഴി രേഖപ്പെടുത്താൻ പൊലീസിന് ഇതുവരെ കഴിഞ്ഞിട്ടില്ല. ആത്മഹത്യാശ്രമമെന്നാണ് പൊലീസ് നൽകുന്ന വിവരം. തന്നെ കൊല്ലുന്നത് വ്യവസ്ഥയാണെന്ന് അലൻ ഷുഹൈബ് സുഹൃത്തുക്കൾക്ക് സന്ദേശമയച്ചിരുന്നതായാണ് വിവരം. കേസിൽ പ്രതിയായതിനെ തുടർന്ന് പരീക്ഷ എഴുതുന്നതിന് ഉൾപ്പടെ അലൻ പ്രയാസങ്ങൾ നേരിട്ടിരുന്നു.
കോഴിക്കോട് സ്വദേശിയായ അലൻ ഷുഹൈബിന് പന്തീരാങ്കാവ് യുഎപിഎ കേസിൽ കോടതി നേരത്തേ ജാമ്യം അനുവദിച്ചിരുന്നു. 2019ലായിരുന്നു നിയമ വിദ്യാർഥിയായ അലനെയും, ജേണലിസം വിദ്യാർഥിയായ താഹയെയും മാവോയിസ്റ്റ് ബന്ധം ആരോപിച്ച് പൊലീസ് അറസ്റ്റ് ചെയ്‌തത്. ഇവരിൽ നിന്ന് മാവോയിസ്റ്റ് അനുകൂല ലഘുലേഖകൾ പിടിച്ചെടുത്തുവെന്ന് ആരോപിച്ച് ഇരുവർക്കുമെതിരെ യുഎപിഎ ചുമത്തിയിരുന്നു.
തുടർന്ന് കേസ് അന്വേഷണം എൻഐഎ ഏറ്റെടുക്കുകയായിരുന്നു. വിദ്യാർഥികളായ ഇരുവർക്കുമെതിരെ യുഎപിഎ ചുമത്തിയതിനെതിരെ വലിയ വിമർശനമുയർന്നിരുന്നു.
ശ്രദ്ധിക്കൂ... ആത്മഹത്യ ഒരു പ്രശ്‌നത്തിനും പരിഹാരമല്ല. മാനസിക ബുദ്ധിമുട്ടുകളുണ്ടായാല്‍ സഹായത്തിനായി ബന്ധപ്പെടുക, അതിജീവിക്കുക. വിളിക്കാം: 9152987821
