ഏഷ്യന്‍ കപ്പില്‍ രണ്ടാം മത്സരം, ലക്ഷ്യം ആദ്യ ജയം ; നേര്‍ക്കുനേര്‍ പോരിന് ഇന്ത്യയും ഉസ്‌ബക്കിസ്ഥാനും

author img

By ETV Bharat Kerala Desk

Published : Jan 18, 2024, 10:11 AM IST

AFC Asian Cup  India vs Uzbekistan Football  Sunil Chhetri Sahal Abdul Samad  ഏഷ്യന്‍ കപ്പ് ഫുട്‌ബോള്‍

AFC Asian Cup : ഏഷ്യന്‍ കപ്പിലെ രണ്ടാം മത്സരത്തില്‍ ഇന്ത്യ ഇന്ന് ഉസ്‌ബക്കിസ്ഥാനെ നേരിടും. അല്‍ റയാന്‍ സ്റ്റേഡിയത്തില്‍ ഇന്ത്യന്‍ സമയം രാത്രി എട്ടിനാണ് മത്സരം തുടങ്ങുന്നത്.

ദോഹ : എഎഫ്‌സി ഏഷ്യന്‍ കപ്പ് (AFC Asian Cup) ഫുട്‌ബോളില്‍ ആദ്യ ജയം തേടി ഇന്ത്യ ഇന്നിറങ്ങുന്നു (Indian Football Team). ഫിഫ ലോക റാങ്കിങ്ങില്‍ 68-ാം സ്ഥാനക്കാരായ ഉസ്‌ബക്കിസ്ഥാനാണ് ഇന്ത്യയുടെ എതിരാളി (India vs Uzbekistan). ഇന്ത്യന്‍ സമയം രാത്രി എട്ടിന് ഖത്തറിലെ അല്‍ റയാന്‍ സ്റ്റേഡിയത്തിലാണ് മത്സരം.

ആദ്യ മത്സരത്തില്‍ കരുത്തരായ ഓസ്‌ട്രേലിയന്‍ ടീമിനോട് പൊരുതി തോറ്റെത്തുന്ന ഇന്ത്യയ്‌ക്ക് ടൂര്‍ണമെന്‍റില്‍ തുടരാന്‍ ഇന്ന് ജയം അനിവാര്യമാണ്. ടൂര്‍ണമെന്‍റിലെ ആദ്യ കളിയില്‍ ഓസ്‌ട്രേലിയക്കെതിരെ പ്രതിരോധത്തിലൂന്നിയായിരുന്നു ഇന്ത്യന്‍ ടീം കളിച്ചത്. അതുകൊണ്ടുതന്നെ രണ്ട് ഗോളുകള്‍ മാത്രമായിരുന്നു ഇന്ത്യയുടെ വലയിലേക്ക് എത്തിയത്.

ഇന്ന്, രണ്ടാം മത്സരത്തിലും ഇതേ പ്രകടനം ആവര്‍ത്തിക്കാനാകും ഇന്ത്യയുടെ ലക്ഷ്യം. ഓസ്‌ട്രേലിയക്കെതിരെ മികച്ച രീതിയില്‍ കളിച്ച സുനില്‍ ഛേത്രി (Sunil Chhetri), ലാലിയന്‍സുവാല ചാങ്തേ (Lallianzuala Chhangte), സന്ദേശ് ജിങ്കാന്‍ (Sandesh Jhingan), രാഹുല്‍ ഭേക്കേ (Rahul Bheke) എന്നിവരിലാകും രണ്ടാം മത്സരത്തിലും ഇന്ത്യയുടെ പ്രതീക്ഷകള്‍. പരിക്കില്‍ നിന്നും മുക്തനാകാത്ത സഹല്‍ അബ്‌ദുല്‍ സമദ് (Sahal Abdul Samad) ഇന്നും കളിക്കാന്‍ സാധ്യത ഇല്ല.

സഹലിന്‍റെ അഭാവം ഇന്ത്യന്‍ മധ്യനിരയുടെ പ്രകടനത്തെ കാര്യമായി തന്നെ ബാധിച്ചേക്കാം. സഹലിന്‍റെ അഭാവത്തില്‍ ഡിഫന്‍സീവ് മിഡ്‌ഫീല്‍ഡര്‍ ദീപക് ടാംഗ്രിയാകും ഇന്നും ആദ്യ ഇലവനില്‍ സ്ഥാനം പിടിക്കുക. ദീപക് ടാംഗ്രി കളത്തിലിറങ്ങിയാല്‍ പ്രതിരോധത്തിലൂന്നിയാകും ടീം ഇന്ത്യ കളിക്കുക.

മറുവശത്ത്, ആദ്യ മത്സരത്തില്‍ സിറിയയോട് ഗോള്‍രഹിത സമനില വഴങ്ങിയാണ് ഉസ്‌ബക്കിസ്ഥാന്‍റെ വരവ്. സിറിയന്‍ ഗോള്‍മുഖത്തെ പലപ്രാവശ്യം വിറപ്പിക്കാനായെങ്കിലും ഫിനിഷിങ്ങിലെ പിഴവ് അവര്‍ക്ക് തിരിച്ചടിയാവുകയായിരുന്നു. നിലവില്‍, ഗ്രൂപ്പ് ബിയിലെ പോയിന്‍റ് പട്ടികയില്‍ ഇന്ത്യയ്‌ക്ക് മുന്നിലായി മൂന്നാം സ്ഥാനത്താണ് ഉസ്‌ബക്കിസ്ഥാന്‍.

Also Read : ബെസ്റ്റ് മെസി തന്നെ, പക്ഷേ ഇന്ത്യയില്‍ നിന്ന് ഒറ്റവോട്ടും താരത്തിനില്ല...വിവരങ്ങളിങ്ങനെ

നേര്‍ക്കുനേര്‍ പോരാട്ടങ്ങളുടെ കണക്കില്‍ ടീം ഇന്ത്യയ്‌ക്ക് എന്നും ബാലികേറാമലയാണ് ഉസ്‌ബക്കിസ്ഥാന്‍ (India vs Uzbekistan Head to Head Stats). ഫുട്‌ബോള്‍ ചരിത്രത്തില്‍ ആറ് പ്രാവശ്യമാണ് ഇരു ടീമുകളും തമ്മിലേറ്റുമുട്ടിയിട്ടുള്ളത്. അതില്‍ നാല് മത്സരത്തിലും ജയം ഉസ്‌ബക്കിസ്ഥാനൊപ്പമായിരുന്നു. രണ്ട് മത്സരം സമനിലയിലാണ് കലാശിച്ചത്.

മത്സരം തത്സമയം കാണാന്‍ : എഎഫ്‌സി ഏഷ്യന്‍ കപ്പിലെ ഇന്ത്യ ഉസ്‌ബക്കിസ്ഥാന്‍ മത്സരം സ്‌പോര്‍ട്‌സ് 18 നെറ്റ്‌വര്‍ക്ക് (Sports 18) ചാനലിലൂടെയാണ് ഇന്ത്യയില്‍ സംപ്രേഷണം ചെയ്യുന്നത്. കൂടാതെ, ജിയോ സിനിമയിലൂടെ സൗജന്യമായും മത്സരം ഓണ്‍ലൈനില്‍ സ്ട്രീം ചെയ്യാം.

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.