മുംബൈ: ഏഷ്യ കപ്പ് (Asia Cup) ക്രിക്കറ്റ് ടൂര്‍ണമെന്‍റിന് തുടക്കം കുറിക്കാന്‍ ഇനി രണ്ടാഴ്‌ചയില്‍ താഴെ മാത്രമാണ് സമയം. ടൂര്‍ണമെന്‍റില്‍ ഇന്ത്യയ്‌ക്കായി ആരെല്ലാം കളത്തിലിറങ്ങും എന്നതില്‍ ഇതുവരെയും വ്യക്തത വന്നിട്ടില്ല. പ്രധാനമായും കെഎല്‍ രാഹുല്‍ (KL Rahul), ശ്രേയസ് അയ്യര്‍ (Shreyas Iyer) എന്നിവര്‍ ടീമിലേക്ക് മടങ്ങിയെത്തുമോ എന്നറിയാന്‍ ആരാധകര്‍ ഏറെ ആകാംക്ഷയോടെയാണ് കാത്തിരിക്കുന്നത്.
ഫിറ്റ്‌നസ് വീണ്ടെടുത്തുകൊണ്ടിരിക്കുന്ന കെഎല്‍ രാഹുല്‍ ഏകദിന ലോകകപ്പിന് (ODI World Cup) മുന്‍പായി ഏഷ്യ കപ്പിലൂടെ ടീം ഇന്ത്യയിലേക്ക് തിരിച്ചെത്തുമെന്ന് നേരത്തെ റിപ്പോര്‍ട്ടുകള്‍ പുറത്തുവന്നിരുന്നു. നിലവില്‍, ശ്രേയസ് അയ്യരുടെ മടങ്ങിവരവാണ് ആശങ്കയായി തുടരുന്നത്. ഇത്തരമൊരു സാഹചര്യത്തില്‍ ഇന്ത്യയുടെ നാലാം നമ്പറില്‍ ശ്രേയസ് അയ്യര്‍ അല്ലെങ്കില്‍ പകരം ആരാകും എത്തുക എന്നതിലാണ് നിലവില്‍ ആരാധകര്‍ക്കും ഉത്തരം ലഭിക്കാത്തത്.
തലവേദനയൊഴിയാത്ത നാലാംനമ്പർ: ഏറെക്കാലമായി ഏകദിന ക്രിക്കറ്റില്‍ team India odi format ഇന്ത്യയുടെ നാലാം നമ്പറില്‍ സ്ഥിരതയാര്‍ന്ന പ്രകടനം നടത്തിയിരുന്ന താരമാണ് ശ്രേയസ് അയ്യര്‍. നിലവില്‍, അയ്യരുടെ അഭാവം ടീമിന് വലിയ തിരിച്ചടിയാണ്. വലംകയ്യന്‍ ബാറ്ററുടെ അഭാവത്തില്‍ നിരവധി പേരെ നാലാം നമ്പറില്‍ പരീക്ഷിച്ചിട്ടും യഥാർഥ പകരക്കാരനെ ഇതുവരെയും കണ്ടെത്താന്‍ ടീം മാനേജ്‌മെന്‍റിന് സാധിച്ചിട്ടില്ല.
സഞ്ജു സാംസണ്‍ (Sanju Samson), ഇഷാന്‍ കിഷന്‍ (Ishan Kishan), സൂര്യകുമാർ യാദവ് എന്നിവരുള്‍പ്പടെ നിരവധി താരങ്ങള്‍ കഴിഞ്ഞ പരമ്പരകളില്‍ നാലാം നമ്പറില്‍ ടീം ഇന്ത്യയ്‌ക്കായി ബാറ്റ് ചെയ്യാന്‍ എത്തിയെങ്കിലും ഇവരാര്‍ക്കും തന്നെ മികവ് പുലര്‍ത്താനായിരുന്നില്ല. ഇത്തരമൊരു സാഹചര്യത്തിലാണ് ശ്രേയസ് അയ്യരുടെ അഭാവത്തില്‍ നാലാം നമ്പറില്‍ ആര് ബാറ്റ് ചെയ്യണമെന്ന അഭിപ്രായവുമായി മുന്‍ താരവും ബിസിസിഐ (BCCI) പ്രസിഡന്‍റുമായിരുന്ന സൗരവ് ഗാംഗുലി (Sourav Ganguly) രംഗത്തെത്തിയത്. വിന്‍ഡീസ് പര്യടനത്തിലൂടെ അന്താരാഷ്‌ട്ര ക്രിക്കറ്റില്‍ അരങ്ങേറിയ തിലക് വര്‍മയെ ഇന്ത്യയുടെ നാലാം നമ്പറില്‍ കളിപ്പിക്കണമെന്നാണ് ഗാംഗുലിയുടെ വാദം.
ശ്രേയസിന് പകരം തിലക്: 'നാലാം നമ്പറില്‍ കളിപ്പിക്കാന്‍ പറ്റിയ താരങ്ങള്‍ നമുക്ക് ഇല്ലെന്ന് എങ്ങനെ പറയും. ആ പൊസിഷനില്‍ മികവ് കാട്ടാന്‍ സാധിക്കുന്ന നിരവധി പേരുണ്ട്. ഞാന്‍ എപ്പോഴും വ്യത്യസ്തമായ ചിന്താഗതിയുള്ള ഒരു വ്യക്തിയാണ്.
ഒന്നാന്തരമായൊരു ടീം നമുക്കുണ്ട്, എന്‍റെ അഭിപ്രായത്തില്‍ ഇടംകയ്യന്‍ തിലക് വര്‍മ നാലാം നമ്പറില്‍ ഇന്ത്യയ്‌ക്ക് വേണ്ടി ബാറ്റ് ചെയ്യണം. പരിചയസമ്പത്ത് ഇല്ലെങ്കിലും മികവുറ്റ ഒരു യുവതാരമാണ് തിലക് വര്‍മ. പേടിയില്ലാതെയാണ് അവന്‍ കളിക്കാനിറങ്ങുന്നത്. പരിചയസമ്പന്നരായ താരങ്ങള്‍ക്കൊപ്പം ഇത്തരത്തില്‍ പേടി കൂടാതെ ബാറ്റ് വീശാന്‍ കെല്‍പ്പുള്ള താരങ്ങളും ഉള്ളതുകൊണ്ട് തന്നെ ടീം ഇന്ത്യ മികച്ചതാണ്.
പരിശീലകന്‍ രാഹുല്‍ ദ്രാവിഡിനും (Rahul Dravid) ക്യാപ്‌റ്റന്‍ രോഹിത് ശര്‍മയ്‌ക്കും (Rohit Sharma) സെലക്ഷന്‍ കമ്മിറ്റിക്കും വലിയ വെല്ലുവിളിയുണ്ടാകാന്‍ വഴിയില്ല. കൃത്യമായൊരു പ്ലെയിങ് ഇലവനെ തെരഞ്ഞെടുക്കുക എന്നത് മാത്രമായിരിക്കും അവര്‍ ചെയ്യേണ്ടത്' സൗരവ് ഗാംഗുലി പറഞ്ഞു.
Also Read : Tilak Varma | 'ഗോള്‍ഡന്‍ ഡക്ക്...' വിന്‍ഡീസില്‍ തകര്‍ത്ത തിലക് വര്‍മ്മയെ പൂട്ടി അയര്‍ലന്‍ഡ്
