കാസർകോട്: കൊവിഡ് അതിജീവനത്തിന്‍റെ കാലമാണ്. അതിനിടയിലേക്ക് 'ജീവനം' എന്ന കൊച്ചു സിനിമ കൂടിയെത്തുമ്പോള്‍ പ്രത്യേകതയും ഏറെയാണ്. ആറാം ക്ലാസുകാരിയാണ് ഈ സിനിമക്ക് പിന്നിലെന്നറിയുമ്പോഴാണ് കൗതുകം. കഥ, തിരക്കഥ, സംഭാഷണം, സംവിധാനം എന്നിവക്ക് പുറമെ അഭിനയിക്കുന്നതും ധനലക്ഷ്മി സി. ബിനോയിയെന്ന കൊച്ചു മിടുക്കിയാണ്.
കൊവിഡ് പശ്ചാത്തലത്തിലുള്ള കഥയാണ് ഹ്രസ്വചിത്രത്തിൽ ധനലക്ഷ്മി അവതരിപ്പിച്ചിട്ടുള്ളത്. ധനലക്ഷ്മി മാത്രമാണ് ചിത്രത്തിൽ അഭിനയിച്ചിട്ടുള്ളതും. ശബ്ദങ്ങളിലൂടെ മാത്രം മറ്റു കഥാപാത്രങ്ങള്‍ ലഘുചിത്രത്തിന്‍റെ ഭാഗമാകുന്നുണ്ട്. കൊവിഡിന്‍റെ വരവും അത് ജീവിതത്തിലുണ്ടാക്കുന്ന മാറ്റവുമാണ് ജീവനം എന്ന ചിത്രത്തിന്‍റെ പ്രമേയം. ഓരോ തലമുറകളില്‍പെട്ടവർക്കും കൊവിഡ് എങ്ങനെ അനുഭവപ്പെട്ടെന്നും സര്‍ക്കാര്‍ നിര്‍ദേശങ്ങള്‍ പാലിക്കാതെയുള്ള പ്രവൃത്തികള്‍ വരുത്തിവെക്കുന്ന ദുരന്തവും ജീവനം പ്രേക്ഷകര്‍ക്ക് മുന്നിലെത്തിക്കുന്നു.
വലിയപൊയില്‍ നാലിലാംകണ്ടം ജിയുപി സ്‌കൂളിലെ ആറാം തരം വിദ്യാർഥിനിയാണ് ധനലക്ഷ്മി. ധനലക്ഷ്മിയുടെ അമ്മുമ്മ ഭാര്‍ഗവി, അമ്മ സജ്‌ന എന്നിവരാണ് സിനിമയുടെ മറ്റു കഥാപാത്രങ്ങളുടെ ശബ്‌ദമാകുന്നത്.
സംവിധായകന്‍ ഫാറൂഖ് അബ്ദുല്‍ റഹ്മാന്‍ ഹ്രസ്വചിത്രം പ്രകാശനം ചെയ്തു. കൊവിഡിനെ അകറ്റാന്‍ സാമൂഹ്യ അകലം പാലിക്കാനും, മാസ്‌ക് ധരിക്കാനും, കൈകള്‍ ഇടയ്ക്കിടെ വൃത്തിയാക്കാനും ഓർമപ്പെടുത്തിയാണ് ജീവനം എന്ന കൊച്ചു സിനിമ അവസാനിക്കുന്നത്. നേരത്തെ അസുഖബാധിതയായ കുഞ്ഞനുജത്തിയുടെ അകാലത്തിലുള്ള മരണം ഉണ്ടാക്കിയ വേദനയില്‍ ധനലക്ഷ്മി സ്വന്തമായി എഴുതി ആലപിച്ച് അവതരിപ്പിച്ച വീഡിയോ ആല്‍ബവും ശ്രദ്ധേയമായിരുന്നു.
