ನವದೆಹಲಿ: ದೇಶೀಯ ಸ್ಮಾರ್ಟ್ ಫೋನ್ ಬ್ರಾಂಡ್ ಲಾವಾ ಮಂಗಳವಾರ ತನ್ನ ಹೊಸ ಸ್ಮಾರ್ಟ್ ಫೋನ್ ಬ್ಲೇಜ್ ಕರ್ವ್ 5 ಜಿ (Blaze Curve 5G) ಬಿಡುಗಡೆ ಮಾಡಿದೆ. ಇದು 64 ಎಂಪಿ ಕ್ಯಾಮೆರಾ ಮತ್ತು 6.67 ಇಂಚಿನ 120 ಹೆರ್ಟ್ಜ್ 3 ಡಿ ಕರ್ವ್ಡ್ ಅಲ್ಮೋಡ್ ಡಿಸ್ ಪ್ಲೇ ಹೊಂದಿರುವ ಲಾವಾದ ಅತ್ಯಾಧುನಿಕ ಸ್ಮಾರ್ಟ್ ಫೋನ್ ಇದಾಗಿದೆ.
ಬ್ಲೇಜ್ ಕರ್ವ್ 5 ಜಿ ಇದು 17,999 ರೂ.ಗಳ ಆರಂಭಿಕ ಬೆಲೆಯಲ್ಲಿ ಲಭ್ಯವಾಗಲಿದ್ದು, ಐರನ್ ಗ್ಲಾಸ್ ಮತ್ತು ವಿರಿಡಿಯನ್ ಗ್ಲಾಸ್ ಎಂಬ ಎರಡು ಬಣ್ಣಗಳಲ್ಲಿ ಸಿಗಲಿದೆ. ಮಾರ್ಚ್ 11 ರಿಂದ ಅಮೆಜಾನ್ ಡಾಟ್ ಇನ್, ಲಾವಾ ಇ- ಸ್ಟೋ ರ್ ಮತ್ತು ಲಾವಾ ರಿಟೇಲ್ ನೆಟ್ವರ್ಕ್ ಮಳಿಗೆಗಳಲ್ಲಿ ಹೊಸ ಸ್ಮಾರ್ಟ್ಫೋನ್ ಖರೀದಿಗೆ ಲಭ್ಯ ಇರುತ್ತದೆ.
"20 ಸಾವಿರ ರೂಪಾಯಿಗಿಂತ ಕಡಿಮೆ ಬೆಲೆ ಶ್ರೇಣಿಯ ಫೋನ್ ಖರೀದಿಸಬಯಸುವ ಭಾರತೀಯ ಗ್ರಾಹಕರ ಆಕಾಂಕ್ಷೆಗಳನ್ನು ಪೂರೈಸಲು ಈ ಸ್ಮಾರ್ಟ್ಫೋನ್ ತಯಾರಿಸಲಾಗಿದೆ. ಬ್ಲೇಜ್ ಸರಣಿಯೊಂದಿಗೆ ಗ್ರಾಹಕರಿಗೆ ವಿಶ್ವದರ್ಜೆಯ ಅನುಭವ ಒದಗಿಸುವುದು ನಮ್ಮ ಗುರಿಯಾಗಿದೆ" ಎಂದು ಲಾವಾ ಇಂಟರ್ ನ್ಯಾಷನಲ್ ವ್ಯವಸ್ಥಾಪಕ ನಿರ್ದೇಶಕ ಸುನಿಲ್ ರೈನಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಈ ಸ್ಮಾರ್ಟ್ ಫೋನ್ ಮೀಡಿಯಾಟೆಕ್ ಡೈಮೆನ್ಸಿಟಿ 7050 ಪ್ರೊಸೆಸರ್, 8 ಜಿಬಿ ರಾಮ್ ಮತ್ತು 128 / 256 ಜಿಬಿ ರೋಮ್ ಹೊಂದಿದೆ. ಕಂಪನಿಯ ಪ್ರಕಾರ, ಇದು ಪ್ರೀಮಿಯಂ ಎಜಿ ಗ್ಲಾಸ್ ಬ್ಯಾಕ್ ವಿನ್ಯಾಸ ಮತ್ತು ಇಐಎಸ್ ಬೆಂಬಲದೊಂದಿಗೆ 64 ಎಂಪಿ ಪ್ರಾಥಮಿಕ ಹಿಂಭಾಗದ ಕ್ಯಾಮೆರಾ (ಸೋನಿ ಸೆನ್ಸಾರ್) ಜೊತೆಗೆ 8 ಎಂಪಿ ಅಲ್ಟ್ರಾವೈಡ್ ಮತ್ತು 2 ಎಂಪಿ ಮ್ಯಾಕ್ರೋ ಎಲ್ಇಡಿ ಫ್ಲ್ಯಾಶ್ ಹೊಂದಿದೆ.
ಈ ಸಾಧನವು 32 ಎಂಪಿ ಮುಂಭಾಗದ ಕ್ಯಾಮೆರಾ ಹೊಂದಿದ್ದು, ಉತ್ತಮ ಗುಣಮಟ್ಟದ ಸೆಲ್ಫಿಗಳನ್ನು ಸೆರೆಹಿಡಿಯಬಹುದಾಗಿದೆ. ಇದು 5000 ಎಂಎಎಚ್ ಬ್ಯಾಟರಿ ಹೊಂದಿದ್ದು, 33 ವ್ಯಾಟ್ ಚಾರ್ಜರ್ ನೊಂದಿಗೆ ಫಾಸ್ಟ್ ಚಾರ್ಜಿಂಗ್ ಬೆಂಬಲಿಸುತ್ತದೆ.
ಲಾವಾ ಇಂಟರ್ ನ್ಯಾಷನಲ್ ಇದು ಮೊಬೈಲ್ ಮತ್ತು ಟ್ಯಾಬ್ಲೆಟ್ಗಳನ್ನು ಉತ್ಪಾದಿಸುವ ಭಾರತೀಯ ಕಂಪನಿಯಾಗಿದೆ. ಇದನ್ನು 2009 ರಲ್ಲಿ ಆರಂಭವಾಯಿತು. ಕಂಪನಿಯು ಕೈಗೆಟುಕುವ ಬೆಲೆಯ ಹ್ಯಾಂಡ್ಸೆಟ್ಗಳು, ಸ್ಮಾರ್ಟ್ ಫೋನ್ಗಳು ಮತ್ತು ಟ್ಯಾಬ್ಲೆಟ್ಗಳನ್ನು ತಯಾರಿಸುತ್ತಿದೆ. ಭಾರತದ ಹೊರತಾಗಿ, ಕಂಪನಿಯು ಆಫ್ರಿಕಾದಲ್ಲಿಯೂ ಕಾರ್ಯಾಚರಣೆಗಳನ್ನು ಹೊಂದಿದೆ. ಕಂಪನಿಯು ಝೋಲೊ ಎಂಬ ಪ್ರತ್ಯೇಕ ಬ್ರಾಂಡ್ ಅನ್ನು ಬಿಡುಗಡೆ ಮಾಡಿದೆ. ಇದು ಆಂಡ್ರಾಯ್ಡ್ ಸ್ಮಾರ್ಟ್ ಫೋನ್ಗಳನ್ನು ಉತ್ಪಾದಿಸುತ್ತದೆ.
ಇದನ್ನೂ ಓದಿ : ಪ್ರಾಬಲ್ಯದ ದುರುಪಯೋಗ: ಆ್ಯಪಲ್ಗೆ $2 ಬಿಲಿಯನ್ ಡಾಲರ್ ದಂಡ
