ಬೆಂಗಳೂರು: ಇಲ್ಲಿನ ಎಂ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಮಹಿಳಾ ಪ್ರೀಮಿಯರ್ ಲೀಗ್ನ ಉದ್ಘಾಟನಾ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಕೊನೆಯ ಎಸೆತದಲ್ಲಿ ಸಿಕ್ಸರ್ ಸಿಡಿಸಿದ ಎಸ್ ಸಂಜನಾ ಮುಂಬೈ ಇಂಡಿಯನ್ಸ್ಗೆ 4 ವಿಕೆಟ್ ರೋಚಕ ಜಯ ತಂದಿತ್ತರು. 172 ರನ್ ಗುರಿ ಬೆನ್ನಟ್ಟಿದ ಹಾಲಿ ಚಾಂಪಿಯನ್ಸ್ ಮುಂಬೈ ತಂಡ ಟೂರ್ನಿಯಲ್ಲಿ ಗೆಲುವಿನ ಆರಂಭ ಪಡೆಯಿತು.
ಟಾಸ್ ಗೆದ್ದ ಮುಂಬೈ ಇಂಡಿಯನ್ಸ್ ನಾಯಕಿ ಹರ್ಮನ್ ಪ್ರೀತ್ ಕೌರ್ ಮೊದಲು ಬೌಲಿಂಗ್ ಮಾಡುವ ನಿರ್ಧಾರ ಕೈಗೊಂಡರು. ಬ್ಯಾಟಿಂಗ್ಗಿಳಿದ ಡೆಲ್ಲಿ ಕ್ಯಾಪಿಟಲ್ಸ್ ಮೂರು ರನ್ ಆಗುವಷ್ಟರಲ್ಲೇ ಶಫಾಲಿ ವರ್ಮಾ (1) ವಿಕೆಟ್ ಕಳೆದುಕೊಂಡಿತು. ಬಳಿಕ ನಾಯಕಿ ಲ್ಯಾನ್ನಿಂಗ್ (31) ಹಾಗೂ ಅರ್ಧಶತಕ ಬಾರಿಸಿದ ಆಲಿಸ್ ಕ್ಯಾಪ್ಸಿ (75) ತಂಡಕ್ಕೆ ಆಸರೆಯಾದರು. ಬಳಿಕ ಅಂತಿಮ ಓವರ್ಗಳಲ್ಲಿ ಬಿರುಸಿನ ಬ್ಯಾಟಿಂಗ್ ನಡೆಸಿದ ಜೆಪಿಮಾ ರೋಡ್ರಿಗಸ್ 42 (24 ಎಸೆತ) ಹಾಗೂ ಮರಿಜಾನ್ನೆ ಕಪ್ (16, 9 ಎಸೆತ) ತಂಡದ ಮೊತ್ತವನ್ನು ಹಿಗ್ಗಿಸಿದರು. ಅಂತಿಮವಾಗಿ ಡೆಲ್ಲಿ ತಂಡ 20 ಓವರ್ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 171 ರನ್ ಕಲೆ ಹಾಕಿತ್ತು.
ಮುಂಬೈಗೆ ಯಸ್ತಿಕಾ, ಕೌರ್ ಬಲ: 172 ರನ್ ಗುರಿ ಬೆನ್ನಟ್ಟಿದ ಮುಂಬೈ ಇಂಡಿಯನ್ಸ್ಗೆ ಎರಡನೇ ಎಸೆತದಲ್ಲೇ ಹೇಲಿ ಮ್ಯಾಥ್ಯೂಸ್ ಔಟಾಗುವ ಮೂಲಕ ಆಘಾತ ಎದುರಾಯಿತು. ಬಳಿಕ ವಿಕೆಟ್ ಕೀಪಿಂಗ್ ಬ್ಯಾಟರ್ ಯಶ್ತಿಕಾ ಭಾಟಿಯಾ (57) ಅರ್ಧಶತಕ ಬಾರಿಸಿ ಆಸರೆಯಾದರು. ಇವರಿಗೆ 19 ರನ್ ಗಳಿಸಿದ ನ್ಯಾಟ್ ಸ್ಕಿವರ್ - ಬ್ರಂಟ್ ಉತ್ತಮ ಸಾಥ್ ನೀಡಿದರು. ಬಳಿಕ ಕ್ರೀಸ್ಗೆ ಬಂದ ನಾಯಕಿ ಹರ್ಮನ್ ಭರ್ಜರಿ ಅರ್ಧಶತಕ (55, 34 ಎಸೆತ) ದಾಖಲಿಸಿ ತಂಡವನ್ನು ಗೆಲುವಿನ ಸಮೀಪ ಕೊಂಡೊಯ್ದರು.
ಈ ನಡುವೆ ಅಮೆಲಿಯಾ ಕೆರ್ 24 ರನ್ ಗಳಿಸಿ ನಾಯಕಿಗೆ ತಕ್ಕ ಸಾಥ್ ನೀಡಿದ್ದರು. ಆದರೆ, ಕೆರ್ ವಿಕೆಟ್ ಪತನದ ಬಳಿಕ ಬಂದ ಪೂಜಾ ವಸ್ತ್ರೇಕರ್ ಕೇವಲ 1 ರನ್ಗೆ ಔಟಾದರು. ಆಗ ಕ್ಯಾಪ್ಸಿ ಎಸೆದ ಅಂತಿಮ ಓವರ್ನಲ್ಲಿ ಗೆಲುವಿಗೆ 12 ರನ್ ಅಗತ್ಯವಿತ್ತು. ತದನಂತರ 3 ಬಾಲ್ಗೆ 9 ರನ್ ಬೇಕಿದ್ದಾಗ ಬೌಂಡರಿ ಬಾರಿಸಿದ ಹರ್ಮನ್ ಕೌರ್ ಗೆಲುವಿನ ಅಂತರವನ್ನು 2 ಎಸೆತಗಳಲ್ಲಿ 5 ರನ್ಗೆ ತಂದರು. ಆದರೆ, 5ನೇ ಎಸೆತದಲ್ಲಿ ಕ್ಯಾಚ್ ನೀಡಿ ಅವರು ಹೊರ ನಡೆದರು.
ಇದರಿಂದ ಪಂದ್ಯವು ಮತ್ತಷ್ಟು ರೋಚಕ ಅಂತ್ಯಕ್ಕೆ ತಲುಪಿತು. ಕೊನೆಯ ಎಸೆತದಲ್ಲಿ 5 ರನ್ ಅಗತ್ಯವಿದ್ದಾಗ ಕ್ರೀಸ್ಗೆ ಬಂದ ಎಸ್ ಸಂಜನಾ ಕ್ರೀಸ್ನಿಂದ ಮುಂದೆ ಬಂದು ಲಾಂಗ್ ಆನ್ನತ್ತ ಭರ್ಜರಿ ಸಿಕ್ಸರ್ ಬಾರಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. 4 ವಿಕೆಟ್ ಜಯ ಸಾಧಿಸಿದ ಮುಂಬೈ ಶುಭಾರಭ ಮಾಡಿದೆ. ಇಂದಿನ (ಶನಿವಾರ) ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಹಾಗೂ ಯುಪಿ ವಾರಿಯರ್ಸ್ ತಂಡಗಳು ಮುಖಾಮುಖಿಯಾಗಲಿವೆ.
ಇದನ್ನೂ ಓದಿ: ಇಂಗ್ಲೆಂಡ್ ವಿರುದ್ಧ 100 ಟೆಸ್ಟ್ ವಿಕೆಟ್: ದಾಖಲೆ ಬರೆದ ಆರ್ ಅಶ್ವಿನ್
