ಹೈದರಾಬಾದ್: ಇಲ್ಲಿನ ಉಪ್ಪಲ್ನಲ್ಲಿ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಇಂದು ಇಂಡಿಯನ್ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಟೂರ್ನಿಯ 18ನೇ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ಸನ್ರೈಸರ್ಸ್ ಹೈದರಾಬಾದ್ ತಂಡಗಳು ಮುಖಾಮುಖಿಯಾಗಲಿವೆ. ಆದರೆ, ಪಂದ್ಯದ ಆರಂಭಕ್ಕೂ ಮುನ್ನವೇ ಹೈದರಾಬಾದ್ ಕ್ರಿಕೆಟ್ ಸಂಸ್ಥೆಗೆ ತೆಲಂಗಾಣ ರಾಜ್ಯ ದಕ್ಷಿಣ ವಿದ್ಯುತ್ ವಿತರಣಾ ಕಂಪನಿ ಲಿಮಿಟೆಡ್ (TSSPDCL) ಶಾಕ್ ನೀಡಿದೆ. ಬಿಲ್ ಪಾವತಿ ಬಾಕಿ ಉಳಿಸಿಕೊಂಡ ಹಿನ್ನೆಲೆಯಲ್ಲಿ ರಾಜೀವ್ ಗಾಂಧಿ ಕ್ರೀಡಾಂಗಣದ ವಿದ್ಯುತ್ ಸಂಪರ್ಕ್ ಕಡಿತಗೊಳಿಸಲಾಗಿದೆ.
ಹೈದರಾಬಾದ್ ಕ್ರಿಕೆಟ್ ಸಂಸ್ಥೆಯು (HCA) 1.63 ಕೋಟಿ ವಿದ್ಯುತ್ ಬಿಲ್ ಪಾವತಿಸದೇ ಬಾಕಿ ಇಟ್ಟುಕೊಂಡಿದೆ. ಈ ಹಿನ್ನೆಲೆಯಲ್ಲಿ ಟಿಎಸ್‌ಎಸ್‌ಪಿಡಿಸಿಎಲ್ ಫೆಬ್ರವರಿ 20 ರಂದು ನೋಟಿಸ್ ಜಾರಿ ಮಾಡಿತ್ತು. ಆದರೆ, ನೋಟಿಸ್‌ಗೆ ಕ್ರಿಕೆಟ್ ಸಂಸ್ಥೆ ಕಡೆಯಿಂದ ಯಾವುದೇ ಪ್ರತಿಕ್ರಿಯೆ ಬಂದಿರಲಿಲ್ಲ. ಇದರಿಂದ ಕ್ರಮಕ್ಕೆ ಮುಂದಾದ ಅಧಿಕಾರಿಗಳು, ಮೈದಾನದ ವಿದ್ಯುತ್ ಸಂಪರ್ಕ ಕಟ್ ಮಾಡಿದ್ದಾರೆ.
ಐಪಿಎಲ್ ಕ್ರಿಕೆಟ್ ಪಂದ್ಯಕ್ಕೂ ಮುನ್ನಾ ದಿನವೇ ಈ ಕ್ರಮ ಕೈಗೊಳ್ಳಲಾಗಿದೆ. ಹೆಚ್‌ಸಿಎ ಆಸ್ತಿ ತೆರಿಗೆಯನ್ನೂ ಪಾವತಿಸುತ್ತಿಲ್ಲ. ಕ್ರೀಡಾಂಗಣವು ಉಪ್ಪಲ್ ಐಡಿಎ ಅಡಿಯಲ್ಲಿದ್ದು, ಹೆಚ್‌ಸಿಎಯು ಐಎಲ್ಎಗೆ ಸುಮಾರು 33 ಕೋಟಿ ರೂ. ಆಸ್ತಿ ತೆರಿಗೆ ಪಾವತಿಸಬೇಕಾಗಿದೆ. ಅದರಲ್ಲಿ ಐಎಲ್ಎ ಕಡೆಯಿಂದ ಹೈದರಾಬಾದ್ ಮಹಾನಗರ ಪಾಲಿಕೆಗೆ (ಜಿಹೆಚ್ಎಂಸಿ) 11 ಕೋಟಿ ರೂ.ವರೆಗೆ ಬರಬೇಕು ಎಂದು ಉಪ್ಪಲ್ ಡಿಸಿ ಆಂಜನೇಯು ತಿಳಿಸಿದ್ದಾರೆ.
ಪವರ್ ಕಟ್ ಆಗಿದ್ದರಿಂದ ಎರಡು ತಂಡಗಳ ಅಭ್ಯಾಸವು ಕೆಲಕಾಲ ಜನರೇಟರ್‌ಗಳಿಂದ ಚಾಲಿತ ದೀಪಗಳ ಅಡಿ ನಡೆಯಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಅಲ್ಪಾವಧಿಗೆ ಮಾತ್ರ ವಿದ್ಯುತ್ ಸಂಪರ್ಕ ಕಡಿತಗೊಳಿಸಲಾಗಿತ್ತು ಎಂದು ಹೆಚ್‌ಸಿಎ ಮೂಲಗಳು ತಿಳಿಸಿವೆ. ಬಳಿಕ ಗುರುವಾರ ರಾತ್ರಿ ವೇಳೆಗೆ ವಿದ್ಯುತ್ ಸಂಪರ್ಕವನ್ನು ಮರಳಿ ನೀಡಲಾಗಿದೆ. ಹೀಗಾಗಿ, ಇಂದು ನಡೆಯುವ ಪಂದ್ಯಕ್ಕೆ ಯಾವುದೇ ಅಡ್ಡಿ ಇಲ್ಲ.
ಪಂದ್ಯಕ್ಕೆ ವಿಶೇಷ ಬಸ್ ವ್ಯವಸ್ಥೆ: ಉಪ್ಪಲ್ ಕ್ರೀಡಾಂಗಣದಲ್ಲಿ ಇಂದು ನಡೆಯಲಿರುವ ಐಪಿಎಲ್ ಪಂದ್ಯಕ್ಕೆ ಹೆಚ್ಚುವರಿ ಬಸ್ ಸಂಚಾರ ವ್ಯವಸ್ಥೆ ಮಾಡಲಾಗಿದೆ. ಸಂಜೆ 6 ರಿಂದ ರಾತ್ರಿ 11.30 ರವರೆಗೆ ವಿವಿಧ ಕಡೆಗಳಿಂದ ಸುಮಾರು 60 ಬಸ್ಗಳು ಸಂಚರಿಸಲಿವೆ ಎಂದು ಟಿಎಸ್ಆರ್ಟಿಸಿ ಪ್ರಕಟಿಸಿದೆ.
ಪಂದ್ಯವು ಎಂದಿನಂತೆ ಸಾಯಂಕಾಲ 7.30ಕ್ಕೆ ಆರಂಭವಾಗಲಿದೆ. ಎರಡೂ ತಂಡಗಳು ತಲಾ ಮೂರು ಪಂದ್ಯಗಳನ್ನು ಆಡಿದ್ದು, ಚೆನ್ನೈ ಸೂಪರ್ ಕಿಂಗ್ಸ್ 2ರಲ್ಲಿ ಗೆದ್ದು ಒಂದು ಹಣಾಹಣಿ ಸೋತರೆ, ಸನ್ರೈಸರ್ಸ್ ಹೈದರಾಬಾದ್ ಕೇವಲ 1ರಲ್ಲಿ ಜಯ ಸಾಧಿಸಿ, 2ರಲ್ಲಿ ಸೋಲು ಕಂಡಿದೆ.
ಇದನ್ನೂ ಓದಿ: ಶಶಾಂಕ್, ಅಶುತೋಷ್ ನೆರವಿನಿಂದ ಗುಜರಾತ್ ವಿರುದ್ಧ ಗೆದ್ದು ಬೀಗಿದ ಪಂಜಾಬ್
