ಹೈದರಾಬಾದ್: ಪ್ಲೇಆಫ್ ಸ್ಥಾನ ಭದ್ರ ಮಾಡಿಕೊಳ್ಳುವ ತವಕದಲ್ಲಿರುವ ಸನ್ರೈಸರ್ಸ್ ಹೈದರಾಬಾದ್ ತಂಡಕ್ಕೆ ವರುಣರಾಯ ತುಸು ಅಡ್ಡಿ ಉಂಟು ಮಾಡಿದ್ದಾನೆ. ನೈಋತ್ಯ ಮಾನ್ಸೂನ್ ಅಬ್ಬರದಿಂದಾಗಿ ಹೈದರಾಬಾದ್ನಲ್ಲಿ ಭಾರಿ ಮಳೆಯಾಗುತ್ತಿದೆ. ಇದರಿಂದ ಗುಜರಾತ್ ಟೈಟಾನ್ಸ್ ಎದುರಿನ ಪಂದ್ಯಕ್ಕೆ ಅಡ್ಡಿಯಾಗಿದೆ.
ಸಂಜೆ 7.30 ಕ್ಕೆ ಆರಂಭವಾಗಬೇಕಿದ್ದ ಪಂದ್ಯ ಮಳೆಯಿಂದಾಗಿ ತಡವಾಗುತ್ತಿದೆ. ಸಂಜೆಯಿಂದಲೂ ಮಳೆ ಸುರಿಯುತ್ತಿದ್ದ ಕಾರಣ, ಟಾಸ್ ವಿಳಂಬವಾಯಿತು. 7.45ಕ್ಕೆ ಮಳೆ ನಿಂತ ಬಳಿಕ 8 ಗಂಟೆಗೆ ಟಾಸ್ ಮಾಡುವ ಬಗ್ಗೆ ಮಾಹಿತಿ ಬಂದಿತು. ಆದರೆ, ಮತ್ತೆ ಸಣ್ಣದಾಗಿ ಮಳೆ ಆರಂಭವಾಗಿದ್ದು, ಟಾಸ್ ಮತ್ತಷ್ಟು ವಿಳಂಬವಾಗಲಿದೆ. ಪಂದ್ಯ ಒಂದು ಗಂಟೆಗೂ ಅಧಿಕ ವಿಳಂಬವಾದಲ್ಲಿ ಓವರ್ ಕಡಿತವಾಗಲಿದೆ. ಮೈದಾನವನ್ನು ಕವರ್ಗಳಿಂದ ಮುಚ್ಚಲಾಗಿದೆ.
ಪಂದ್ಯ ರದ್ದಾದರೆ ಏನಾಗುತ್ತೆ: ಮಳೆಯಿಂದ ಪಂದ್ಯ ರದ್ದಾದರೂ ಹೈದರಾಬಾದ್ ತಂಡಕ್ಕೆ ಯಾವುದೇ ಸಮಸ್ಯೆ ಇಲ್ಲ. ಆಡಿರುವ 12 ಪಂದ್ಯಗಳಿಂದ 7 ಗೆಲುವಿನೊಂದಿಗೆ 14 ಪಾಯಿಂಟ್ಸ್ ಹೊಂದಿರುವ ಹೈದರಾಬಾದ್ ಪ್ಲೇಆಫ್ಗೆ ಅಧಿಕೃತವಾಗಿ ಎಂಟ್ರಿ ಪಡೆಯಲು ಇನ್ನೊಂದು ಗೆಲುವು ಬಾಕಿ ಇದೆ. ಉಳಿದ ಎರಡು ಪಂದ್ಯಗಳಲ್ಲಿ ಒಂದು ಗೆದ್ದರೂ ಸಾಕು.
ಗುಜರಾತ್ ವಿರುದ್ಧದ ಇಂದಿನ ಪಂದ್ಯ ಮಳೆಯಿಂದಾಗಿ ರದ್ದಾದರೆ, ಇತ್ತಂಡಗಳಿಗೆ ತಲಾ 1 ಅಂಕ ಹಂಚಿಕೆ ಮಾಡಲಾಗುತ್ತದೆ. ಇದರಿಂದ ಹೈದರಾಬಾದ್ ನೇರವಾಗಿ ಪ್ಲೇಆಫ್ಗೇರಲಿದೆ. ಈಗಾಗಲೇ ಟೂರ್ನಿಯಿಂದ ಹೊರಬಿದ್ದಿರುವ ಗುಜರಾತ್ ತಂಡ ಯಾವುದೇ ಫಲಿತಾಂಶವಿಲ್ಲದೇ, 2024 ರ ಆವೃತ್ತಿಗೆ ವಿದಾಯ ಹೇಳಲಿದೆ.
