ಕೋಲ್ಕತ್ತಾ: ಇಲ್ಲಿನ ಈಡನ್ ಗಾರ್ಡನ್ಸ್ ಮೈದಾನದಲ್ಲಿ ನಡೆಯುತ್ತಿರುವ ಐಪಿಎಲ್ 2024ರ 60ನೇ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡವು ಮುಂಬೈ ಇಂಡಿಯನ್ಸ್ಗೆ 158 ರನ್ ಗೆಲುವಿನ ಗುರಿ ನೀಡಿದೆ. ಆಟಕ್ಕೆ ಮಳೆ ಅಡ್ಡಿಪಡಿಸಿದ ಹಿನ್ನೆಲೆಯಲ್ಲಿ ಪಂದ್ಯವನ್ನು ತಲಾ 16 ಓವರ್ಗಳಿಗೆ ಸೀಮಿತಗೊಳಿಸಲಾಗಿದೆ.
ಟಾಸ್ ಗೆದ್ದ ಮುಂಬೈ ತಂಡ ನೈಟ್ ರೈಡರ್ಸ್ನ್ನು ಮೊದಲು ಬ್ಯಾಟಿಂಗ್ಗೆ ಆಹ್ವಾನಿಸಿತು. ಮೈದಾನಕ್ಕಿಳಿದ ಕೋಲ್ಕತ್ತಾ ಆರಂಭದಲ್ಲೇ ಆಘಾತ ಎದುರಿಸಿತು. ಕೇವಲ 10 ರನ್ ಗಳಿಸುವಷ್ಟರಲ್ಲೇ ಸ್ಫೋಟಕ ಆರಂಭಿಕರ ವಿಕೆಟ್ ಕಳೆದುಕೊಂಡಿತು. ಫಿಲಿಪ್ ಸಾಲ್ಟ್ 6 ರನ್ಗೆ ಔಟಾದರೆ, ಸುನೀಲ್ ನರೈನ್ ಶೂನ್ಯಕ್ಕೆ ಪೆವಿಲಿಯನ್ಗೆ ಮರಳಿದರು. ಇವರಿಬ್ಬರ ಬೆನ್ನಲ್ಲೇ ನಾಯಕ ಶ್ರೇಯಸ್ ಅಯ್ಯರ್ ಕೂಡ 7 ರನ್ಗೆ ಔಟಾದರು. 40 ರನ್ಗೆ ಮೂರು ವಿಕೆಟ್ ಪತನವಾಗಿದ್ದವು.
ಬಳಿಕ ಒಂದಾದ ವೆಂಕಟೇಶ್ ಅಯ್ಯರ್ (42) ಹಾಗೂ ನಿತೀಶ್ ರಾಣಾ (33) ಸಮಯೋಚಿತ ಬ್ಯಾಟಿಂಗ್ ಮೂಲಕ ತಂಡಕ್ಕೆ ಚೇತರಿಕೆ ನೀಡಿದರು. ತಂಡವು 77 ರನ್ ಗಳಿಸಿದ್ದಾಗ ವೆಂಕಟೇಶ್ ದೊಡ್ಡ ಹೊಡೆತಕ್ಕೆ ಯತ್ನಿಸಿ ವಿಕೆಟ್ ಕಳೆದುಕೊಂಡರು. ಬಳಿಕ ಬಂದ ಬಿಗ್ ಹಿಟ್ಟರ್ ಅಂಡ್ರೆ ರಸೆಲ್ 14 ಎಸೆತಗಳಲ್ಲಿ 24 ರನ್ ಬಾರಿಸಿ ತಂಡಕ್ಕೆ ನೆರವಾದರು.
ಕೊನೆಯಲ್ಲಿ ಫಿನಿಶರ್ ರಿಂಕು ಸಿಂಗ್ 12 ಎಸೆತಗಳಲ್ಲಿ 20 ಹಾಗೂ ರಮಣದೀಪ್ ಸಿಂಗ್ 8 ಬಾಲ್ಗಳಲ್ಲಿ ಅಜೇಯ 17 ರನ್ಗಳ ಅಬ್ಬರದ ಬ್ಯಾಟಿಂಗ್ ನೆರವಿನಿಂದ ನೈಟ್ ರೈಡರ್ಸ್ ತಂಡ ನಿಗದಿತ 16 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 157 ರನ್ ಬಾರಿಸಿದೆ. ಮುಂಬೈ ಇಂಡಿಯನ್ಸ್ ಪರ ಪಿಯೂಷ್ ಚಾವ್ಲಾ 28 ರನ್ಗೆ 2 ಹಾಗೂ ಬುಮ್ರಾ 39ಕ್ಕೆ 2 ವಿಕೆಟ್ ಕಬಳಿಸಿ ಯಶಸ್ವಿ ಬೌಲರ್ ಎನಿಸಿಕೊಂಡರು. ಇನ್ನುಳಿದಂತೆ ನುವಾನ್ ತುಷಾರಾ ಹಾಗೂ ಅನ್ಸುಲ್ ಕಂಬೋಜ್ ತಲಾ ಒಂದು ವಿಕೆಟ್ ಕಿತ್ತರು.
ಈಗಾಗಲೇ ಟೂರ್ನಿಯಿಂದ ಹೊರಬಿದ್ದಿರುವ ಮುಂಬೈ ಇಂಡಿಯನ್ಸ್ಗೆ ಇದೊಂದು ಔಪಚಾರಿಕ ಪಂದ್ಯವಾಗಿದೆ. ಇನ್ನೊಂದೆಡೆ, ಅಂಕ ಪಟ್ಟಿಯಲ್ಲಿ ಅಗ್ರ ಸ್ಥಾನದಲ್ಲಿರುವ ಕೋಲ್ಕತ್ತಾಗೆ ಪ್ಲೇ ಆಪ್ಗೆ ಲಗ್ಗೆ ಇಡಲು ಗೆಲುವು ಪ್ರಮುಖವಾಗಿದೆ.
