ಬೆಂಗಳೂರು: ಐಪಿಎಲ್ನ ಮಹತ್ವದ ಪಂದ್ಯದಲ್ಲಿಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಮುಖಾಮುಖಿಯಾಗಿವೆ. ಯಾವುದೇ ರೋಚಕ ಸಿನಿಮಾಗಿಂತ ಕಡಿಮೆ ಏನಿಲ್ಲದ ಕುತೂಹಲ ಹುಟ್ಟಿಸಿರುವ ಪಂದ್ಯಕ್ಕೆ ಅಭಿಮಾನಿಗಳ ಸಾಗರವೇ ಹರಿದು ಬಂದಿದೆ.
ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸೇರಿರುವ ಇತ್ತಂಡಗಳ ಅಭಿಮಾನಿಗಳು ತಮ್ಮ ಆಟಗಾರರನ್ನು ಚಿಯರ್ ಮಾಡುವಲ್ಲಿ ನಿರತರಾಗಿದ್ದಾರೆ. ಈ ಮಧ್ಯೆ ಕ್ರೀಡಾಂಗಣದ ಹೊರಗೆ ಸಿಕ್ಕ ಕೆಲ ಅಭಿಮಾನಿಗಳು ತಮ್ಮ ಖುಷಿಯನ್ನು ಹಂಚಿಕೊಂಡಿದ್ದು ಹೀಗಿದೆ.
ಆರ್ಸಿಬಿ ತಂಡದ ಅಭಿಮಾನಿಯಾದ ಬಾಲು ಅಯ್ಯರ್ ಅವರು ಮಾತನಾಡಿ, ನಾನು ಆರ್ಸಿಬಿಯ ದೊಡ್ಡ ಅಭಿಮಾನಿ. ತಂಡ ಪ್ಲೇಆಫ್ನಲ್ಲಿ ಸ್ಥಾನ ಪಡೆಯಬೇಕು ಎಂಬ ಆಸೆಯಿದೆ. ಇಂದಿನ ಪಂದ್ಯವನ್ನು ನೇರವಾಗಿ ವೀಕ್ಷಿಸಬೇಕು ಎಂದು 10 ಗೆಳೆಯರ ಜೊತೆಗೆ ಇಲ್ಲಿಗೆ ಬಂದಿದ್ದೇವೆ. ಬ್ಯಾಟಿಂಗ್ ಕಿಂಗ್ ವಿರಾಟ್ ಕೊಹ್ಲಿ ತಂಡವನ್ನು ಗೆಲ್ಲಿಸುವ ಆಟ ಆಡಲಿದ್ದಾರೆ ಎಂಬ ವಿಶ್ವಾಸವಿದೆ. ತಂಡ ನಾಲ್ಕರಲ್ಲಿ ಸ್ಥಾನ ಪಡೆದು ಮೊದಲ ಬಾರಿ ಐಪಿಎಲ್ ಪ್ರಶಸ್ತಿ ಗೆಲ್ಲಲಿದೆ ಎಂದ ಅದಮ್ಯ ಭರವಸೆ ಇದೆ ಎಂದರು.
ಬನಶಂಕರಿಯ ಚರಣ್ ಮಾತನಾಡಿ, ಆರ್ಸಿಬಿ ಸತತ 5 ಪಂದ್ಯ ಗೆಲ್ಲುವ ಮೂಲಕ ಉತ್ತಮ ಲಯದಲ್ಲಿದೆ. ಇದನ್ನು ಗಮನಿಸಿದರೆ ಭಾರಿ ಅಂತರದಿಂದ ಗೆಲ್ಲುವ ವಿಶ್ವಾಸವಿದೆ. ಈ ಪಂದ್ಯ ನೋಡಲೆಂದು ಕಳೆದ ವಾರದಿಂದ ಟಿಕೆಟ್ಗಾಗಿ ಪರದಾಡಬೇಕಾಯಿತು. ಕೊನೆಗೂ ಟಿಕೆಟ್ ಪಡೆದು ಇಲ್ಲಿಗೆ ಬಂದಿದ್ದೇನೆ. ಆರ್ಸಿಬಿಯ ಗೆಲುವಿಗಾಗಿ ಕಾಯುತ್ತಿದ್ದೇನೆ ಎಂದರು.
ವಿದ್ಯಾರ್ಥಿ ಪ್ರಣವ್ ಕ್ರೀಡಾಂಗಣದ ಹೊರಗೆ ತಮ್ಮ ಸಂತಸವನ್ನು ಹಂಚಿಕೊಂಡಿದ್ದು, ಚೆನ್ನೈ ನನ್ನ ನೆಚ್ಚಿನ ತಂಡ. ಇದೊಂದು ಹೈಸ್ಕೋರ್ ಮ್ಯಾಚ್ ಆಗಲಿದೆ. ಗೆಲ್ಲುವ ವಿಶ್ವಾಸವೂ ಇದೆ ಎಂದರು.
ಇವತ್ತು ನಮಗೆ ಅದೃಷ್ಟದ ದಿನ. ಆರ್ಸಿಬಿ ಭರ್ಜರಿ ಫಾರ್ಮ್ನಲ್ಲಿದೆ. ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಉತ್ತಮ ಪ್ರದರ್ಶನ ತೋರುತ್ತಿದೆ ಎಂದು ಮತ್ತೊಬ್ಬ ಕ್ರಿಕೆಟ್ ಅಭಿಮಾನಿ ಸ್ಯಾಮ್ ಅವರು ತಮ್ಮ ಅನಿಸಿಕೆ ವ್ಯಕ್ತಪಡಿಸಿದರು.
ಇಂದಿನ ಪಂದ್ಯ ನೋಡಲೆಂದೇ ಕಾರವಾರದ ಶಿರಸಿಯಿಂದ ಬೆಂಗಳೂರಿಗೆ ಬಂದ ರವಿ ಕೊಳೆಗಾರ ಮಾತನಾಡಿ, ಇದಿನ ಪಂದ್ಯದಲ್ಲಿ ಆರ್ಸಿಬಿ ಗೆಲ್ಲಲಿದೆ. ಮೇ 18 ಹೇಳಿ ಆರ್ಸಿಬಿಗೆ ಮಾಡಿಸಿದ ಪಂದ್ಯ. ನೀಡಿದ ಟಾರ್ಗೆಟ್ನಲ್ಲಿ ಪಂದ್ಯ ಮುಗಿಸುವ ವಿಶ್ವಾಸವಿದೆ. ಧೋನಿ ಅವರಿಗೆ ಒಳ್ಳೆಯ ರೀತಿಯಂದ ಬೀಳ್ಕೊಡುಗೆ ನೀಡುವುದು ಖಚಿತ. ವಿರಾಟ್ ಕೊಹ್ಲಿ ಈ ಪಂದ್ಯದಲ್ಲಿ ತಮ್ಮ ತಾಕತ್ತು ಮತ್ತೊಮ್ಮೆ ತೋರಿಸಲಿದ್ದಾರೆ ಎಂದರು.
