2ನೇ ಟೆಸ್ಟ್‌: 106 ರನ್‌ಗಳಿಂದ ಇಂಗ್ಲೆಂಡ್ ಮಣಿಸಿದ ಭಾರತ; 1-1ರಿಂದ ಸರಣಿ ಸಮ

ಇಂಗ್ಲೆಂಡ್​ ವಿರುದ್ಧದ 2ನೇ ಟೆಸ್ಟ್​ ಪಂದ್ಯದಲ್ಲಿ ಭಾರತ ಅಧಿಕಾರಯುತ ಗೆಲುವು ಸಾಧಿಸಿತು. ಐದು ಪಂದ್ಯಗಳ ಸರಣಿ 1-1 ರಲ್ಲಿ ಸಮಬಲವಾಯಿತು.

ವಿಶಾಖಪಟ್ಟಣಂ(ಆಂಧ್ರಪ್ರದೇಶ): ಭಾರತ 399 ರನ್​ಗಳ ಸವಾಲು ನೀಡಿದಾಗಲೇ ಅರ್ಧ ಸೋತಿದ್ದ ಇಂಗ್ಲೆಂಡ್​, ನಿರೀಕ್ಷೆಯಂತೆ 292 ರನ್​ಗಳಿಗೆ ಗಂಟುಮೂಟೆ ಕಟ್ಟುವ ಮೂಲಕ 2ನೇ ಟೆಸ್ಟ್​ ಪಂದ್ಯದಲ್ಲಿ 106 ರನ್​ಗಳ ಸೋಲು ಕಂಡಿತು. ಈ ಮೂಲಕ ಐದು ಪಂದ್ಯಗಳ ಟೆಸ್ಟ್​ ಸರಣಿಯನ್ನು ಭಾರತ 1-1ರಲ್ಲಿ ಸಮಬಲ ಸಾಧಿಸಿತು.

• A terrific Test match comes to an end in Vizag with #TeamIndia completing a 106-run win 👏👏
  
  Scorecard ▶️ https://t.co/X85JZGt0EV#INDvENG | @IDFCFIRSTBank pic.twitter.com/GSQJFN6n3A

  — BCCI (@BCCI) February 5, 2024

'ಬಾಜ್‌ಬಾಲ್‌'ಗೆ ಅಶ್ವಿನ್‌, ಬುಮ್ರಾ ಬಾಲ್ ಪ್ರತ್ಯಸ್ತ್ರ: ಆಂಧ್ರಪ್ರದೇಶದ ವಿಶಾಖಪಟ್ಟಣಂನ ವೈ.ಎಸ್.ರಾಜಶೇಖರ ರೆಡ್ಡಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಬಾಕಿ ಎರಡು ದಿನದಲ್ಲಿ ಗೆಲ್ಲಲು ಇಂಗ್ಲೆಂಡ್​ಗೆ 332 ರನ್ ಬೇಕಾಗಿತ್ತು. ಕೈಯಲ್ಲಿ 9 ವಿಕೆಟ್​ಗಳು ಇದ್ದವು. ತಾಳ್ಮೆಯ ಕ್ರಿಕೆಟ್​ ಮಾದರಿಯಾದ ಟೆಸ್ಟ್​ನಲ್ಲಿ ತಾನೇ ಪರಿಚಯಿಸಿರುವ 'ಬಾಜ್​ಬಾಲ್​' ತಂತ್ರದಿಂದ ಆಂಗ್ಲರು ಗೆಲುವಿನ ಆಸೆ ಹೊಂದಿದ್ದರು. ಆದರೆ, 1 ವಿಕೆಟ್​ಗೆ 67 ರನ್​ಗಳಿಂದ ನಾಲ್ಕನೇ ದಿನದಾಟ ಆರಂಭಿಸಿದ ಇಂಗ್ಲೆಂಡ್​ಗೆ ಹಿರಿಯ ಸ್ಪಿನ್​ ತಜ್ಞ ಆರ್​.ಅಶ್ವಿನ್​ ಮತ್ತು ಯಾರ್ಕರ್​ ಸ್ಪೆಷಲಿಸ್ಟ್​ ಜಸ್ಪ್ರೀತ್​ ಬೂಮ್ರಾ ಮತ್ತೆ ಮಾರಕವಾದರು.

'ನೈಟ್​ ವಾಚ್​ಮನ್'​ ಆಗಿ ಬಂದಿದ್ದ ರೆಹಾನ್​ ಅಹ್ಮದ್​ಗೆ (23) ಅಕ್ಷರ್​ ಪಟೇಲ್​ ಪೆವಿಲಿಯನ್​ಗೆ ಅಟ್ಟಿದರು. ಬಳಿಕ ಬಂದ ಓಲಿ ಪೋಪ್​ (23), ಜೋ ರೂಟ್‌ರನ್ನು (16) ಅಶ್ವಿನ್​ ತಮ್ಮ ಸ್ಪಿನ್​ ಅಸ್ತ್ರದಿಂದ ಕೆಡವಿದರು. ಇದರ ಬೆನ್ನಲ್ಲೇ, ತಂಡವನ್ನು ಆಧರಿಸಿಬೇಕಿದ್ದ ಹಿರಿಯ ಬ್ಯಾಟರ್​ ಜಾನಿ ಬೈರ್​ಸ್ಟೋವ್​ (26), ನಾಯಕ ಬೆನ್​ ಸ್ಟೋಕ್ಸ್​ (11) ರನ್​ಗೆ ವಿಕೆಟ್​ ನೀಡಿದರು. ಇದರಿಂದ ತಂಡ 220ಕ್ಕೆ 7 ವಿಕೆಟ್​ ಕಳೆದುಕೊಂಡು ಗೆಲುವಿನ ಆಸೆಯನ್ನೇ ಕೈಬಿಟ್ಟಿತು.

ಸಮಯ ಕಳೆದ ಫೋಕ್ಸ್​, ಟಾಮ್​: ತಂಡ ಸೋಲುತ್ತದೆ ಎಂದು ತಿಳಿದಿದ್ದರೂ, ವಿಕೆಟ್​ ಕೀಪರ್​ ಬೆನ್​ ಫೋಕ್ಸ್​ ಮತ್ತು ಸ್ಪಿನ್​ ಆಲ್​ರೌಂಡರ್​ ಟಾಮ್​ ಹಾರ್ಟ್ಲಿ ಕೆಲ ಹೊತ್ತು ಪ್ರತಿರೋಧ ತೋರುವ ಮೂಲಕ ಕ್ರೀಡಾಂಗಣದಲ್ಲಿ ನೆರೆದಿದ್ದ ಇಂಗ್ಲೆಂಡ್​ನ ಅಭಿಮಾನಿಗಳನ್ನು ರಂಜಿಸಿದರು. ಫೋಕ್ಸ್​, ಟಾಮ್​ ತಲಾ 36 ರನ್​ ಗಳಿಸಿದರು. ಇಬ್ಬರನ್ನೂ ಜಸ್ಪ್ರೀತ್​ ಬೂಮ್ರಾ ಪೆವಿಲಿಯನ್​ಗೆ ಕಳುಹಿಸುವ ಮೂಲಕ ಇಂಗ್ಲೆಂಡ್​ಗೆ ಸೋಲಿನ ರುಚಿ ತೋರಿಸಿದರು.

ಸರಣಿ ಸಮ: ಹೈದರಾಬಾದ್​ನ ಉಪ್ಪಳದಲ್ಲಿ ನಡೆದಿದ್ದ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಭಾರತವನ್ನು ಸೋಲಿಸಿ ಸರಣಿಯಲ್ಲಿ ಶುಭಾರಂಭ ಕಂಡಿದ್ದ ಪ್ರವಾಸಿ ಆಂಗ್ಲರು, 2 ನೇ ಟೆಸ್ಟ್​​ನಲ್ಲಿ ಭಾರತದೆದುರು ಮಂಡಿಯೂರಿದರು. ಇದರಿಂದ ಐದು ಪಂದ್ಯಗಳ ಸರಣಿ 1-1 ರಲ್ಲಿ ಸಮವಾಯಿತು. ಎರಡೂ ಇನಿಂಗ್ಸ್​ಗಳಿಂದ 9 ವಿಕೆಟ್​ ಕಿತ್ತ ಬೂಮ್ರಾ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು.

ಸಂಕ್ಷಿಪ್ತ ಸ್ಕೋರ್​: ಭಾರತ ಮೊದಲ ಇನಿಂಗ್ಸ್​ 396, ಎರಡನೇ ಇನಿಂಗ್ಸ್​ 255, ಇಂಗ್ಲೆಂಡ್​ ಮೊದಲ ಇನಿಂಗ್ಸ್​ 253, 2ನೇ ಇನಿಂಗ್ಸ್​ 292

ಮುಂದಿನ ಪಂದ್ಯ: ಸರಣಿಯ ಮೂರನೇ ಟೆಸ್ಟ್‌ ಪಂದ್ಯ ಫೆಬ್ರವರಿ 15ರಿಂದ 19ರವರೆಗೆ ಗುಜರಾತ್​ನ ರಾಜ್​ಕೋಟ್​ನಲ್ಲಿ ನಡೆಯಲಿದೆ.

ಇದನ್ನೂ ಓದಿ: ಹಿರಿಯರ ರಾಷ್ಟ್ರೀಯ ಕುಸ್ತಿ ಚಾಂಪಿಯನ್​ಶಿಪ್​ನಲ್ಲಿ ವಿನೇಶ್ ಫೋಗಟ್​ಗೆ ಚಿನ್ನ