ಡಮಾಸ್ಕಸ್: ಸಿರಿಯಾದ ರಾಜಧಾನಿ ಡಮಸ್ಕಸ್ನಲ್ಲಿರುವ ಇರಾನ್ ರಾಯಭಾರಿ ಕಚೇರಿ ಕಟ್ಟಡದ ಮೇಲೆ ಇಸ್ರೇಲ್ ಕ್ಷಿಪಣಿ ಹಾರಿಸಿದೆ. ಈ ದಾಳಿಯಲ್ಲಿ ಐವರು ಇರಾನ್ ಉದ್ಯೋಗಿಗಳು ಸಾವನ್ನಪ್ಪಿದ್ದು, ಇಬ್ಬರು ಇರಾನಿಯನ್ ರಾಯಭಾರಿ ಗಾರ್ಡ್ಗಳು ಗಾಯಗೊಂಡಿದ್ದಾರೆ ಎಂದು ವರದಿ ತಿಳಿಸಿದೆ.
ಈ ದಾಳಿಗೆ ಆಕ್ರೋಶ ವ್ಯಕ್ತಪಡಿಸಿರುವ ಸಿರಿಯಾದಲ್ಲಿರುವ ಇರಾನಿನ ರಾಯಭಾರಿ ಹೊಸೈನ್ ಅಕ್ಬರಿ, ಇದಕ್ಕೆ ಪ್ರತೀಕಾರದ ದಾಳಿ ಮೂಲಕ ತಕ್ಕ ಉತ್ತರ ನೀಡಲಾಗುವುದು ಎಂದು ಎಚ್ಚರಿಸಿದ್ದಾರೆ.
ಈ ಕುರಿತು ವರದಿಗಾರರೊಂದಿಗೆ ಮಾತನಾಡಿರುವ ಅವರು, ಇದು ಅಂತಾರಾಷ್ಟ್ರೀಯ ಕಾನೂನಿನ ಸಂಪೂರ್ಣ ಉಲ್ಲಂಘನೆಯಾಗಿದೆ. ಈ ಕಾನೂನುಗಳನ್ನು ಜಾರಿಗೊಳಿಸಲು ಉದ್ದೇಶಿಸಿರುವ ಅಂತಾರಾಷ್ಟ್ರೀಯ ಸಂಸ್ಥೆಗಳು ಘಟನೆ ಕುರಿತು ಯಾವಾಗ ಕ್ರಮ ತೆಗೆದುಕೊಳ್ಳುತ್ತವೆ ಎಂದು ಕೂಡ ಪ್ರಶ್ನಿಸಿದ್ದಾರೆ.
ಇಸ್ರೇಲ್ನ ಈ ಕಾರ್ಯಾಚರಣೆಗೆ ಇರಾನ್ ಉತ್ತರಿಸದೆ ಇರಲಾರದು. ಈ ದಾಳಿಗೆ ಸಮಾನವಾದ ಬಲದೊಂದಿಗೆ ಪ್ರತೀಕಾರ ನಡೆಸುವುದಾಗಿ ಇರಾನ್ ರಾಯಭಾರಿ ಎಚ್ಚರಿಕೆ ನೀಡಿದ್ದಾರೆ ಎಂದು ಕ್ಸಿನುವಾ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಡಮಾಸ್ಕಸ್‌ನ ಪಶ್ಚಿಮಕ್ಕೆ ಮಜ್ಜೆಹ್ ಹೆದ್ದಾರಿಯಲ್ಲಿರುವ ಇರಾನ್ ರಾಯಭಾರಿ ಕಚೇರಿಯಲ್ಲಿ ಕ್ಷಿಪಣಿ ದಾಳಿ ಬಳಿಕ ದಟ್ಟ ಹೊಗೆ ಕಂಡು ಬಂದಿತು. ಈ ಕ್ಷಿಪಣಿಯನ್ನು ತಡೆಯಲು ಸಿರಿಯನ್ ವಾಯು ಪಡೆ ಮುಂದಾಗುತ್ತಿರುವ ಹೊತ್ತಿಗೆ ದೊಡ್ಡ ಶಬ್ಧ ಕೇಳಿಬಂದಿತು. ಕಟ್ಟಡವೂ ದಾಳಿಯಿಂದ ಸಂಪೂರ್ಣ ನಾಶವಾಗಿದೆ ಎಂದು ವರದಿ ತಿಳಿಸಿದೆ.
ಘಟನೆ ಬಳಿಕ ಸ್ಥಳಕ್ಕೆ ಆಗಮಿಸಿದ ಸಿರಿಯಾದ ವಿದೇಶಾಂಗ ಸಚಿವ ಫೈಸರ್ ಮೆಕ್ದಾದ್ ಘಟನೆಯನ್ನು ತೀವ್ರವಾಗಿ ಖಂಡಿಸಿದ್ದಾರೆ. ಘಟನೆಯಲ್ಲಿ ಸಾವನ್ನಪ್ಪಿದವರಿಗೆ ಸಂತಾಪ ಸೂಚಿಸಿದ ಅವರು ಈ ರೀತಿಯ ರಾಜತಾಂತ್ರಿಕ ಯೋಜನೆ ಮೇಲಿನ ದಾಳಿ ಅನ್ಯಾಯವಾಗಿದ್ದು, ಇದನ್ನು ಸಂಪೂರ್ಣವಾಗಿ ಖಂಡಿಸಿದ್ದೇವೆ ಎಂದಿದ್ದಾರೆ.
ಇರಾನ್ ರಾಯಭಾರ ಕಚೇರಿಯ ಕಟ್ಟಡವನ್ನು ಗುರಿಯಾಗಿಸಿಕೊಂಡು ಸಿರಿಯಾದ ಕಾಲಮಾನ ಸಂಜೆ 5 ಗಂಟೆ ಸುಮಾರಿಗೆ ಈ ದಾಳಿ ನಡೆದಿದೆ.
ಹಮಾಸ್ ಅಕ್ಟೋಬರ್ 7ರಂದು ಇಸ್ರೇಲ್ ಮೇಲೆ ದಾಳಿ ನಡೆಸುವ ಮೂಲಕ ಯುದ್ಧ ಆರಂಭಿಸಿದೆ. ಗಾಜಾದಲ್ಲಿ ಹಮಾಸ್ ಮತ್ತು ಇಸ್ರೇಲ್ ಯುದ್ಧ ಆರಂಭವಾಗಿ ಆರು ತಿಂಗಳು ಕಳೆದಿದೆ. ಹಮಾಸ್ ಇರಾನ್ನ ಬೆಂಬಲ ಹೊಂದಿದೆ. ಇತ್ತೀಚಿಗೆ ಹಿಜ್ಬುಲ್ಲಾ ಜೊತೆಗೆ ಇಸ್ರೇಲ್ ದಾಳಿ ಹೆಚ್ಚಿದ್ದು, ಇದು ಪೂರ್ಣ ಪ್ರಮಾಣದ ಯುದ್ಧದ ಸಾಧ್ಯತೆಯನ್ನು ಹೆಚ್ಚಿಸಿದೆ. ಇನ್ನು ಯೆಮೆನ್‌ನಲ್ಲಿ ಇರಾನ್ ಬೆಂಬಲಿತ ಹೌತಿ ಬಂಡುಕೋರರು ಕೂಡ ಇಸ್ರೇಲ್ನಲ್ಲಿ ಕ್ಷಿಪಣಿಗಳನ್ನು ಉಡಾಯಿಸಿರುವ ವರದಿಯಾಗಿದೆ. (ಐಎಎನ್ಎಸ್)
ಇದನ್ನೂ ಓದಿ: ಗಾಜಾ ಪಟ್ಟಿಯಲ್ಲಿ ಇಸ್ರೇಲ್ನಿಂದ ರಾತ್ರೋರಾತ್ರಿ ದಾಳಿ: 36 ಪ್ಯಾಲೆಸ್ಟೀನಿಯರು ಸಾವು
