ದಕ್ಷಿಣ ಕರೊಲಿನಾ (ಅಮೆರಿಕ): ರಿಪಬ್ಲಿಕನ್ ಪಕ್ಷದ ಅಧ್ಯಕ್ಷೀಯ ಅಭ್ಯರ್ಥಿ ನಿಕ್ಕಿ ಹ್ಯಾಲೆ ಅವರು ಸ್ಪರ್ಧೆಯಲ್ಲಿ ಮುಂದುವರೆಯಲು ನಿರ್ಧರಿಸಿದ್ದಾರೆ. ಶನಿವಾರ ಪ್ರಾಥಮಿಕ ಸಮೀಕ್ಷೆಯಲ್ಲಿ, ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮುನ್ನಡೆ ಸಾಧಿಸಿದ್ದಾರೆ. ಹೀಗಿದ್ದರು ಕೂಡಾ ವೈಟ್ ಔಸ್ ರೇಸ್ನಲ್ಲಿ ಉಳಿದುಕೊಳ್ಳುವುದಾಗಿ ಹ್ಯಾಲೆ ಪ್ರತಿಜ್ಞೆ ಮಾಡಿದ್ದಾರೆ.
ಸೌತ್ ಕರೊಲಿನಾದಲ್ಲಿ ಎರಡು ಬಾರಿ ಗವರ್ನರ್ ಆಗಿ ಸೇವೆ ಸಲ್ಲಿಸಿರುವ ಹ್ಯಾಲೆ ಗ್ರೀನ್ಸ್‌ವಿಲ್ಲೆ ಸಿಟಿಯಲ್ಲಿ ನಡೆದ ಪ್ರಚಾರ ಸಭೆಯನ್ನುದ್ದೇಶಿಸಿ ಮಾತನಾಡಿದರು. ದಕ್ಷಿಣ ಕರೊಲಿನಾದ ಮಾಜಿ ಗವರ್ನರ್ "ಎಲ್ಲಿಯೂ ಹೋಗುತ್ತಿಲ್ಲ" ಮತ್ತು "ಕೊನೆಯ ಮತ ಚಲಾವಣೆವರೆಗೂ" ತಮ್ಮ ಪ್ರಯತ್ನವನ್ನು ಮುಂದುವರೆಸುತ್ತೇನೆ ಎಂದು ಒತ್ತಿ ಹೇಳಿದ್ದಾರೆ. 'ಹ್ಯಾಲೆ ಶೀಘ್ರದಲ್ಲೇ ರೇಸ್ನಿಂದ ಹೊರಗುಳಿಯಬಹುದು' ಎಂಬ ಊಹಾಪೋಹಗಳ ನಂತರ ನಿಕ್ಕಿ ಹ್ಯಾಲೆ ಈ ಸ್ಪಷ್ಟನೆ ನೀಡಿದ್ದಾರೆ.
ನಿಮ್ಮಲ್ಲಿ ಕೆಲವರು ನಾನು ರೇಸ್ನಿಂದ ಹೊರಗುಳಿಯುತ್ತಿದ್ದೇನೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಇಲ್ಲಿಗೆ ಬಂದಿದ್ದೀರಿ. ಸರಿ, ನಾನು ರೇಸ್ನಿಂದ ಹೊರ ಹೋಗುತ್ತಿಲ್ಲ. ಆ ವಿಚಾರದಿಂದ ಬಹಳ ದೂರ ಇದ್ದೇನೆ ಎಂದು ಸ್ಪಷ್ಟಪಡಿಸಿದರು. ದಕ್ಷಿಣ ಕರೊಲಿನಾದ ಮಾಜಿ ಗವರ್ನರ್ ಆದ ಹ್ಯಾಲೆ ಅವರು ಕಠಿಣ ಚುನಾವಣೆಯನ್ನು ಎದುರಿಸುತ್ತಿದ್ದಾರೆ. ಫ್ಲೋರಿಡಾ ಗವರ್ನರ್ ರೊನ್ ಡಿಸಾಂಟಿಸ್ ಅವರು ಜನವರಿಯಲ್ಲಿ ತಮ್ಮ ಪ್ರಚಾರವನ್ನು ಸ್ಥಗಿತಗೊಳಿಸಿದಾಗಿನಿಂದ ಟ್ರಂಪ್ ಮತ್ತು ಹ್ಯಾಲೆ ಮುಖಾಮುಖಿ ಸ್ಪರ್ಧೆಯಲ್ಲಿದ್ದಾರೆ.
ಅದಕ್ಕಾಗಿಯೇ ನಾನು ಸ್ಪರ್ಧೆಯಿಂದ ಒಂದು ಹೆಜ್ಜೆ ಹಿಂದೆ ಇಡುವ ವಿಚಾರವನ್ನು ನಿರಾಕರಿಸುತ್ತೇನೆ. ದಕ್ಷಿಣ ಕರೊಲಿನಾದಲ್ಲಿ ಶನಿವಾರ ಮತದಾನ ನಡೆಯಲಿದೆ. ಅದಾಗ್ಯೂ ಭಾನುವಾರವೂ ನಾನು ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧೆ ಮುಂದುವರಿಸುತ್ತೇನೆ. ನಾನು ಎಲ್ಲಿಯೂ ಹೋಗುವುದಿಲ್ಲ ಎಂದು ಸ್ಪಷ್ಟಪಡಿಸಿದರು. ಜೊತೆಗೆ ಕೊನೆಯ ಮತದಾರ ಮತ ಚಲಾಯಿಸುವವರೆಗೂ ನಾನು ಪ್ರಚಾರ ನಡೆಸುತ್ತೇನೆ. ಏಕೆಂದರೆ ನಾನು ಉತ್ತಮ ಅಮೆರಿಕ ಮತ್ತು ನಮ್ಮ ಮಕ್ಕಳಿಗೆ ಉಜ್ವಲ ಭವಿಷ್ಯದ ಮೇಲೆ ನಂಬಿಕೆ ಇಟ್ಟಿದ್ದೇನೆ ಎಂದು ಅವರು ತಿಳಿಸಿದರು. ಅಲ್ಲದೇ, ಟ್ರಂಪ್ ಅಂದರೆ "ವಿಪತ್ತು" ಎಂದು ಉಲ್ಲೇಖಿಸಿದ್ದಾರೆ. ಈ ಹಿಂದೆಯೂ ಸಮೀಕ್ಷೆಯೊಂದರಲ್ಲಿ ಟ್ರಂಪ್ ಮುನ್ನಡೆ ಕಂಡಾಗ, ಹಿಂದೆ ಸರಿಯುವ ಮಾತಿಲ್ಲ ಎಂದು ನಿಕ್ಕಿ ಹ್ಯಾಲೆ ಘೋಷಿಸಿದ್ದರು.
ಇದನ್ನೂ ಓದಿ: ಟ್ರಂಪ್ ವಿರುದ್ಧ ನಿಕ್ಕಿ ಹ್ಯಾಲೆ ಗರಂ: ಪುಟಿನ್ಗೆ ಬೆಂಬಲಿಸುವ ಮಾತಿಗೆ ಕೆಂಡಾಮಂಡಲ
ನಿಕ್ಕಿ ಹ್ಯಾಲೆ ಅವರಿಗೂ ಭಾರಿ ಬೆಂಬಲ ವ್ಯಕ್ತವಾಗುತ್ತಿದೆ. ಹ್ಯಾಲೆಗೆ ಬೆಂಬಲ ಸೂಚಿಸುತ್ತಿರುವ ತಂತ್ರಜ್ಞಾನ ಉದ್ಯಮಿ ಮತ್ತು ಹೂಡಿಕೆದಾರ ಜಿತೇನ್ ಅಗರ್ವಾಲ್, "ಹ್ಯಾಲೆ ಹೋರಾಟ ಮಾಡದೇ ಹಿಂದೆ ಸರಿಯುವವರಲ್ಲ'' ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ಪಾಕಿಸ್ತಾನ್ ಪೀಪಲ್ಸ್ ಪಾರ್ಟಿ- PML-N ನಡುವೆ ಒಪ್ಪಂದ: ಶೆಹಬಾಜ್ ಷರೀಫ್ ಪ್ರಧಾನಿ ಅಭ್ಯರ್ಥಿ
