ವಾಷಿಂಗ್ಟನ್ : ಅಮೆರಿಕದ ವಿಶ್ವವಿದ್ಯಾಲಯಗಳಲ್ಲಿ ನಡೆಯುತ್ತಿರುವ ಯಹೂದಿ ವಿರೋಧಿ ಪ್ರತಿಭಟನೆ ಹಾಗೂ ಪ್ಯಾಲೆಸ್ಟೈನ್ ಪರವಾದ ಆಂದೋಲನಗಳನ್ನು ಕಟುವಾಗಿ ಖಂಡಿಸಿರುವ ಅಮೆರಿಕ ಅಧ್ಯಕ್ಷ ಜೋ ಬೈಡನ್, ಇಸ್ರೇಲ್ಗೆ ಅಮೆರಿಕವು ಉಕ್ಕಿನಷ್ಟು ದೃಢವಾಗಿ ಬೆಂಬಲ ನೀಡುವುದನ್ನು ಮುಂದುವರಿಸಲಿದೆ ಎಂದು ಪುನರುಚ್ಚರಿಸಿದ್ದಾರೆ.
"ಯಹೂದಿ ಜನರ ಸುರಕ್ಷತೆ, ಇಸ್ರೇಲ್ನ ಭದ್ರತೆ ಮತ್ತು ಇಸ್ರೇಲ್ ಸ್ವತಂತ್ರ ಯಹೂದಿ ರಾಷ್ಟ್ರವಾಗಿ ಅಸ್ತಿತ್ವದಲ್ಲಿರುವ ಅದರ ಹಕ್ಕಿನ ಬಗ್ಗೆ ನನ್ನ ಬದ್ಧತೆ ದೃಢವಾಗಿದೆ. ಎರಡೂ ದೇಶಗಳ ಮಧ್ಯೆ ಯಾವುದೇ ಭಿನ್ನಾಭಿಪ್ರಾಯ ಉಂಟಾದಾಗಲೂ ಸಹ ಈ ವಿಷಯದಲ್ಲಿ ನಮ್ಮ ನಿಲುವು ಬದಲಾಗದು" ಎಂದು ಬೈಡನ್ ಮಂಗಳವಾರ ಹೇಳಿದರು. ಯುಎಸ್ ರಾಜಧಾನಿ ವಾಷಿಂಗ್ಟನ್ನಲ್ಲಿ ಹೊಲೊಕಾಸ್ಟ್ (ಯಹೂದಿಗಳ ನರಮೇಧ) ಹತ್ಯಾಕಾಂಡದ ಹುತಾತ್ಮರ ಸ್ಮರಣೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.
"ಅಮೆರಿಕದ ಯಾವುದೇ ಕ್ಯಾಂಪಸ್ನಲ್ಲಿ ಅಥವಾ ರಾಷ್ಟ್ರದ ಯಾವುದೇ ಸ್ಥಳದಲ್ಲಿ ಯಹೂದಿ ವಿರೋಧಿ ಪ್ರತಿಭಟನೆ, ದ್ವೇಷ ಭಾಷಣ ಮತ್ತು ಯಾವುದೇ ರೀತಿಯ ಹಿಂಸಾಚಾರಗಳಿಗೆ ಅವಕಾಶ ನೀಡುವುದಿಲ್ಲ" ಎಂದು ಅವರು ಹೇಳಿದರು.
ಅಮೆರಿಕದ ಕೆಲ ವಿಶ್ವವಿದ್ಯಾಲಯಗಳ ಕ್ಯಾಂಪಸ್ಗಳಲ್ಲಿ ಪ್ಯಾಲೆಸ್ಟೈನ್ ಬೆಂಬಲಿಸಿ ರ್ಯಾಲಿಗಳನ್ನು ನಡೆಸಲಾಗುತ್ತಿದ್ದು, ಬೈಡನ್ ಅವರ ಮಧ್ಯಪ್ರಾಚ್ಯ ನೀತಿಯನ್ನು ಹೋರಾಟಗಾರರು ಖಂಡಿಸಿದ್ದಾರೆ. ಆದಾಗ್ಯೂ ಗಾಜಾದಲ್ಲಿ ಯುದ್ಧ ಮುಂದುವರೆಯುತ್ತಿರುವ ರೀತಿಯ ವಿಷಯದಲ್ಲಿ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ವಿರುದ್ಧ ಬೈಡನ್ ಇತ್ತೀಚೆಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಅಕ್ಟೋಬರ್ 7ರಂದು ಪ್ಯಾಲೆಸ್ಟೈನ್ ಇಸ್ಲಾಮಿಕ್ ಆರ್ಗನೈಸೇಶನ್ ಹಮಾಸ್ ಉಗ್ರಗಾಮಿಗಳು ಇಸ್ರೇಲ್ನಲ್ಲಿ ನಡೆಸಿದ ಹತ್ಯಾಕಾಂಡದಲ್ಲಿ 1200 ಜನ ಕೊಲ್ಲಲ್ಪಟ್ಟಿದ್ದನ್ನು ನೆನಪಿಸಿದ ಬೈಡನ್, ಜನತೆ ಇತಿಹಾದಿಂದ ಪಾಠ ಕಲಿಯಬೇಕು ಎಂದರು.
"ಜಗತ್ತಿನಲ್ಲಿ ಅನೇಕರು ಹೊಲೊಕಾಸ್ಟ್ ಮತ್ತು ಅಕ್ಟೋಬರ್ 7ರ ಘಟನೆಗಳು ನಡೆದೇ ಇಲ್ಲವೆಂಬಂತೆ ವರ್ತಿಸುತ್ತಾರೆ ಅಥವಾ ಅದನ್ನು ಮರೆಮಾಚುತ್ತಾರೆ ಅಥವಾ ತಿರುಚುತ್ತಾರೆ. ಅಲ್ಲದೆ ಯಹೂದಿಗಳ ಮೇಲೆ ಹಮಾಸ್ ಉಗ್ರರು ನಡೆಸಿದ ಲೈಂಗಿಕ ಅತ್ಯಾಚಾರ ಮತ್ತು ದೌರ್ಜನ್ಯಗಳನ್ನು ಕೂಡ ನಿರಾಕರಿಸುತ್ತಾರೆ. ಇಂಥ ವರ್ತನೆ ಅಸಹ್ಯಕರ ಮತ್ತು ಇದನ್ನು ನಿಲ್ಲಿಸಲೇಬೇಕು" ಎಂದು ಬೈಡನ್ ಪ್ರತಿಪಾದಿಸಿದರು.
ಗಾಜಾದಲ್ಲಿ ಇಸ್ರೇಲ್ ನಡೆಸುತ್ತಿರುವ ಯುದ್ಧವನ್ನು ತಕ್ಷಣವೇ ನಿಲ್ಲಿಸಬೇಕೆಂದು ಆಗ್ರಹಿಸಿ ಅಮೆರಿಕದ ವಿಶ್ವವಿದ್ಯಾಲಯಗಳಲ್ಲಿ ಪ್ರತಿಭಟನೆಗಳು ನಡೆಯುತ್ತಿವೆ. ಏತನ್ಮಧ್ಯೆ ಇಸ್ರೇಲ್ ಗಾಜಾದ ಮತ್ತೊಂದು ನಗರ ರಫಾ ಮೇಲೆ ಪೂರ್ಣ ಪ್ರಮಾಣದ ದಾಳಿಗೆ ಸಿದ್ಧತೆ ನಡೆಸುತ್ತಿದೆ.
ಇದನ್ನೂ ಓದಿ : ದಾಖಲೆಯ 5ನೇ ಅವಧಿಗೆ ರಷ್ಯಾ ಅಧ್ಯಕ್ಷರಾಗಿ ಪ್ರಮಾಣ ವಚನ ಸ್ವೀಕರಿಸಿದ ವ್ಲಾಡಿಮಿರ್ ಪುಟಿನ್ - Vladimir Putin sworn
