ಸಿಂಗಾಪುರ್: ಮೇ 21ರಂದು ಪ್ರತಿಕೂಲ ಹವಾಮಾನದಿಂದ ತುರ್ತು ಭೂ ಸ್ಪರ್ಶಿಸಿದ ಸಿಂಗಾಪುರ್ ಏರ್ಲೈನ್ನಲ್ಲಿದ್ದ ಪ್ರಯಾಣಿಕರ ಪೈಕಿ ಓರ್ವ ಮೃತಪಟ್ಟು, ಹಲವರು ಗಾಯಗೊಂಡಿದ್ದರು. 22 ಮಂದಿ ಬೆನ್ನುಹುರಿ ಗಾಯಕ್ಕೊಳಗಾದರೆ, 6 ಮಂದಿಯ ತಲೆಬುರುಡೆಗಳಿಗೆ ಗಾಯವಾಗಿತ್ತು. 22 ಪ್ರಯಾಣಿಕರನ್ನು ತೀವ್ರ ನಿಗಾ ಘಟಕದಲ್ಲಿ ದಾಖಲಿಸಲಾಗಿದ್ದು, ಯಾವುದೇ ಪ್ರಾಣಾಪಾಯ ಇಲ್ಲ ಎಂದು ವರದಿಯಾಗಿದೆ.
ಲಂಡನ್-ಸಿಂಗಾಪುರ್ ಮಾರ್ಗದಲ್ಲಿ ಸಂಚರಿಸುತ್ತಿದ್ದ ಈ ವಿಮಾನ ಪ್ರತಿಕೂಲ ಹವಾಮಾನದಿಂದಾಗಿ ಬ್ಯಾಂಕಾಕ್ನಲ್ಲಿ ತುರ್ತು ಭೂ ಸ್ಪರ್ಶ ಮಾಡಿತ್ತು. ಸುಮಾರು 37 ಸಾವಿರ ಅಡಿ ಎತ್ತರದಿಂದ ಕೇವಲ ಮೂರೇ ನಿಮಿಷದಲ್ಲಿ ಕೆಳಗಿಳಿದ ಪರಿಣಾಮ ಅನೇಕ ಪ್ರಯಾಣಿಕರು ಗಾಯಗೊಂಡಿದ್ದರು.
ಈ ಸಂದರ್ಭದಲ್ಲಿ ವಿಮಾನದಲ್ಲಿದ್ದ 46 ಪ್ರಯಾಣಿಕರು ಮತ್ತು ಇಬ್ಬರು ಸಿಬ್ಬಂದಿ ವೈದ್ಯಕೀಯ ಚಿಕಿತ್ಸೆಗಾಗಿ ಥಾಯ್ಲೆಂಡ್‌ನಲ್ಲಿದ್ದರೆ, 65 ಪ್ರಯಾಣಿಕರು ಮತ್ತು ಇಬ್ಬರು ಸಿಬ್ಬಂದಿ ಬ್ಯಾಂಕಾಕ್ನಲ್ಲಿದ್ದಾರೆ ಎಂಬ ಮಾಹಿತಿಯನ್ನು ಸಿಂಗಾಪೂರ್ ಏರ್ಲೈನ್ಸ್ ತನ್ನ ಸಾಮಾಜಿಕ ಜಾಲತಾಣದಲ್ಲಿ ತಿಳಿಸಿದೆ.
ಗಾಯಾಳುಗಳ ಕುಟುಂಬ ಸದಸ್ಯರು ಭೇಟಿಯಾಗಲು ಪ್ರಯಾಣ ವ್ಯವಸ್ಥೆಯನ್ನು ಸಿಂಗಾಪೂರ್ ಏರ್ಲೈನ್ಸ್ ಮಾಡಿದೆ. ಇದೇ ವೇಳೆ ಪ್ರಯಾಣಿಕರ ಆರೈಕೆಗೆ ಮುಂದಾದ ಸಮಿತಿವೇಜ್ ಶ್ರೀನಾಕಾರಿನ್ ಆಸ್ಪತ್ರೆ ಮತ್ತು ಸಮಿತಿವೇಜ್ ಸುಖುಮ್ವಿಟ್ ಆಸ್ಪತ್ರೆಯ ಸಿಬ್ಬಂದಿಗೆ ಸಿಂಗಾಪೂರ್ ಏರ್ಲೈನ್ಸ್ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಗೋ ಚೂನ್ ಫೋಂಗ್ ಧನ್ಯವಾದ ತಿಳಿಸಿದ್ದಾರೆ.
ಬ್ಯಾಂಕಾಕ್‌ನಲ್ಲಿರುವ ಎಲ್ಲಾ ಪ್ರಯಾಣಿಕರ ಸಂಪರ್ಕದಲ್ಲಿದ್ದೇವೆ. ಪ್ರಯಾಣಿಕರಿಗೆ ಕಷ್ಟದ ಸಮಯದಲ್ಲಿ ಅಗತ್ಯ ಬೆಂಬಲ ಮತ್ತು ಸಹಾಯ ನೀಡಲು ನಮ್ಮ ತರಬೇತಿ ಪಡೆದ ಸಿಬ್ಬಂದಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಥಾಯ್ಲೆಂಡ್ನ ಸ್ಥಳೀಯ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸಲಾಗಿದ್ದು, ಅಗತ್ಯವಿರುವ ಹೆಚ್ಚುವರಿ ಸಹಾಯವನ್ನೂ ಒದಗಿಸಲು ಬ್ಯಾಂಕಾಕ್‌ಗೆ ತಂಡವನ್ನು ಕಳುಹಿಸಲಾಗುತ್ತಿದೆ ಎಂದು ವಿಮಾನಯಾನ ಸಂಸ್ಥೆ ತಿಳಿಸಿದೆ.
ಇದನ್ನೂ ಓದಿ: ಆಗಸದಲ್ಲಿ "ಭೂಕಂಪ": ಸಿಂಗಾಪುರ ವಿಮಾನ ಅಲುಗಾಡಿ ಒಬ್ಬ ಸಾವು, 30 ಮಂದಿಗೆ ಗಾಯ
