ಸೌತ್ ಸೂಪರ್ ಸ್ಟಾರ್ ರಾಮ್ ಚರಣ್ ಹಾಗೂ ಬಾಲಿವುಡ್ ಬೆಡಗಿ ಕಿಯಾರಾ ಅಡ್ವಾಣಿ ಮುಖ್ಯಭೂಮಿಕೆಯ ಮುಂದಿನ ಬಹುನಿರೀಕ್ಷಿತ ಚಿತ್ರ 'ಗೇಮ್ ಚೇಂಜರ್'. ಆಂಧ್ರಪ್ರದೇಶದ ವಿಶಾಖಪಟ್ಟಣಂನಲ್ಲಿ ಚಿತ್ರೀಕರಣ ಚುರುಕುಗೊಂಡಿದೆ. ಶಂಕರ್ ನಿರ್ದೇಶನದ 'ಗೇಮ್ ಚೇಂಜರ್' ಚಿತ್ರದ ಶೂಟಿಂಗ್ನಲ್ಲಿ ಪ್ರಮುಖ ತಾರೆಯರು ಭಾಗಿಯಾಗಿದ್ದಾರೆ. ಮೆಚ್ಚಿನ ನಟರು ಶೂಟಿಂಗ್ ಸಲುವಾಗಿ ನಗರದಲ್ಲಿರುವ ವಿಚಾರ ತಿಳಿದು ಉತ್ಸುಕರಾದ ಅಪಾರ ಸಂಖ್ಯೆಯ ಅಭಿಮಾನಿಗಳು ಅವರನ್ನು ನೋಡಲು ಲೊಕೇಶನ್ಗೆ ಬಂದು ಜಮಾಯಿಸಿದರು. ಇದೀಗ ರಾಮ್ ಚರಣ್ ಮತ್ತು ಕಿಯಾರಾ ಅಡ್ವಾಣಿ ಅವರ ಫೋಟೋ ವಿಡಿಯೋಗಳನ್ನು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳಲಾಗಿದೆ.
'ಗೇಮ್ ಚೇಂಜರ್' ಚಿತ್ರತಂಡ ನಟರ ನೋಟದ ಬಗ್ಗೆ ಗುಟ್ಟು ಬಿಟ್ಟುಕೊಟ್ಟಿರಲಿಲ್ಲ. ಆದ್ರೆ ಅಭಿಮಾನಿಗಳೀಗ ಚಿತ್ರೀಕರಣದ ಸ್ಥಳದಿಂದ ಫೋಟೋ-ವಿಡಿಯೋಗಳನ್ನು ಹಂಚಿಕೊಂಡಿದ್ದಾರೆ. ಲೀಕ್ ಆದ ದೃಶ್ಯಗಳಲ್ಲಿ, ರಾಮ್ ಚರಣ್ ಫಾರ್ಮಲ್ ಶರ್ಟ್, ಪ್ಯಾಂಟ್ ಮತ್ತು ಶೂ ಧರಿಸಿದ್ದು, ಅದಕ್ಕೆ ಹೊಂದಿಕೆಯಾಗುವಂತೆ ಹೇರ್ಸ್ಟೈಲ್ ಇತ್ತು. ಜೊತೆಗೆ ಕಪ್ಪು ಕನ್ನಡಕವನ್ನೂ ಧರಿಸಿದ್ದರು. ಮತ್ತೊಂದೆಡೆ ಕಿಯಾರಾ ಅಡ್ವಾಣಿ ಸರಳವಾಗಿ ಬ್ಲ್ಯೂ-ಗೋಲ್ಡ್ ಕಾಂಬಿನೇಶನ್ನ ಸೀರೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ಹಣೆಗೆ ಇಟ್ಟಿದ್ದ ಸಣ್ಣ ಬಿಂದಿ ಕಿಯಾರಾ ಅವರ ಆಕರ್ಷಣೆ ಹೆಚ್ಚಿಸಿತ್ತು.
ವಿಡಿಯೋವೊಂದರಲ್ಲಿ, ಆರ್ಕೆ ಬೀಚ್‌ ಬಳಿ ಸೆಟ್ ಹಾಕಿದಂತಿತ್ತು. ಹೆಚ್ಚಿನ ಸಂಖ್ಯೆಯ ಅಭಿಮಾನಿಗಳು ಜಮಾಯಿಸಿದ ಹಿನ್ನೆಲೆ ಪರಿಸ್ಥಿತಿ ನಿಯಂತ್ರಿಸಲು ಹರಸಾಹಸಪಡಬೇಕಾಯ್ತು. ಭದ್ರತೆಯ ಹೊರತಾಗಿಯೂ ರಾಮ್ ಚರಣ್ ಸುತ್ತಲೂ ಸಾಕಷ್ಟು ಅಭಿಮಾನಿಗಳು ನೆರೆದಿದ್ದರು. ನಟನ ಶೂಟಿಂಗ್ ಪೂರ್ಣಗೊಳ್ಳುವವರೆಗೂ ದೊಡ್ಡ ಜನಸಮೂಹವೇ ಇತ್ತು.
ಇದನ್ನೂ ಓದಿ: 'ವಂಗಾಗೆ ನನ್ನ ಒಂದೇ ಒಂದು ತಪ್ಪು ಕಂಡುಹಿಡಿಯಲು ಆಗಲಿಲ್ಲ': ಜಾವೇದ್ ಅಖ್ತರ್ ವ್ಯಂಗ್ಯ
ಸಿನಿಮಾದ ಕಥಾಹಂದರದ ಬಗ್ಗೆ ಚಿತ್ರತಂಡ ಮೌನ ಮುಂದುವರಿಸಿದೆ. ಸದ್ಯ ಸಿನಿಮಾ ಸುತ್ತಲಿರುವ ಮಾಹಿತಿ ಪ್ರಕಾರ, ನೈಜಘಟನೆಗಳನ್ನಾಧರಿಸಿದ ಪೊಲಿಟಿಕಲ್ ಡ್ರಾಮಾ. ನಿರ್ದೇಶಕ ಶಂಕರ್ ಮತ್ತೊಂದು ಪ್ರಾಜೆಕ್ಟ್‌ನಲ್ಲಿ ಬ್ಯುಸಿ ಆದ ಹಿನ್ನೆಲೆ, ಸಿನಿಮಾ ವಿಳಂಬವಾಗಿದೆ. ರಾಮ್ ಚರಣ್ ಮತ್ತು ಕಿಯಾರಾ ಜೊತೆ ಅಂಜಲಿ, ಜೈರಾಮ್, ಸುನಿಲ್, ಸಮುದ್ರಕನಿ ಸೇರಿದಂತೆ ಹಲವರು ನಟಿಸುತ್ತಿದ್ದಾರೆ.
ಇದನ್ನೂ ಓದಿ: ಅಪ್ಪು ನಿರ್ವಹಿಸಿದ ಪಾತ್ರಗಳೆಲ್ಲವೂ ವಿಭಿನ್ನ: ತೆರೆ ಮೇಲೆ ನಕ್ಷತ್ರದಂತೆ ಮಿಂಚಿ ಮರೆಯಾದ ನಟ
ಗೇಮ್ ಚೇಂಜರ್ ಪೂರ್ಣಗೊಂಡ ಬಳಿಕ ರಾಮ್ ಚರಣ್, ಬುಚ್ಚಿ ಬಾಬು ಸನಾ ನಿರ್ದೇಶನದ ಸ್ಪೋರ್ಟ್ ಡ್ರಾಮಾದಲ್ಲಿ ಕೆಲಸ ಮಾಡಲಿದ್ದಾರೆ. ಜಾಹ್ನವಿ ಕಪೂರ್ ಜೊತೆ ಇದೇ ಮೊದಲ ಬಾರಿ ಸ್ಕ್ರೀನ್ ಶೇರ್ ಮಾಡುತ್ತಿರೋ ಈ ಚಿತ್ರ ಇದೇ ತಿಂಗಳಲ್ಲಿ ಸೆಟ್ಟೇರಲಿದೆ ಎನ್ನಲಾಗಿದೆ. ಮತ್ತೊಂದೆಡೆ, ಕಿಯಾರಾ ಹೃತಿಕ್ ರೋಷನ್ ಮತ್ತು ಜೂನಿಯರ್ ಎನ್ಟಿಆರ್ ಜೊತೆ ವಾರ್ 2ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ರಣ್ವೀರ್ ಸಿಂಗ್ ಅಭಿನಯದ ಡಾನ್ 3 ನಲ್ಲಿಯೂ ಪ್ರಮುಖ ಪಾತ್ರ ನಿರ್ವಹಿಸುತ್ತಿದ್ದಾರೆ.
