ಸಿಯೋಲ್: ದಕ್ಷಿಣ ಕೊರಿಯಾದ ಅತಿದೊಡ್ಡ ಕಾರು ತಯಾರಕ ಕಂಪನಿಗಳಾದ ಹ್ಯುಂಡೈ ಮೋಟಾರ್ ಮತ್ತು ಕಿಯಾ ಕಳೆದ 15 ವರ್ಷಗಳಲ್ಲಿ ಜಾಗತಿಕ ಮಾರುಕಟ್ಟೆಯಲ್ಲಿ ಒಟ್ಟು 5 ದಶಲಕ್ಷಕ್ಕೂ (50 ಲಕ್ಷ) ಹೆಚ್ಚು ಪರಿಸರ ಸ್ನೇಹಿ ವಾಹನಗಳನ್ನು ಮಾರಾಟ ಮಾಡಿವೆ ಎಂದು ಕಂಪನಿಯ ಅಧಿಕಾರಿಗಳು ಭಾನುವಾರ ತಿಳಿಸಿದ್ದಾರೆ.
ಹೈಬ್ರಿಡ್ ಎಲೆಕ್ಟ್ರಿಕ್ ವಾಹನಗಳು (ಎಚ್ಇವಿ), ಪ್ಲಗ್-ಇನ್ ಹೈಬ್ರಿಡ್ ಎಲೆಕ್ಟ್ರಿಕ್ ವಾಹನಗಳು (ಪಿಎಚ್ಇವಿಗಳು), ಎಲೆಕ್ಟ್ರಿಕ್ ವಾಹನಗಳು (ಇವಿಗಳು) ಮತ್ತು ಫ್ಯೂಯೆಲ್ ಸೆಲ್ ಎಲೆಕ್ಟ್ರಿಕ್ ವಾಹನಗಳು (ಎಫ್ಸಿಇವಿಗಳು) ಸೇರಿದಂತೆ ಒಟ್ಟು 5.11 ಮಿಲಿಯನ್ ಸಂಖ್ಯೆಯ ಪರಿಸರ ಸ್ನೇಹಿ ಕಾರುಗಳನ್ನು ಎರಡೂ ಕಂಪನಿಗಳು ಜನವರಿ ಅಂತ್ಯದ ವೇಳೆಗೆ ಮಾರಾಟ ಮಾಡಿವೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
2023 ರ ವರ್ಷವೊಂದರಲ್ಲಿಯೇ ಹ್ಯುಂಡೈ ಮೋಟಾರ್ ಮತ್ತು ಅದರ ಸಣ್ಣ ಅಂಗಸಂಸ್ಥೆ ಕಿಯಾ ಒಟ್ಟು 1.36 ಮಿಲಿಯನ್ ಪರಿಸರ ಸ್ನೇಹಿ ವಾಹನಗಳನ್ನು ಮಾರಾಟ ಮಾಡಿದ್ದು, ಸತತ ಎರಡನೇ ವರ್ಷ 1 ಮಿಲಿಯನ್ ಗಡಿಯನ್ನು ತಲುಪಿವೆ. ಒಟ್ಟು ಮಾರಾಟದಲ್ಲಿ ಎಚ್ಇವಿಗಳು ಶೇಕಡಾ 57.8 ರಷ್ಟು ಪಾಲು ಹೊಂದಿದ್ದು, ನಂತರದ ಸ್ಥಾನಗಳಲ್ಲಿ ಇವಿಗಳು (30.8 ಶೇಕಡಾ), ಪಿಎಚ್ಇವಿಗಳು (10.6 ಶೇಕಡಾ) ಮತ್ತು ಎಫ್ಸಿಇವಿಗಳು (0.8 ಶೇಕಡಾ) ಇವೆ.
ಕಿಯಾ ಕಂಪನಿಯ ನಿರೋ ಎಚ್ ಇವಿ ಮಾಡಲ್ನ 6,06,000 ವಾಹನಗಳು ಮಾರಾಟವಾಗಿದ್ದರೆ, ಹ್ಯುಂಡೈನ ಟಕ್ಸನ್ ಹೈಬ್ರಿಡ್ ಮತ್ತು ಕೋನಾ ಎಲೆಕ್ಟ್ರಿಕ್ ಕ್ರಮವಾಗಿ 3,56,000 ಮತ್ತು 3,32,000 ವಾಹನಗಳು ಮಾರಾಟವಾಗಿವೆ ಎಂದು ವರದಿ ತಿಳಿಸಿದೆ. ಜಾಗತಿಕ ಇವಿ ಮಾರುಕಟ್ಟೆಯ ಬೆಳವಣಿಗೆಗೆ ತಮ್ಮ ವಾಹನಗಳ ಮಾರಾಟವು ದೊಡ್ಡ ಮಟ್ಟದ ಕೊಡುಗೆ ನೀಡಿದೆ ಮತ್ತು ಈ ವರ್ಷ ಪರಿಸರ ಸ್ನೇಹಿ ವಾಹನ ಶ್ರೇಣಿಯನ್ನು ವಿಸ್ತರಿಸಲು ಯೋಜಿಸಿರುವುದಾಗಿ ಹ್ಯುಂಡೈ ಮೋಟಾರ್ ಕಂಪನಿ ಹೇಳಿದೆ.
ಹ್ಯುಂಡೈ ಈ ವರ್ಷದ ದ್ವಿತೀಯಾರ್ಧದಲ್ಲಿ ಮಿನಿ ಸ್ಪೋರ್ಟ್ ಯುಟಿಲಿಟಿ ವೆಹಿಕಲ್ (ಎಸ್ ಯುವಿ) ಕ್ಯಾಸ್ಪರ್ ನ ಎಲೆಕ್ಟ್ರಿಕ್ ಮಾದರಿಯನ್ನು ಬಿಡುಗಡೆ ಮಾಡಲು ಯೋಜಿಸಿದ್ದು, ಕಿಯಾ ತನ್ನ ಹೊಸ ಎಲೆಕ್ಟ್ರಿಕ್ ಎಸ್ ಯುವಿ ಇವಿ 3 ಅನ್ನು ಮೊದಲಾರ್ಧದಲ್ಲಿ ಅನಾವರಣಗೊಳಿಸಲಿದೆ. ಹ್ಯುಂಡೈ ಮತ್ತು ಕಿಯಾ 2024 ರಲ್ಲಿ ಒಟ್ಟು 1.5 ಮಿಲಿಯನ್ ಯುನಿಟ್ ಪರಿಸರ ಸ್ನೇಹಿ ಕಾರುಗಳನ್ನು ಮಾರಾಟ ಮಾಡುವ ಗುರಿಯನ್ನು ಹೊಂದಿವೆ.
ಇದನ್ನೂ ಓದಿ : ತಮಿಳುನಾಡಿನಲ್ಲಿ ಟಾಟಾ ಮೋಟರ್ಸ್ 9 ಸಾವಿರ ಕೋಟಿ ರೂ. ಹೂಡಿಕೆ: 5000 ಉದ್ಯೋಗ ಸೃಷ್ಟಿ ಸಾಧ್ಯತೆ
