ನವದೆಹಲಿ : ಎಎಪಿ ಸಂಸದೆ ಸ್ವಾತಿ ಮಲಿವಾಲ್ ಅವರ ಮೇಲಿನ ಹಲ್ಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೇಜ್ರಿವಾಲ್ ಅವರ ಸಹಾಯಕ ಬಿಭವ್ ಕುಮಾರ್ ಮೇಲೆ ಎಫ್ಐಆರ್ ದಾಖಲಾದ ಒಂದು ದಿನದ ನಂತರ, ದೆಹಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಅವರ ನಿವಾಸದ ಸಿಸಿಟಿವಿ ದೃಶ್ಯವನ್ನು ಎಎಪಿ ಮರುಟ್ವೀಟ್ ಮಾಡಿದೆ. ಅದರಲ್ಲಿ ಎಎಪಿ ಸಂಸದೆ ಸ್ವಾತಿ ಮಲಿವಾಲ್ ಅವರು ಭದ್ರತಾ ಸಿಬ್ಬಂದಿಯೊಂದಿಗೆ ವಾಗ್ವಾದ ನಡೆಸುತ್ತಿರುವುದು ಕಂಡು ಬಂದಿದೆ.
ಉದ್ದೇಶಿತ ವಿಡಿಯೊದಲ್ಲಿ, ಭದ್ರತಾ ಸಿಬ್ಬಂದಿ ಅವರು ಕುಳಿತಿದ್ದ ಕೋಣೆಯಿಂದ ಹೊರ ಹೋಗುವಂತೆ ಸಂಸದರನ್ನು ವಿನಂತಿಸುತ್ತಿರುವಾಗ, ಮಲಿವಾಲ್ ಅವರು 'ಮೈ ತುಮ್ಹಾರಿ ಭಿ ನೌಕ್ರಿ ಖೌಂಗಿ ಅಗರ್ ಮುಜೆ ಟಚ್ ಕರಾ ತೋ (ನೀವು ನನ್ನನ್ನು ಮುಟ್ಟಿದರೆ ನಾನು ನಿನ್ನನ್ನು ಕೆಲಸದಿಂದ ವಜಾಗೊಳಿಸುತ್ತೇನೆ ) ಎಂದು ಹೇಳುತ್ತಿರುವುದು ಕಂಡು ಬಂದಿದೆ. ಎಕ್ಸ್ ಪೋಸ್ಟ್‌ನಲ್ಲಿ ಈ ವಿಡಿಯೋವನ್ನು ಹಂಚಿಕೊಂಡಿರುವ ಎಎಪಿ, ಇದು ''ಸ್ವಾತಿ ಮಲಿವಾಲ್ ಅವರ ಸತ್ಯ'' (ಸ್ವಾತಿ ಮಲಿವಾಲ್ ಕಾ ಸಚ್) ಎಂದಿದೆ.
ಈ ಬಗ್ಗೆ ಸ್ವಾತಿ ಮಲಿವಾಲ್ ಅವರು ಪ್ರತಿಕ್ರಿಯಿಸಿದ್ದು, "ರಾಜಕೀಯ ಹಿಟ್ಮ್ಯಾನ್" ತನ್ನನ್ನು ತಾನು ಉಳಿಸಿಕೊಳ್ಳಲು ಪ್ರಯತ್ನಗಳನ್ನು ಪ್ರಾರಂಭಿಸಿದ್ದಾನೆ ಎಂದು ಹೇಳಿದ್ದಾರೆ. "ಪ್ರತಿ ಬಾರಿಯಂತೆ, ಈ ಬಾರಿಯೂ ಈ ರಾಜಕೀಯ ಹಿಟ್ಮ್ಯಾನ್ ತನ್ನನ್ನು ಉಳಿಸಿಕೊಳ್ಳಲು ಪ್ರಯತ್ನಗಳನ್ನು ಪ್ರಾರಂಭಿಸಿದ್ದಾನೆ" ಎಂದು ಅವರು ಯಾರನ್ನೂ ಹೆಸರಿಸದೇ ಎಕ್ಸ್‌ನಲ್ಲಿ ಪೋಸ್ಟ್‌ ಮಾಡಿದ್ದಾರೆ.
ಎಕ್ಸ್ನಲ್ಲಿನ ಪೋಸ್ಟ್‌ನಲ್ಲಿ ಮಲಿವಾಲ್ ಅವರು, "ತನ್ನ ಜನರ ಮೂಲಕ ಸರಿಯಾದ ವಿವರವಿಲ್ಲದ ಈ ವಿಡಿಯೋವನ್ನು ಟ್ವೀಟ್ ಮಾಡಿ ತಾನು ತಪ್ಪು ಮಾಡಿಯೂ ತಪ್ಪಿಸಿಕೊಳ್ಳಬಹುದು ಎಂದು ಅವನು ಭಾವಿಸುತ್ತಾನೆ. ಯಾರನ್ನಾದರೂ ಥಳಿಸುವ ವಿಡಿಯೋವನ್ನು ಯಾರು ಮಾಡುತ್ತಾರೆ? ಮನೆ ಮತ್ತು ಕೊಠಡಿಯ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದ ತಕ್ಷಣ ಸತ್ಯವು ಬಹಿರಂಗಗೊಳ್ಳುತ್ತದೆ'' ಎಂದಿದ್ದಾರೆ.
ಪಕ್ಷದ ಪೋಸ್ಟ್‌ಗೆ ಪ್ರತಿಕ್ರಿಯಿಸಿದ ಎಎಪಿ ಶಾಸಕ ದಿಲೀಪ್ ಪಾಂಡೆ ಅವರು, "ಸುಳ್ಳು ಮತ್ತು ದುರಹಂಕಾರದ ಆಳವಾದ ಕತ್ತಲೆಯನ್ನು ಹೋಗಲಾಡಿಸಲು ಸತ್ಯದ ದೀಪದ ಸಣ್ಣ ಬೆಳಕು ಕೂಡ ಸಾಕು. ಮೊದಲು, ಯಾರು ನಿಷ್ಠಾವಂತರು ಎಂಬುದನ್ನು ನಿರ್ಧರಿಸಿ. ನಂತರ ಯಾರು ದೇಶದ್ರೋಹಿ ಎಂಬುದನ್ನು ಸಮಯ ನಿರ್ಧರಿಸುತ್ತದೆ'' ಎಂದಿದ್ದಾರೆ.
ಇದನ್ನೂ ಓದಿ: ದೆಹಲಿ ಸಿಎಂ ಕಚೇರಿ ಸಿಬ್ಬಂದಿಯಿಂದ ಅನುಚಿತ ವರ್ತನೆ: ಎಎಪಿ ನಾಯಕಿ ಸ್ವಾತಿ ಮಾಲಿವಾಲ್ ಆರೋಪ - Swati Maliwal
