ಮುಂಬೈ (ಮಹಾರಾಷ್ಟ್ರ): ಬಾಲಿವುಡ್ ನಟಿ ಲೈಲಾ ಖಾನ್ ಕೊಲೆ ಪ್ರಕರಣದಲ್ಲಿ ಅವರ ಮಲತಂದೆ ಪರ್ವೇಜ್ ತಕ್ ದೋಷಿ ಎಂದು ಬಾಂಬೆ ಸೆಷನ್ಸ್ ಕೋರ್ಟ್ ತೀರ್ಪು ನೀಡಿದೆ. ಶಿಕ್ಷೆಯ ಪ್ರಮಾಣವನ್ನು ಇಂದು ಪ್ರಕಟಿಸಲಾಗಿದೆ. ಪರ್ವೇಜ್ಗೆ ಸೆಕ್ಷನ್ 302ರ ಅಡಿಯಲ್ಲಿ ಮರಣದಂಡನೆ ವಿಧಿಸಲಾಗಿದೆ. ಸೆಕ್ಷನ್ 201ರ ಅಡಿಯಲ್ಲಿ ಏಳು ವರ್ಷಗಳ ಕಠಿಣ ಜೈಲು ಶಿಕ್ಷೆ ಮತ್ತು 10 ಸಾವಿರ ದಂಡ ಮತ್ತು ದಂಡ ಪಾವತಿಸಲು ತಪ್ಪಿದಲ್ಲಿ ಒಂದು ವರ್ಷ ಕಠಿಣ ಜೈಲು ಶಿಕ್ಷೆ ವಿಧಿಸಿ ಆದೇಶಿಸಲಾಗಿದೆ.
ಈ ಪ್ರಕರಣದಲ್ಲಿ ಸರ್ಕಾರದ ಪರವಾಗಿ ಸಾರ್ವಜನಿಕ ವಕೀಲ ಪಂಕಜ್ ರಾಮಚಂದ್ರ ಚವಾಣ್ ವಾದ ಮಂಡಿಸಿದ್ದರು. ಆರ್ಥರ್ ರೋಡ್ ಜೈಲಿನ ಅಂಡಾ ಸೆಲ್ ನಲ್ಲಿ ಪರ್ವೇಜ್ ನನ್ನು ಇರಿಸಲಾಗಿದೆ. ತೀರ್ಪಿನ ವೇಳೆ ಅವರ ತಾಯಿ, ತಂದೆ, ಪತ್ನಿ ಮತ್ತು ಮೂವರು ಪುತ್ರಿಯರು ನ್ಯಾಯಾಲಯದಲ್ಲಿ ಹಾಜರಿದ್ದರು. ಲೈಲಾ ಖಾನ್ ಜೊತೆಗೆ ಆಕೆಯ ನಾಲ್ವರು ಒಡಹುಟ್ಟಿದವರನ್ನ ಮತ್ತು ತಾಯಿಯನ್ನು 2011ರಲ್ಲಿ ಹತ್ಯೆ ಮಾಡಲಾಗಿತ್ತು. ಅವರು ಸೂಪರ್ ಸ್ಟಾರ್ ರಾಜೇಶ್ ಖನ್ನಾ ಅವರೊಂದಿಗೆ ಹಿಂದಿ ಚಿತ್ರದಲ್ಲಿ ನಟಿಸಿದ್ದರು.
ಪರ್ವೇಜ್ ವಿರುದ್ಧ ಕೊಲೆ, ಕೊಲೆಗೆ ಸಂಚು, ಸಾಕ್ಷ್ಯ ನಾಶದ ಪ್ರಕರಣ ದಾಖಲಾಗಿತ್ತು. ಅದರಲ್ಲಿ ಆತನಿಗೆ ಶಿಕ್ಷೆಯಾಯಿತು. ನಾಸಿಕ್ ಬಳಿಯ ಇಗತ್ಪುರಿಯಲ್ಲಿರುವ ಲೈಲಾ ಅವರ ಬಂಗಲೆಯಲ್ಲಿ ಕೊಲೆ ನಡೆದಿದೆ ಎಂದು ತಿಳಿದು ಬಂದಿತ್ತು.
ಏನಿದು ಪ್ರಕರಣ, ಹಿನ್ನೆಲೆ ಏನು?; ಆಸ್ತಿ ವಿವಾದದ ಹಿನ್ನೆಲೆಯಲ್ಲಿ ಈ ಕೊಲೆ ನಡೆದಿತ್ತು. ಪರ್ವೇಜ್ ಲೈಲಾ ಅವರ ತಾಯಿ ಶೆಲಿನಾ ಅವರ ಮೂರನೇ ಪತಿ. ಲೈಲಾ ಖಾನ್ ಮುನೀರ್ ಖಾನ್ ಅವರನ್ನು ವಿವಾಹವಾಗಿದ್ದರು. ಮುನೀರ್ ನಿಷೇಧಿತ ಬಾಂಗ್ಲಾದೇಶದ 'ಹರ್ಕತ್-ಉಲ್-ಜಿಹಾದ್ ಅಲ್-ಇಸ್ಲಾಮಿ' ಸಂಘಟನೆಯ ಸದಸ್ಯನಾಗಿದ್ದ ಎಂಬ ವದಂತಿ ಕೂಡಾ ಇತ್ತು. ಲೈಲಾ ಖಾನ್ 2008 ರಲ್ಲಿ ವಾಫಾ-ಎ ಡೆಡ್ಲಿ ಲವ್ ಸ್ಟೋರಿಯಲ್ಲಿ ನಟಿಸಿದ್ದರು. ಕೊಲೆಯ ಮೊದಲು, ಅವರು ಜಿನ್ನಾತ್ ಚಿತ್ರದಲ್ಲಿ ಕೆಲಸ ಮಾಡುತ್ತಿದ್ದರು. 2011ರಲ್ಲಿ, ಲೈಲಾಳ ಮಲತಂದೆ ನಾದಿರ್ ಪಟೇಲ್ ಮುಂಬೈನ ಓಶಿವಾರಾ ಪೊಲೀಸ್ ಠಾಣೆಯಲ್ಲಿ ನಾಪತ್ತೆ ದೂರು ದಾಖಲಿಸಿದ್ದರು. ಅವರು ಆಸಿಫ್ ಶೇಖ್ ಮತ್ತು ಪರ್ವೇಜ್ ತಕ್ ಮೇಲೆ ಅನುಮಾನ ವ್ಯಕ್ತಪಡಿಸಿದ್ದರು.
ಈ ಪ್ರಕರಣದಲ್ಲಿ ಬೆಂಗಳೂರು ಮೂಲದ ಆಸಿಫ್ ಶೇಖ್ ಎಂಬಾತನನ್ನು ಪೊಲೀಸರು ಬಂಧಿಸಿ ವಿಚಾರಣೆ ನಡೆಸಿದ್ದರು. ಆದರೆ ನಂತರ ಅವರನ್ನು ಬಿಡುಗಡೆ ಮಾಡಲಾಗಿತ್ತು. ಆದರೆ, ಮೊಬೈಲ್ ನೆಟ್‌ವರ್ಕ್ ತನಿಖೆಯಿಂದ ಪರ್ವೇಜ್ ಲೈಲಾ ಖಾನ್ ಜೊತೆಗೆ ಇಗತ್‌ಪುರಿಯಲ್ಲಿದ್ದರು ಎಂಬುದು ತನಿಖೆ ನಡೆಸಿದ ಪೊಲೀಸರಿಗೆ ತಿಳಿದು ಬಂದಿತ್ತು. ಲೈಲಾಳ ತಾಯಿ ತನ್ನ ಎರಡನೇ ಪತಿ ಆಸಿಫ್ ಶೇಖ್ ಜೊತೆ ಅಕ್ರಮ ಸಂಬಂಧ ಹೊಂದಿದ್ದರಿಂದ ಪರ್ವೇಜ್ ಗೆ ಕೋಪ ಬರುತ್ತಿತ್ತು ಎನ್ನಲಾಗಿದೆ. ಶೆಲಿನಾ ಆಸಿಫ್ನನ್ನು ತನ್ನ ಸಂಪತ್ತಿನ ಕೇರ್ ಟೇಕರ್ ಮಾಡಲು ಯೋಚಿಸುತ್ತಿದ್ದಳು. ಹೀಗಾಗಿ ಅವರನ್ನು ಹತ್ಯೆ ಮಾಡಿ ನಂತರ ಪರ್ವೇಜ್ ಅವರೆಲ್ಲರ ಶವಗಳನ್ನು ಫಾರ್ಮ್‌ಹೌಸ್‌ನ ಹಿಂಭಾಗದಲ್ಲಿ ಹೂತು ಹಾಕಿದ್ದ. ಹತ್ಯೆಯ ನಂತರ ಪರ್ವೇಜ್ ತನ್ನ ಹುಟ್ಟೂರು ಕಾಶ್ಮೀರಕ್ಕೆ ತೆರಳಿ ಏನೂ ಗೊತ್ತಿಲ್ಲದವನಂತೆ ಇದ್ದು ಬಿಟ್ಟಿದ್ದ.
ಮುಂಬೈನಿಂದ ಕಾಶ್ಮೀರಕ್ಕೆ ತೆರಳಿದ್ದ ಆತ ಅಲ್ಲಿ ವ್ಯಾಪಾರ ಪ್ರಾರಂಭಿಸಿದ್ದ. ಮತ್ತೊಂದು ಕಡೆ ಪರ್ವೇಜ್ನನ್ನು ವಂಚನೆ ಪ್ರಕರಣದಲ್ಲಿ ಜಮ್ಮು ಮತ್ತು ಕಾಶ್ಮೀರ ಪೊಲೀಸರು 8 ಜುಲೈ 2012 ರಂದು ಬಂಧಿಸಿದ್ದರು. ಆ ವೇಳೆ ಕೊಲೆ ಮಾಡಿರುವ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಿದ್ದ. ಅವರ ಹೇಳಿಕೆಯ ನಂತರ, ಮೃತ ದೇಹಗಳನ್ನು 10 ಜುಲೈ 2012 ರಂದು ಇಗತ್ಪುರಿಯಲ್ಲಿರುವ ಫಾರ್ಮ್‌ಹೌಸ್‌ನಿಂದ ಹೊರತೆಗೆಯಲಾಗಿತ್ತು.
ಮೊದಲಿಗೆ ಅವರು ತಮ್ಮ ಉತ್ತರವನ್ನು ಆಗಾಗ್ಗೆ ಬದಲಾಯಿಸುತ್ತಿದ್ದರು. ಆದರೆ ಅಪರಾಧದಲ್ಲಿ ಅವನ ಪಾಲ್ಗೊಳ್ಳುವಿಕೆಯನ್ನು ಸಾಬೀತುಪಡಿಸಲು 42 ಸಾಕ್ಷಿಗಳು ನ್ಯಾಯಾಲಯದಲ್ಲಿ ಸಾಕ್ಷ್ಯ ನೀಡಿದ್ದರು. ಪ್ರಕರಣದ ಇತರ ಆರೋಪಿಗಳು ತಲೆಮರೆಸಿಕೊಂಡಿದ್ದಾರೆ. ಲೈಲಾ ಖಾನ್, ಆಕೆಯ ತಾಯಿ, ಒಡಹುಟ್ಟಿದವರ ಅವಶೇಷಗಳನ್ನು ಡಿಎನ್ಎ ಪರೀಕ್ಷೆಯ ಮೂಲಕ ಗುರುತಿಸಲಾಗಿತ್ತು. 2002ರಲ್ಲಿ ಲೈಲಾ ಖಾನ್ ಕನ್ನಡ ಚಲನಚಿತ್ರಗಳೊಂದಿಗೆ ತಮ್ಮ ವೃತ್ತಿಜೀವನ ಪ್ರಾರಂಭಿಸಿದ್ದರು ಎಂಬುದು ಇಲ್ಲಿ ಗಮನಿಸಬೇಕಾದ ಅಂಶ.
ಇದನ್ನೂ ಓದಿ : ಟಿಎಂಸಿ ವಿರುದ್ಧ ಜಾಹೀರಾತಿಗೆ ನಿರ್ಬಂಧ: ಹೈಕೋರ್ಟ್ ಆದೇಶ ಪ್ರಶ್ನಿಸಿ ಸುಪ್ರೀಂ ಮೆಟ್ಟಿಲೇರಿದ ಬಿಜೆಪಿ - BJP TMC Advt Politics
