ರಾಂಚಿ (ಜಾರ್ಖಂಡ್): ಲೋಕಸಭೆ ಚುನಾವಣೆಯ ನಡುವೆ ಛತ್ತೀಸ್ಗಢ ಮತ್ತು ಜಾರ್ಖಂಡ್ನಲ್ಲಿ ನಕ್ಸಲೀಯರ ಹಾವಳಿ ಜೋರಾಗಿದೆ. ಛತ್ತೀಸ್ಗಢದಲ್ಲಿ ಕಳೆದ ನಾಲ್ಕು ತಿಂಗಳಲ್ಲಿ ನಡೆದ ನಕ್ಸಲ್ ನಿಗ್ರಹ ಕಾರ್ಯಾಚರಣೆಯಲ್ಲಿ 90ಕ್ಕೂ ಅಧಿಕ ಮಾವೋವಾದಿಗಳನ್ನು ಹತ್ಯೆ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಈ ನಡುವೆ ಜಾರ್ಖಂಡ್ನಲ್ಲೂ ಕಾರ್ಯಾಚರಣೆ ಜೋರಾಗಿದೆ.
ಜಾರ್ಖಂಡ್ನ ಖುಂಟಿ ಜಿಲ್ಲೆಯಲ್ಲಿ ಗುರುವಾರ ಎನ್ಕೌಂಟರ್ ನಡೆಸಲಾಗಿದ್ದು, ಓರ್ವ ನಕ್ಸಲ್ ಸಾವಿಗೀಡಾಗಿದ್ದಾನೆ ಎಂದು ತಿಳಿದುಬಂದಿದೆ. ಇಲ್ಲಿನ ಕೊಚಾಂಗ್‌ನಲ್ಲಿರುವ ಸರ್ವದಾ ಅರಣ್ಯದಲ್ಲಿ ಪೊಲೀಸರು ಮತ್ತು ಮಾವೋವಾದಿಗಳ ನಡುವೆ ಗುಂಡಿನ ಚಕಮಕಿ ನಡೆದಿದೆ. ಇದರಲ್ಲಿ ನಕ್ಸಲೀಯನೊಬ್ಬನ ಸಾವಿನ ಬಗ್ಗೆ ಮಾಹಿತಿ ಇದೆ. ಮಾವೋವಾದಿಗಳು ಅರಣ್ಯದಲ್ಲಿ ಅಡಗಿದ್ದಾರೆ ಎಂದು ಮಾಹಿತಿ ಬಂದ ಹಿನ್ನೆಲೆಯಲ್ಲಿ ಕೋಬ್ರಾ ಪಡೆ ಮತ್ತು ಪೊಲೀಸರು ಜಂಟಿ ಕಾರ್ಯಾಚರಣೆ ನಡೆಸಿದ್ದಾರೆ.
ಸರ್ವದಾ ಅರಣ್ಯದಲ್ಲಿ ಎನ್ಕೌಂಟರ್: ಸರ್ವದಾ ಅರಣ್ಯದಲ್ಲಿ ಮಾವೋವಾದಿಗಳನ್ನು ಪೊಲೀಸರು ಬೆನ್ನಟ್ಟಿ ಎನ್ಕೌಂಟರ್ ಮಾಡಿದ್ದಾರೆ. ಇನ್ನೂ ಗುಂಡಿನ ಚಕಮಕಿ ನಡೆಯುತ್ತಲೇ ಇದೆ. ಒಬ್ಬ ನಕ್ಸಲ್ ಹತ್ಯೆಯಾಗಿರುವ ಬಗ್ಗೆ ಖುಂಟಿ ಡಿಎಸ್ಪಿ ವರುಣ್ ರಜಾಕ್ ಖಚಿತಪಡಿಸಿದ್ದಾರೆ. ಈ ಪ್ರದೇಶವು ಹೆಚ್ಚು ನಕ್ಸಲ್ ಬಾಧಿತವಾಗಿದ್ದು, ಗುಂಡಿನ ಚಕಮಕಿ ಮುಗಿದ ನಂತರವೇ ಸಾವು ನೋವುಗಳ ಬಗ್ಗೆ ಖಚಿತ ಮಾಹಿತಿ ಸಿಗಲಿದೆ ಎಂದು ಅವರು ಹೇಳಿದರು.
ಮೇ 25 ರಂದು ನಡೆಯುವ 6ನೇ ಹಂತದ ಲೋಕಸಭೆ ಚುನಾವಣೆಯಲ್ಲಿ ಜಾರ್ಖಂಡ್ನ ನಾಲ್ಕು ಸ್ಥಾನಗಳಿಗೆ ಮತದಾನವಾಗಲಿದೆ. ರಾಂಚಿ, ಧನ್‌ಬಾದ್, ಗಿರಿದಿಹ್ ಮತ್ತು ಜಮ್‌ಶೆಡ್‌ಪುರ ಲೋಕಸಭಾ ಕ್ಷೇತ್ರಗಳು ಮತದಾನಕ್ಕೆ ಸಜ್ಜಾಗಿವೆ. ಇಂದು ಎನ್ಕೌಂಟರ್ ನಡೆದ ಖುಂಟಿ ಪ್ರದೇಶವು ರಾಂಚಿ ಲೋಕಸಭಾ ಕ್ಷೇತ್ರದಲ್ಲಿ ಬರುತ್ತದೆ.
ಹೀಗಾಗಿ, ರಾಂಚಿ ಪಕ್ಕದ ನಕ್ಸಲ್ ಪೀಡಿತ ಗಡಿ ಪ್ರದೇಶಗಳಲ್ಲಿ ವಿಶೇಷ ನಿಗಾ ವಹಿಸಲಾಗಿದೆ. ನಕ್ಸಲೀಯರು ಚುನಾವಣೆಯ ಮೇಲೆ ಪ್ರಭಾವ ಬೀರಲು ಪ್ರಯತ್ನಿಸಬಹುದು ಎಂದು ಪೊಲೀಸರು ಶಂಕಿಸಿದ್ದಾರೆ. ವಿವಿಧೆಡೆ ಕೂಂಬಿಂಗ್ ಕಾರ್ಯಾಚರಣೆ ನಡೆಸಲಾಗುತ್ತಿದೆ.
ಛತ್ತೀಸ್ಗಢದಲ್ಲಿ ಭಾರಿ ಕಾರ್ಯಾಚರಣೆ: ನಕ್ಸಲ್ಪೀಡಿತ ರಾಜ್ಯಗಳಲ್ಲಿ ಒಂದಾದ ಛತ್ತೀಸ್ಗಢದಲ್ಲಿ ಭದ್ರತಾ ಪಡೆಗಳು ಭಾರೀ ಯಶಸ್ಸು ಕಂಡಿವೆ. ಕೆಲ ವರ್ಷಗಳಿಂದ ನಕ್ಸಲ್ ದಮನ ಕಾರ್ಯಾಚರಣೆಯಲ್ಲಿ ನೂರಾರು ಮಾವೋವಾದಿಗಳನ್ನು ಹತ್ಯೆ ಮಾಡಲಾಗಿದೆ. ಅದರಲ್ಲೂ ಈ ವರ್ಷದ 4 ತಿಂಗಳಲ್ಲಿ ಕ್ಷಿಪ್ರಗತಿಯ ಕಾರ್ಯಾಚರಣೆಗೆ ಭರ್ಜರಿ ಯಶಸ್ಸು ಸಿಕ್ಕಿದೆ.
ನಕ್ಸಲರ ಹಾವಳಿಯಿಂದ ಕುಖ್ಯಾತಿಯಾಗಿರುವ ಛತ್ತೀಸ್ಗಢದ ಬಸ್ತಾರ್, ದಾಂತೇವಾಡ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಭದ್ರತಾ ಪಡೆಗಳು ಅರಣ್ಯ ಪ್ರದೇಶದೊಳಗೆ ನುಗ್ಗಿ ನಕ್ಸಲೀಯರನ್ನು ಗುಂಡಿಕ್ಕಿ ಹತ್ಯೆ ಮಾಡುತ್ತಿವೆ. ಈವರೆಗೂ ನಡೆದ ಕಾರ್ಯಾಚರಣೆಯಲ್ಲಿ 500 ಕ್ಕೂ ಅಧಿಕ ಜನರು ಸಾವಿಗೀಡಾಗಿದ್ದಾರೆ. ಅದರಲ್ಲಿ ಕಳೆದ ನಾಲ್ಕು ತಿಂಗಳಲ್ಲಿ 91 ಜನರು ಹತ್ಯೆಯಾಗಿದ್ದರೆ, 205 ಮಂದಿಯನ್ನು ಬಂಧಿಸಲಾಗಿದೆ. 231 ಜನರು ಶರಣಾಗತರಾಗಿ ಬದುಕಿನ ಹಾದಿಯನ್ನು ಬದಲಿಸಿಕೊಂಡಿದ್ದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.
ನಕ್ಸಲ್ವಾದಕ್ಕೆ ಮೂಗುದಾರ: ನಕ್ಸಲ್ವಾದವನ್ನು ಹತ್ತಿಕ್ಕಲು ಸರ್ಕಾರ ಬಿಗಿ ಕ್ರಮಗಳನ್ನು ಕೈಗೊಂಡಿದೆ. ಜೊತೆಗೆ ಶರಣಾಗತರಾಗುವ ಮಾವೋವಾದಿಗಳು ಪುನಶ್ಚೇತನ ಶಿಬಿರಗಳನ್ನು ರೂಪಿಸಿದೆ. ಬಸ್ತಾರ್ನಲ್ಲಿ 80 ಕ್ಕೂ ಅಧಿಕ ಭದ್ರತಾ ಪಡೆಗಳ ಶಿಬಿರಗಳನ್ನು ರೂಪಿಸಿ, ಕಾವಲು ಕಾಯುತ್ತಿವೆ. ಇದರಿಂದಾಗಿ 2024 ನಕ್ಸಲರಿಗೆ ನುಂಗುಲಾರದ ತುತ್ತಾಗಿ ಪರಿಣಮಿಸಿದೆ.
ಇದನ್ನೂ ಓದಿ: ತುಮಕೂರು: 7 ಪೊಲೀಸರನ್ನು ಕೊಂದ ಪ್ರಕರಣ, 19 ವಷಗಳ ಬಳಿಕ ನಕ್ಸಲ್ ಕೊತ್ತಗೆರೆ ಶಂಕರ ಬಂಧನ - Naxal Kottagere Shanker arrest
