ಕಾರವಾರ: ನವರಾತ್ರಿ ಉತ್ಸವದ ರಂಗು ಕಾರವಾರದಲ್ಲಿ ಕಳೆಗಟ್ಟಿದ್ದು, ಜಗಮಗಿಸೋ ಲೈಟಿಂಗ್ ಮಧ್ಯೆ ಉತ್ತರಭಾರತದ ಜನಪ್ರಿಯ ನೃತ್ಯ ದಾಂಡಿಯಾಗೆ ಕಡಲನಗರಿ ಜನರು ಹೆಜ್ಜೆ ಹಾಕಿ ಹಬ್ಬವನ್ನು ಸಂಭ್ರಮದಿಂದ ಆಚರಿಸುತ್ತಾರೆ.
ಯುವಕ-ಯುವತಿಯರು, ಹೆಂಗಸರು ಮಕ್ಕಳೆನ್ನದೇ ಎಲ್ಲಾ ವರ್ಗದವರೂ ಕೈಯಲ್ಲಿ ಕೋಲು ಹಿಡಿದು ಡಿಜೆಗೆ ಹೆಜ್ಜೆ ಹಾಕಿ ಸಂಭ್ರಮಿಸುತ್ತಾರೆ. ಇಲ್ಲಿ ಹಲವಾರು ವರ್ಷಗಳಿಂದ ಆಚರಿಸಿಕೊಂಡು ಬರಲಾಗುತ್ತಿರುವ ನವರಾತ್ರಿಯ 9 ರಾತ್ರಿಗಳು ಕೂಡ ದೇವಿಯ ಉತ್ಸವ ಮೂರ್ತಿ ಎದುರು ಗರ್ಬಾ, ದಾಂಡಿಯಾ ನೃತ್ಯವೂ ಕಳೆಕಟ್ಟಲ್ಲಿದ್ದು, ಭಕ್ತರು ಭಕ್ತಿಯೊಂದಿಗೆ ಮನರಂಜಿಸಿಕೊಳ್ಳುವಂತಾಗಿದೆ.
ನವರಾತ್ರಿ ದಾಂಡಿಯಾಕ್ಕಾಗಿ ವಾರಗಳಿಂದಲೇ ಸಿದ್ಧತೆ ನಡೆಸುವ ಕರಾವಳಿಯ ಜನರು ದೇವಿ ದೇವಸ್ಥಾನ ಇಲ್ಲವೇ ಉತ್ಸವ ಮೂರ್ತಿ ಸ್ಥಾಪಿಸಿ ನವರಾತ್ರಿ ಆಚರಿಸುತ್ತಾರೆ. ದೇವಿಗೆ ಒಂಭತ್ತು ದಿನವೂ ಒಂಭತ್ತು ರೀತಿಯ ಅಲಂಕಾರ ಮಾಡಿ ಪೂಜಿಸಲಾಗುತ್ತದೆ.
ಇನ್ನೂ ದಾಂಡಿಯಾ, ಕಾರವಾರಿಗರು ಗುಜರಾತಿಗಳಿಂದ ನೋಡಿ ಕಲಿತ ಕಲೆ. ಹಿಂದೆ ಗುಜರಾತ್ನಿಂದ ಕಾರವಾರಕ್ಕೆ ವ್ಯಾಪಾರಕ್ಕಾಗಿ ಬರುತ್ತಿದ್ದ ಗುಜರಾತಿಗಳು ಒಟ್ಟಾಗಿ ಸೇರಿ ನವರಾತ್ರಿ ವೇಳೆ ದಾಂಡಿಯಾ ನೃತ್ಯ ಮಾಡುತ್ತಿದ್ದರು. ಇದರಿಂದ ಪ್ರಭಾವಿತರಾದ ಕಾರವಾರಿಗರೂ ಕೂಡ ಕ್ರಮೇಣ ಈ ನೃತ್ಯವನ್ನ ಮುಂದುವರೆಸಿಕೊಂಡು ಬಂದಿದ್ದಾರೆ. ಹೀಗಾಗಿ ಪ್ರತಿ ವರ್ಷ ಕಾರವಾರದ ಐತಿಹಾಸಿಕ ಶಿವಾಜಿ ಕೋಟೆಯಲ್ಲಿನ ದುರ್ಗಾದೇವಿ ದೇವಸ್ಥಾನ. ಕುಂಟಿಮಹಾಮ್ಮಾಯಿ, ದೆವಳಿವಾಡ, ಬಾಂಡಿಶಿಟ್ಟಾ, ಕಡವಾಡ ಹೀಗೆ ಹತ್ತಾರು ಭಾಗಗಳಲ್ಲಿ ದಾಂಡಿಯಾ ನೃತ್ಯ ನಡೆಸಲಾಗುತ್ತದೆ.
ಒಟ್ಟಿನಲ್ಲಿ ನವರಾತ್ರಿ ಉತ್ಸವ ಆರಂಭವಾಗುತ್ತಿದ್ದಂತೆ ಕಡಲನಗರಿಯಲ್ಲಿ ಗಮನ ಸೆಳೆಯುವ ಗುಜರಾತಿ ಮೂಲದ ದಾಂಡಿಯಾ ನೃತ್ಯವೂ ವರ್ಷದಿಂದ ವರ್ಷಕ್ಕೆ ಹೆಚ್ಚಿನ ಜನರನ್ನು ಆಕರ್ಷಿಸುತ್ತಿದ್ದು, ಕರಾವಳಿಯಾದ್ಯಂತ ನವರಾತ್ರಿಯನ್ನು ಪ್ರಮುಖ ಹಬ್ಬವಾಗಿ ಆಚರಿಸಲಾಗುತ್ತಿದೆ.