ಚುನಾವಣಾ ಆಯೋಗದಿಂದ ಬಣ್ಣಬಣ್ಣದ ಗುರುತಿನ ಚೀಟಿ, ಅದರಲ್ಲೂ ಲೋಪ!

ಮತದಾರರನ್ನು ಸೆಳೆಯುವ ಸಲುವಾಗಿ ಮೊದಲ ಬಾರಿಗೆ ಕೇಂದ್ರ ಚುನಾವಣಾ ಆಯೋಗವು ಬಣ್ಣಬಣ್ಣದ ಗುರುತಿನ ಚೀಟಿ ವಿತರಿಸಿದೆ. ಆದ್ರೆ ಇದರಲ್ಲೂ ಲೋಪಗಳು ಪತ್ತೆಯಾಗಿವೆ.

ಗಂಗಾವತಿ: ಮತದಾರರನ್ನು ಸೆಳೆಯುವ ಸಲುವಾಗಿ ಮೊದಲ ಬಾರಿಗೆ ಕೇಂದ್ರ ಚುನಾವಣಾ ಆಯೋಗವು ಬಣ್ಣಬಣ್ಣದ ಗುರುತಿನ ಚೀಟಿ ವಿತರಿಸಿದೆ. ಆದರೆ, ಬಹುತೇಕ ಕಾರ್ಡ್​​ಗಳಲ್ಲಿ ದೋಷ ಕಂಡು ಬಂದಿದೆ.

ಗಂಗಾವತಿಯಲ್ಲಿ ಆಯ್ದ ಕೆಲವರ ಮನೆಗಳಿಗೆ ಅಂಚೆ ಇಲಾಖೆ ಮೂಲಕ ಗುರುತಿನ ಚೀಟಿ ವಿತರಣೆ ಮಾಡಲಾಗುತ್ತಿದೆ. ತಾಂತ್ರಿಕ ಲೋಪದೋಷಗಳಿಂದ ಕನ್ನಡದಲ್ಲಿ ವಿವರಣೆ ಸರಿಯಿದ್ದರೆ, ಇಂಗ್ಲಿಷ್​​​ನಲ್ಲಿ ಇರುವ ಮಾಹಿತಿ ತಪ್ಪಿದೆ ಎಂದು ಗುರುತಿನ ಚೀಟಿ ಪಡೆದ ಸ್ಥಳೀಯರು ಆರೋಪಿಸಿದರು.

ಕೆಲ ಗುರುತಿನ ಚೀಟಿಗಳಲ್ಲಿ ಕನ್ನಡ ಭಾಷೆಯಲ್ಲಿ ಅಪ್ಪನ ಹೆಸರು ಒಂದು ರೀತಿಯಿದ್ದರೆ, ಇಂಗ್ಲಿಷ್​​ನಲ್ಲಿ ಬದಲಾಗಿದೆ. ತಾಂತ್ರಿಕ ದೋಷದಿಂದ ಕೂಡಿರುವ ಇವುಗಳ ಸರಿಪಡಿಸುವಿಕೆಗೆ ನಮ್ಮ ಕೆಲಸ-ಕಾರ್ಯಗಳನ್ನೆಲ್ಲ ಬಿಟ್ಟು ಕಚೇರಿಗಳತ್ತ ಅಲೆಯಬೇಕು ಎಂದು ಸಾರ್ವಜನಿಕರು ಬೇಸರ ವ್ಯಕ್ತಪಡಿಸಿದರು. ಕೂಡಲೇ ಚುನಾವಣಾ ಆಯೋಗ ಈ ಕುರಿತು ಗಮನ ಹರಿಸಬೇಕು ಎಂದು ಸಾರ್ವಜನಿಕರು ಒತ್ತಾಯಿಸಿದರು.