ಬೆಂಗಳೂರು/ಯಲಹಂಕ: ಅಂಗನವಾಡಿಗೆ ಭೇಟಿ ನೀಡಲು ತೆರಳುತ್ತಿದ್ದ ಮೇಲ್ವಿಚಾರಕಿ (ಸೂಪರ್ವೈಸರ್) ಅನ್ನು ಅಡ್ಡಗಟ್ಟಿದ ದುಷ್ಕರ್ಮಿಗಳು, ಕಣ್ಣಿಗೆ ಖಾರದ ಪುಡಿ ಎರಚಿ ಚಿನ್ನದ ಸರ ಕಿತ್ತುಕೊಂಡು ಪರಾರಿಯಾದ ಘಟನೆ ಯಲಹಂಕ ತಾಲೂಕಿನ ಲಿಂಗರಾಜಪುರಂನಲ್ಲಿ ನಡೆದಿದೆ.
ಹೆಸರಘಟ್ಟ ಅಂಗನವಾಡಿ ಸೂಪರ್ವೈಸರ್ ಆಗಿರುವ ನಂದಿನಿ ಅಂಗನವಾಡಿ ಕೇಂದ್ರಕ್ಕೆ ಭೇಟಿ ನೀಡಲು ದ್ವಿಚಕ್ರ ವಾಹನದಲ್ಲಿ ತೆರಳುತ್ತಿದ್ದರು. ಈ ವೇಳೆ ಹಿಂಬದಿಯಿಂದ ಕಾರಿನಲ್ಲಿ ಬಂದ ನಾಲ್ವರು ದರೋಡೆಕೋರರು ಯಲಹಂಕ- ಮಾವಳ್ಳಿಪುರ ರಸ್ತೆ ಬಳಿ ಆಕೆಯನ್ನು ಅಡ್ಡಗಟ್ಟಿ, ಖಾರದ ಪುಡಿ ಎರಚಿ ಚಿನ್ನದ ಸರ ಕಿತ್ತುಕೊಂಡಿದ್ದಾರೆ.
ನಂತರ ಅಂಗನವಾಡಿ ಸೂಪರ್ವೈಸರ್ಅನ್ನು ಹಳ್ಳಕ್ಕೆ ತಳ್ಳಿದ ಖದೀಮರು, ಮತ್ತೊಂದು ಕಾರು ಬರುವುದನ್ನು ಗಮನಿಸಿ ಅಲ್ಲಿಂದ ಪರಾರಿಯಾಗಿದ್ದಾರೆ.
ಈ ಕುರಿತು ರಾಜಾನುಕುಂಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
