ನ್ಯೂಯಾರ್ಕ್ : ಆಸ್ಟ್ರೀಯಾದ ಡೊಮೆನಿಕ್ ಥೀಮ್ ಮತ್ತು ಜರ್ಮನಿಯ ಅಲೆಕ್ಸಾಂಡರ್ ಜ್ವರೆವ್ ಭಾನುವಾರ ಯುಎಸ್ ಓಪನ್ ಫೈನಲ್ನಲ್ಲಿ ಚಾಂಪಿಯನ್ ಪಟ್ಟಕ್ಕೆ ಕಾದಾಡಲಿದ್ದಾರೆ. ಈ ಇಬ್ಬರಲ್ಲಿ ಯಾರೇ ಗೆದ್ದರು 6 ವರ್ಷಗಳ ಬಳಿಕ ಯುಎಸ್ ಓಪನ್ ಗೆದ್ದ ಹೊಸ ಟೆನ್ನಿಸ್ ಪ್ಲೇಯರ್ ಎನಿಸಿಕೊಳ್ಳಲಿದ್ದಾರೆ.
ಟೂರ್ನಿಯಲ್ಲಿ 2ನೇ ಶ್ರೇಯಾಂಕ ಪಡೆದಿರುವ ಥೀಮ್ ಕಳೆದ ಮೂರು ಗ್ರ್ಯಾಂಡ್ಸ್ಲಾಮ್ ಫೈನಲ್ನಲ್ಲಿ ಸೋಲು ಕಂಡಿದ್ದಾರೆ. 2 ಬಾರಿ ನಡಾಲ್ ವಿರುದ್ಧದ ಫ್ರೆಂಚ್ ಓಪನ್ನಲ್ಲಿ, ಒಮ್ಮೆ ಜೋಕೊವಿಕ್ ವಿರುದ್ಧ ಆಸ್ಟ್ರೇಲಿಯಾ ಓಪನ್ನಲ್ಲಿ ಸೋಲು ಕಂಡಿದ್ದಾರೆ.
2020ರ ಯುಎಸ್ ಓಪನ್ನಲ್ಲಿ ರೋಜರ್ ಫೆಡೆರರ್ ಹಾಗೂ ರಾಫೆಲ್ ನಡಾಲ್ ಹಿಂದೆ ಸರಿದಿದ್ದರು. ಜೋಕೊವಿಕ್ ಕ್ವಾರ್ಟರ್ ಫೈನಲ್ ವೇಳೆ ಅನರ್ಹಗೊಂಡಿದ್ದರು. ಈ ಮೂವರ ಅನುಪಸ್ಥಿತಿಯಲ್ಲಿ 2014ರ ಬಳಿಕ ಹೊಸ ಟೆನ್ನಿಸ್ ಪ್ಲೇಯರ್ ಗ್ರ್ಯಾಂಡ್ಸ್ಲಾಮ್ ಟ್ರೋಫಿ ಎತ್ತಿ ಹಿಡಿಯಲಿದ್ದಾರೆ.
ಈ ಮೂವರನ್ನು ಹೊರೆತುಪಡಿಸಿ 2014ರಲ್ಲಿ ಮರಿನ್ ಸಿಲಿಕ್ ಜಪಾನ್ ಕೀ ನಿಶಿಕೋರಿಯನ್ನು ಮಣಿಸಿ ಯುಎಸ್ ಓಪನ್ ಗೆದ್ದಿದ್ದರು. ಈ ಇಬ್ಬರು ಆಟಗಾರರಲ್ಲಿ ಯಾರೇ ಗೆದ್ದರೂ ಇದು ಅವರಿಗೆ ಚೊಚ್ಚಲ ಗ್ರ್ಯಾಂಡ್ಸ್ಲಾಮ್ ಪ್ರಶಸ್ತಿಯಾಗಲಿದೆ.
