ನವದೆಹಲಿ: ಮಾಜಿ ಚಾಂಪಿಯನ್ ಸೈನಾ ನೆಹ್ವಾಲ್ ವಿಶ್ವ ಚಾಂಪಿಯನ್ಶಿಪ್ ಕಂಚಿನ ಪದಕ ವಿಜೇತ ಲಕ್ಷ್ಯ ಸೇನ್ ಹಾಗೂ ಹೆಚ್.ಎಸ್.ಪ್ರಣಯ್ ಬುಧವಾರ ಇಂಡಿಯಾ ಓಪನ್ನ ಮೊದಲ ಸುತ್ತಿನಲ್ಲಿ ಜಯ ಸಾಧಿಸಿದ್ದಾರೆ.
ಗಾಯದ ಕಾರಣ ಹಲವು ಟೂರ್ನಿಗಳನ್ನು ಮಿಸ್ ಮಾಡಿಕೊಂಡಿದ್ದ ವಿಶ್ವದ ಮಾಜಿ ನಂಬರ್ 1 ಆಟಗಾರ್ತಿ ಸೈನಾ ಎದುರಾಳಿ ಆಟಗಾರ್ತಿ ಜೆಕ್ ಗಣರಾಜ್ಯದ ತೆರೆಸಾ ಸ್ವಾಬಿಕೋವಾ ಗಾಯಗೊಂಡು ನಿವೃತ್ತಿಯಾದ ಕಾರಣ ನಿರಾಯಾಸವಾಗಿ 2ನೇ ಸುತ್ತಿಗೆ ಪ್ರವೇಶ ಪಡೆದರು. ಇದಕ್ಕೂ ಮುನ್ನ ಅವರು 22-20ರ ರೋಚಕ ಕದನದಲ್ಲಿ ಜೆಕ್ ಶಟ್ಲರ್ಗೆ ಸೋಲುಣಿಸಿದ್ದರು.
ಸೈನಾ 2ನೇ ಸುತ್ತಿನಲ್ಲಿ ತಮ್ಮ ಸಹ ಶಟ್ಲರ್ ಸಮಿಯಾ ಇಮದ್ ಫಾರೂಕಿ ಅವರಿಗೆ 21-18, 21-9ರಲ್ಲಿ ಸೋಲುಣಿಸಿರುವ ಭಾರತದವರೇ ಆದ ಮಾಳವಿಕಾ ಬನ್ಸೂದ್ ಅವರನ್ನು ಎದುರಿಸಲಿದ್ದಾರೆ.
ವಿಶ್ವ ಚಾಂಪಿಯನ್ಶಿಪ್ನಲ್ಲಿ ಅಮೋಘ ಪ್ರದರ್ಶನ ತೋರಿ ಕ್ವಾರ್ಟರ್‌ಫೈನಲ್ ತಲುಪಿದ್ದ ಹೆಚ್.ಎಸ್. ಪ್ರಣಯ್ 21-14, 21-7ರಲ್ಲಿ ಸ್ಪೇನ್ನ ಪಬ್ಲೊ ಏಬಿಯನ್ ವಿರುದ್ಧ ಗೆಲುವು ಸಾಧಿಸಿದರು. 2ನೇ ಸುತ್ತಿನಲ್ಲಿ ಫ್ರಾನ್ಸ್ನ ಅರ್ನಾಡ್ ಮರ್ಕಲ್ ವಿರುದ್ಧ 21-16, 15-21, 21-10ರ ಕಠಿಣ ಹೋರಾಟ ನಡೆಸಿ ಗೆದ್ದಿರುವ ಭಾರತದ ಮಿಥುನ್ ಮಂಜುನಾಥ್ ವಿರುದ್ಧ ಸೆಣಸಾಡಲಿದ್ದಾರೆ.
ಭಾರತದ ಭರವಸೆಯ ಶಟ್ಲರ್ 21 ವರ್ಷದ ಲಕ್ಷ್ಯ ಸೇನ್ ತಮ್ಮ ಅಮೋಘ ಆಟ ಮುಂದುವರಿಸಿದ್ದು, ಅವರು ಈಜಿಪ್ಟ್ನ ಅದಮ್ ಹಾತೆಂ ಎಲ್ಗಮಾಲ್ ವಿರುದ್ಧ 21-15, 21-7ರಲ್ಲಿ ಸುಲಭ ಜಯ ಸಾಧಿಸಿದರು. ಇವರು ಸ್ವೀಡನ್ನ ಫೆಲಿಕ್ಸ್ ಬರೆಸ್ಟೆಡ್ ವಿರುದ್ಧ ದ್ವಿತೀಯ ಸುತ್ತಿನ ಪಂದ್ಯವನ್ನಾಡಲಿದ್ದಾರೆ.
ಕಾಮನ್ವೆಲ್ತ್ ಬೆಳ್ಳಿ ಪದಕ ವಿಜೇತ ಸಾತ್ವಿಕ್ ಸಾಯಿರಾಜ್ ಮತ್ತು ಚಿರಾಗ್ ಶೆಟ್ಟಿ ಜೋಡಿ 21-14,21-10ರಿಂದ ಭಾರತದ ಚಿರಾಗ್ ಅರೋರಾ ಮತ್ತು ರವಿ ವಿರುದ್ಧ ಗೆಲುವು ಸಾಧಿಸಿ ಟೂರ್ನಿಯಲ್ಲಿ ತಮ್ಮ ಅಭಿಯಾನ ಆರಂಭಿಸಿದ್ದಾರೆ.
ಈಗಾಗಲೇ ಪಿ.ವಿ.ಸಿಂಧು, ಕಿಡಂಬಿ ಶ್ರೀಕಾಂತ್ ಮತ್ತು ಸಮೀರ್ ವರ್ಮಾ ಈಗಾಗಲೇ ದ್ವಿತೀಯ ಸುತ್ತು ಪ್ರವೇಶಿಸಿದ್ದಾರೆ.
ಇದನ್ನೂ ಓದಿ:ನಟ ಸಿದ್ಧಾರ್ಥ್ ಕ್ಷಮೆ ಕೇಳಿದ್ದರಿಂದ ಸಂತಸವಾಗಿದೆ: ಬ್ಯಾಡ್ಮಿಂಟನ್ ತಾರೆ ಸೈನಾ ನೆಹ್ವಾಲ್
