ಮ್ಯಾಡ್ರಿಡ್: ಎರಡು ಬಾರಿಯ ಒಲಂಪಿಕ್ ಪದಕ ವಿಜೇತೆ, ಭಾರತದ ತಾರಾ ಶಟ್ಲರ್ ಪಿ.ವಿ.ಸಿಂಧು ಅವರು ಶನಿವಾರ ಇಲ್ಲಿ ನಡೆದ ಮ್ಯಾಡ್ರಿಡ್ ಸ್ಪೇನ್ ಮಾಸ್ಟರ್ಸ್ ಸೂಪರ್ 300 ಟೂರ್ನ್ಮೆಂಟ್‌ನ ಫೈನಲ್ ತಲುಪಿದ್ದಾರೆ. ಸಿಂಗಾಪುರದ ಯೆಯೊ ಜಿಯಾ ಮಿನ್ ವಿರುದ್ಧ ನಡೆದ ಸೆಮಿಫೈನಲ್ನಲ್ಲಿ ನೇರ ಗೇಮ್‌ಗಳ ಜಯ ಸಾಧಿಸುವ ಮೂಲಕ ವರ್ಷದ ಮೊದಲ ಪ್ರಶಸ್ತಿ ಸುತ್ತಿಗೆ ತೇರ್ಗಡೆ ಹೊಂದಿದ್ದಾರೆ.
ವಿಶ್ವ ಬ್ಯಾಡ್ಮಿಂಟನ್ನಲ್ಲಿ 11 ನೇ ಶ್ರೇಯಾಂಕದ ಸಿಂಧು 48 ನಿಮಿಷಗಳ ಕಠಿಣ ಹೋರಾಟ ನಡೆಸಿ ಮಹಿಳೆಯರ ಸಿಂಗಲ್ಸ್ ಸೆಮಿಫೈನಲ್ನಲ್ಲಿ ಕೆಳ ಶ್ರೇಯಾಂಕದ ಸಿಂಗಾಪುರದ ಶಟ್ಲರ್ ವಿರುದ್ಧ 24-22, 22- 20 ಅಂತರದಿಂದ ರೋಚಕ ಗೆಲುವು ಸಾಧಿಸಿದರು.
ಪಂದ್ಯದಲ್ಲಿ ಉಭಯ ಆಟಗಾರ್ತಿಯರು ಸಮಬಲ ಸಾಧಿಸಿದರು. ಮೊದಲ ಸೆಟ್ನಲ್ಲಿ ಸಿಂಗಾಪುರದ ಶಟ್ಲರ್ ಯೆಯೊ ಆರಂಭದಲ್ಲೇ 4-0 ಅಂತರದ ಮುನ್ನಡೆ ಪಡೆದರು. ಆಟ ಮುಂದುವರಿದಂತೆ 15-20 ರಲ್ಲಿ ಮುನ್ನಡೆ ಪಡೆದು ಸೆಟ್ ಗೆಲುವಿನ ಸನಿಹದಲ್ಲಿದ್ದರು. ಆದರೆ, ಈ ವೇಳೆ ತಮ್ಮ ಕೌಶಲ್ಯ ಪ್ರದರ್ಶಿಸಿದ ಭಾರತೀಯ ಶಟ್ಲರ್ ಸಿಂಧು 20-20 ರಲ್ಲಿ ಸಮಬಲ ಸಾಧಿಸಿದರು. ಇದಾದ ಬಳಿಕವೂ ಪಟ್ಟು ಬಿಡದ ಆಟಗಾರ್ತಿಯರು 22-22 ರಲ್ಲಿ ಸಾಗಿದರು. ಕೊನೆಗೆ ಸಿಂಧು ಚಾಣಾಕ್ಷ್ಯತನದಿಂದ ಗೇಮ್ ಪಾಯಿಂಟ್ ಪಡೆದು 24-22 ರಲ್ಲಿ ಸೆಟ್ ಜಯಿಸಿದರು.
ರೋಚಕ ಗೇಮ್: ಎರಡನೇ ಗೇಮ್‌ನಲ್ಲೂ ಸಿಂಧು 1-4 ರಿಂದ ಆರಂಭಿಕ ಹಿನ್ನಡೆ ಅನುಭವಿಸಿದರು. ಮಧ್ಯಂತರದಲ್ಲಿ 11-6 ಅಂತರ ಕಾಪಾಡಿಕೊಂಡು 5 ಪಾಯಿಂಟ್‌ಗಳ ಮುನ್ನಡೆ ಸಾಧಿಸಿದರು. ಈ ಹಂತದಲ್ಲಿ ವಿಶ್ವ ಶ್ರೇಯಾಂಕದಲ್ಲಿ 33 ನೇ ಸ್ಥಾನದಲ್ಲಿರುವ ಯೆಯೊ ಜಿಯಾ ಮಿನ್ ತಿರುಗಿಬಿದ್ದು 17-17 ರಲ್ಲಿ ಸಮಬಲ ಸಾಧಿಸಿದರು. ಸುಂದರ ಡ್ರಾಪ್ ಶಾಟ್ಗಳ ಮೂಲಕ ಪಾಯಿಂಟ್ ಗಳಿಸಿದರು.
ತಕ್ಷಣವೇ ಎಚ್ಚೆತ್ತ ಸಿಂಧು ಸತತ ಎರಡು ಪಾಯಿಂಟ್ ಗಳಿಸಿದರು. ಪಂದ್ಯ ಗೆಲ್ಲಲು 2 ಪಾಯಿಂಟ್ ಇದ್ದಾಗ, ಸಿಂಗಾಪುರ ಆಟಗಾರ್ತಿ ಸ್ವಯಂಕೃತ ಅಪರಾಧ ಎಸಗಿ ವೈಡ್ ಡ್ರೈವಿಂಗ್ ಮಾಡುವ ಮೂಲಕ ಭಾರತೀಯ ಆಟಗಾರ್ತಿ ಮುಂದೆ ಮಂಡಿಯೂರಿದರು. ಸಿಂಧು ಈ ಸೆಟ್ ಅನ್ನು 22-20 ರಲ್ಲಿ ಗೆಲುವು ಸಾಧಿಸಿದರು.
ಕಳೆದ ವರ್ಷ ಕಾಮನ್ವೆಲ್ತ್ ಗೇಮ್ಸ್ನಲ್ಲಿ ಚಿನ್ನ ಗೆದ್ದ ನಂತರ ಸಿಂಧುಗೆ ಇದು ಮೊದಲ ಫೈನಲ್ ಆಗಿದೆ. ಗಾಯದಿಂದಾಗಿ ದೀರ್ಘ ಕಾಲ ಅಂಗಳದಿಂದ ಹೊರಗುಳಿದಿದ್ದ ಸಿಂಧು ಮ್ಯಾಡ್ರಿಡ್ ಸ್ಪೇನ್ ಮಾಸ್ಟರ್ಸ್ ಮೂಲಕ ಮತ್ತೆ ಸ್ಪರ್ಧಾ ಕಣಕ್ಕೆ ಇಳಿದಿದ್ದಾರೆ. ಈ ಋತುವಿನಲ್ಲಿ ಫಾರ್ಮ್‌ಗಾಗಿ ಹೆಣಗಾಡುತ್ತಿರುವ ಸಿಂಧುಗೆ ಈ ಗೆಲುವು ದೊಡ್ಡ ಸ್ಥೆರ್ಯ ನೀಡಿದೆ. ಡಬಲ್ ಒಲಿಂಪಿಕ್ಸ್ ಪದಕ ಗೆದ್ದಿದ್ದ ಆಟಗಾರ್ತಿ 2016 ರಲ್ಲಿ ಮೊದಲ ಬಾರಿಗೆ ಟಾಪ್ 10 ಪಟ್ಟಿಯಿಂದ ಹೊರಬಿದ್ದಿದ್ದಾರೆ.
ಕೆಲ ದಿನಗಳ ಹಿಂದೆ ಪ್ರತಿಷ್ಠಿತ ಆಲ್ ಇಂಗ್ಲೆಂಡ್ ಚಾಂಪಿಯನ್‌ಶಿಪ್‌ನಲ್ಲಿ ಸ್ಪರ್ಧಿಸಿ, ಮೊದಲ ಸುತ್ತಿನಲ್ಲೆ ಹೊರಬಿದ್ದಿದ್ದರು. ಈ ತಿಂಗಳ ಆರಂಭದಲ್ಲಿ ನಡೆದ ಸ್ವಿಸ್ ಓಪನ್ನಲ್ಲಿ ಉತ್ತಮವಾಗಿ ಆಡದೇ ಪ್ರಶಸ್ತಿಯನ್ನು ಉಳಿಸಿಕೊಳ್ಳುವಲ್ಲಿ ವಿಫಲರಾದರು. ಜನವರಿಯಲ್ಲಿ ನಡೆದ ಇಂಡಿಯನ್ ಓಪನ್ ಮತ್ತು ಮಲೇಷ್ಯಾ ಓಪನ್ನಲ್ಲಿ ಮೊದಲ ಸುತ್ತಿನಲ್ಲೇ ನಿರ್ಗಮಿಸಿದ್ದರು.
ಸಿಂಧು- ತುಂಜುಂಗ್ ಮಧ್ಯೆ ಫೈನಲ್: ಫೈನಲ್ನಲ್ಲಿ ಅವರು ಇಂಡೋನೇಷ್ಯಾದ ಜಾರ್ಜಿಯಾ ಮರಿಸ್ಕಾ ತುಂಜುಂಗ್ ಅವರ ವಿರುದ್ಧ ಸೆಣಸಾಡಲಿದ್ದಾರೆ. 2ನೇ ಸೆಮಿಫೈನಲ್ನಲ್ಲಿ ಜಾರ್ಜಿಯಾ ಅವರು ಸ್ಪೇನ್ನ ಆಟಗಾರ್ತಿ, ವಿಶ್ವದ 7 ನೇ ಶ್ರೇಯಾಂಕಿತೆ ಕ್ಯಾರೋಲಿನಾ ಮರಿನ್ ವಿರುದ್ಧ 10-21, 21-15, 21-10 ಅರಂತದಿಂದ ಗೆಲುವು ಸಾಧಿಸಿದರು. ಜಾರ್ಜಿಯಾ ಮರಿಸ್ಕಾ ತುಂಜುಂಗ್ ವಿಶ್ವ ಶ್ರೇಯಾಂಕದಲ್ಲಿ 12 ನೇ ಸ್ಥಾನದಲ್ಲಿದ್ದಾರೆ.
ಇದನ್ನೂ ಓದಿ: 1960 ರ ದಶಕದ ಸ್ಟಾರ್ ಕ್ರಿಕೆಟಿಗ ಸಲೀಂ ದುರಾನಿ ನಿಧನ
