ನವದೆಹಲಿ : ವಿಶ್ವ ಚಾಂಪಿಯನ್ ಲೋಹ್ ಕೀನ್ ಯಿವ್‌ರನ್ನು ಮಣಿಸುವ ಮೂಲಕ ತಾವು ಪಾದಾರ್ಪಣೆ ಮಾಡಿದ ಮೊದಲ ಇಂಡಿಯಾ ಓಪನ್ ಟೂರ್ನಿಯಲ್ಲೇ ಪ್ರಶಸ್ತಿ ಗೆದ್ದ ಭಾರತದ ಮೊದಲ ಶಟ್ಲರ್ ಎಂಬ ಹೆಗ್ಗಳಿಕೆಗೆ ಲಕ್ಷ್ಯ ಸೇನ್ ಪಾತ್ರರಾಗಿದ್ದಾರೆ.
ಭಾನುವಾರ ನವದೆಹಲಿಯಲ್ಲಿ ನಡೆದ ಇಂಡಿಯಾ ಓಪನ್ ರೋಚಕ ಫೈನಲ್ನಲ್ಲಿ ಲಕ್ಷ್ಯ ಸೇನ್ ಸಿಂಗಾಪುರದ ಕೀನ್ ಯಿವ್ ವಿರುದ್ಧ 24-22, 21-17ರಲ್ಲಿ ಗೆಲುವು ಸಾಧಿಸಿ ಚಾಂಪಿಯನ್ ಎನಿಸಿಕೊಂಡರು.
ಕೀನ್ ಡಿಸೆಂಬರ್ನಲ್ಲಿ ಭಾರತದ ನಂಬರ್ 1 ಶಟ್ಲರ್ ಶ್ರೀಕಾಂತ್ರನ್ನು ಫೈನಲ್ನಲ್ಲಿ ಮಣಿಸಿ ವಿಶ್ವಚಾಂಪಿಯನ್ಶಿಪ್ ಟೈಟಲ್ ಗೆದ್ದುಕೊಂಡಿದ್ದರು. ಆದರೆ, ಇಂದು ಭಾರತದ ಯುವ ಶಟ್ಲರ್ 54 ನಿಮಿಷ ನಡೆದ ಪಂದ್ಯದಲ್ಲಿ ನೇರ ಗೇಮ್ಗಳ ಅಂತರದಲ್ಲಿ ಚಾಂಪಿಯನ್ಗೆ ಮಣ್ಣುಮುಕ್ಕಿಸಿದರು.
ಬಿಡಬ್ಲ್ಯೂಎಫ್ನಲ್ಲಿ ಲಕ್ಷ್ಯ ಸೇನ್ಗೆ ಇದು ಚೊಚ್ಚಲ ಕಿರೀಟವಾಗಿದೆ. ಅವರು ಡಿಸೆಂಬರ್ನಲ್ಲಿ ನಡೆದಿದ್ದ ವಿಶ್ವಚಾಂಪಿಯನ್ಶಿಪ್ ಭಾರತದ ಶ್ರೀಕಾಂತ್ ವಿರುದ್ಧ ಸೆಮಿಫೈನಲ್ನಲ್ಲಿ ಸೋಲು ಕಂಡು ಕಂಚಿನ ಪದಕ ಗೆದ್ದಿದ್ದರು. ಇದೀಗ ಸೀನಿಯರ್ ವಿಭಾಗದಲ್ಲಿ ಮೊದಲ ಪ್ರಶಸ್ತಿ ಗೆದ್ದಿದ್ದಾರೆ.
ಮಹಿಳೆಯರ ಫೈನಲ್ನಲ್ಲಿ ಥಾಯ್ಲೆಂಡ್ನ ಬುಸನಾನ್ ತಮ್ಮದೇ ದೇಶದ ಸುಪನಿಡಾ ಕೆಟತಾಂಗ್ ವಿರುದ್ಧ 22-2-, 19-21, 21-13ರಲ್ಲಿ ಗೆದ್ದು ಚಾಂಪಿಯನ್ ಆದರು.
ಡಬಲ್ಸ್ ಕಿರೀಟ ಮುಡಿಗೇರಿಸಿಕೊಂಡ ಸಾತ್ವಿಕ್-ಚಿರಾಗ್ ಜೋಡಿ
ಭಾರತದ ನಂಬರ್ 1 ಜೋಡಿಯಾಗಿರುವ ಸಾತ್ವಿಕ್ ಸಾಯಿರಾಜ್ ರಾಂಕಿರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ ಜೋಡಿ ಭಾನುವಾರ ನಡೆದ ಪುರುಷರ ಡಬಲ್ಸ್ ಟೂರ್ನಿಯಲ್ಲಿ ನಂಬರ್ 1 ಶ್ರೇಯಾಂಕ ಪಡೆದಿದ್ದ ಇಂಡೋನೇಷ್ಯಾದ ಮೊಹಮ್ಮದ್ ಅಶಾನ್ ಮತ್ತು ಹೆಂಡ್ರಾ ಸೆಟಿಯಾವಾನ್‌ರನ್ನು 21-16, 26-24 ರೋಚಕ ಕದನದಲ್ಲಿ ಮಣಿಸಿ ಚಾಂಪಿಯನ್ ಆದರು.
