ನವದೆಹಲಿ: 2022ರ ಇಂಡಿಯಾ ಓಪನ್ ಗೆದ್ದಿರುವುದು ವೃತ್ತಿಜೀವನದ ದೊಡ್ಡ ವರ್ಲ್ಡ್ ಟೂರ್ ಟೂರ್ನಮೆಂಟ್ ಎಂದು ಸಂತಸ ವ್ಯಕ್ತಪಡಿಸಿರುವ ಭಾರತೀಯ ಯುವ ಶಟ್ಲರ್ ಲಕ್ಷ್ಯ ಸೇನ್, ಪಂದ್ಯದ ಕೊನೆಯಲ್ಲಿ ಸ್ವಲ್ಪ ಒತ್ತಡ ಮತ್ತು ಆತಂಕ ಎದುರಿಸಿದ್ದಾಗಿ ಹೇಳಿಕೊಂಡಿದ್ದಾರೆ.
ಭಾನುವಾರ ನವದೆಹಲಿಯ ಕೆಡಿ ಜಾಧವ್ ಸ್ಟೇಡಿಯಂನಲ್ಲಿ ನಡೆದ ಯುನೆಕ್ಸ್ ಇಂಡಿಯಾ ಓಪನ್ ಫೈನಲ್ನಲ್ಲಿ 20 ವರ್ಷದ ಲಕ್ಷ್ಯ ಹಾಲಿ ವಿಶ್ವಚಾಂಪಿಯನ್ ಆಗಿರುವ ಸಿಂಗಾಪುರದ ಲೋಹ್ ಕೀನ್ ಯಿವ್ ವಿರುದ್ಧ 24-22, 21-17 ಗೇಮ್ಗಳ ರೋಚಕ ಜಯ ಸಾಧಿಸಿ ವೃತ್ತಿ ಜೀವನದ ಮೊದಲ ಸೂಪರ್ 500 ಪ್ರಶಸ್ತಿ ಜಯಿಸಿದ್ದರು.
"ಇದು ನಾನು ಗೆಲ್ಲುವಲ್ಲಿ ಯಶಸ್ವಿಯಾದ ಅತಿದೊಡ್ಡ ವಿಶ್ವ ಟೂರ್ ಟೂರ್ನಮೆಂಟ್. ಗೆಲುವಿನ ಈ ಭಾವನೆ ಉತ್ತಮವಾಗಿದೆ. ಆದರೆ ಪಂದ್ಯ ಮುಕ್ತಾಯದ ಹಂತದಲ್ಲಿ ಗೇಮ್ ಮುಗಿಸುವುದಕ್ಕೆ ನಾನು ಸ್ವಲ್ಪ ಆತಂಕ ಮತ್ತು ಒತ್ತಡಕ್ಕೆ ಒಳಗಾಗಿದ್ದೆ. ಏಕೆಂದರೆ, ಇದು ನನಗೆ ದೊಡ್ಡ ಪಂದ್ಯಾವಳಿಯಾಗಿತ್ತು. ಅದರಲ್ಲೂ ನಾನು ಫೈನಲ್ನಲ್ಲಿ ಆಡುತ್ತಿದ್ದೆ. ಅಂತಿಮವಾಗಿ ನಾನು ಪಾಯಿಂಟ್‌ಗಳನ್ನು ಪಡೆಯುವಲ್ಲಿ ಯಶಸ್ವಿಯಾದೆ. ಈ ಗೆಲುವು ಸಾಧಿಸಿದ್ದಕ್ಕೆ ನನಗೆ ತುಂಬಾ ಸಂತೋಷವಾಗಿದೆ " ಎಂದು ವರ್ಚುವಲ್ ಮಾಧ್ಯಮಗೋಷ್ಟಿಯಲ್ಲಿ ಸೇನ್ ಹೇಳಿದ್ದಾರೆ.
ಲೋಹ್ ಕೀನ್ ಯೂ ಅವರೊಂದಿಗಿನ ಅವರ ಸಮೀಕರಣದ ಬಗ್ಗೆ ಬಗ್ಗೆ ಮಾತನಾಡಿ, "ಆತನೊಬ್ಬ ಮೋಜಿನ ವ್ಯಕ್ತಿ ಎಂದು ನಾನು ಭಾವಿಸುತ್ತೇನೆ, ಅವರು ಕೋರ್ಟ್ನಲ್ಲಿ ಅತ್ಯಂತ ತಮಾಷೆಯಾಗಿರುತ್ತಾರೆ. ನಾವಿಬ್ಬರು ಕೋರ್ಟ್‌ನ ಹೊರಗೂ ಉತ್ತಮ ಸ್ನೇಹಿತರು ಮತ್ತು ನಾವು ಪರಸ್ಪರ ವಿರುದ್ಧವಾಗಿ ಆಡುವ ಸಂದರ್ಭದಲ್ಲಿ ಪ್ರಬಲ ಸ್ಪರ್ಧೆಯಿರುತ್ತದೆ. ಸೆಮಿಫೈನಲ್‌ ಮುಗಿದ ನಂತರ ನಾವು ಪರಸ್ಪರ ಮಾತನಾಡಿದ್ದೆವು ಎಂದು ಲಕ್ಷ್ಯ ಸೇನ್ ವಿಶ್ವ ಚಾಂಪಿಯನ್ ಜೊತೆಗಿನ ತಮ್ಮ ಗೆಳೆತನದ ಬಗ್ಗೆ ಹೇಳಿದ್ದಾರೆ.
ಇದೇ 20 ವರ್ಷದ ಯುವಕ ಕಳೆದ ತಿಂಗಳು ನಡೆದಿದ್ದ ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್ಶಿಪ್ನಲ್ಲಿ ಕಂಚಿನ ಪದಕ ಗೆಲ್ಲುವ ಮೂಲಕ ಭಾರತದ ಪರ ಈ ಸಾಧನೆ ಮಾಡಿದ 3ನೇ ಭಾರತೀಯ ಶಟ್ಲರ್ ಎಂಬ ಶ್ರೇಯಕ್ಕೆ ಪಾತ್ರರಾಗಿದ್ದರು. ಇದೀಗ ವರ್ಷದ ಮೊದಲ ಪ್ರಮುಖ ಟೂರ್ನಿಯನ್ನು ಗೆಲ್ಲುವ ಮೂಲಕ 2022ರ ಆವೃತ್ತಿಯನ್ನು ಉತ್ತಮವಾಗಿ ಆರಂಭಿಸಿದ್ದಾರೆ.
ಇದನ್ನೂ ಓದಿ:'ನೋ ವ್ಯಾಕ್ಸಿನ್, ನೋ ಫ್ರೆಂಚ್ ಓಪನ್': ಜೊಕೊವಿಕ್ಗೆ ಫ್ರಾನ್ಸ್ ಸರ್ಕಾರದ ಎಚ್ಚರಿಕೆ
