ಬರ್ಮಿಂಗ್ಹ್ಯಾಮ್: ಭಾರತದ ಯುವ ಶಟ್ಲರ್ ಲಕ್ಷ್ಯ ಸೇನ್ ದಿನದಂದ ದಿನಕ್ಕೆ ಅಗ್ರ ಶ್ರೇಯಾಂಕದ ಸ್ಟಾರ್ ಶಟ್ಲರ್ಗಳಿಗೆ ಸೋಲುಣಿಸುವ ಮೂಲಕ ಬ್ಯಾಡ್ಮಿಂಟನ್ನಲ್ಲಿ ಪ್ರಾಬಲ್ಯ ಸಾಧಿಸುತ್ತಿದ್ದಾರೆ.
ಕಳೆದ ವಾರ ಜರ್ಮನ್ ಓಪನ್ನಲ್ಲಿ ಅಗ್ರ ಶ್ರೇಯಾಂಕದ ಡೆನ್ಮಾರ್ಕ್ ಶಟ್ಲರ್ ವಿಕ್ಟರ್ ಅಕ್ಸೆಲ್ಸನ್ ವಿರುದ್ಧ ಗೆಲುವು ಸಾಧಿಸಿದ್ದ ಲಕ್ಷ್ಯ ಇಂದು, ಮತ್ತೊಬ್ಬ ಡ್ಯಾನಿಶ್ ಶಟ್ಲರ್ ಆ್ಯಂಡರ್ಸ್ ಆ್ಯಂಟನ್ಸೆನ್ ವಿರುದ್ಧ ವಿಜಯ ಸಾಧಿಸಿದರು.
ಗುರುವಾರ ನಡೆದ ಆಲ್ ಇಂಗ್ಲೆಂಡ್ ಓಪನ್ ಚಾಂಪಿಯನ್ಶಿಪ್ನ 2ನೇ ಸುತ್ತಿನ ಪಂದ್ಯದಲ್ಲಿ ಲಕ್ಷ್ಯ 21-16, 21-18ರಲ್ಲಿ ವಿಶ್ವದ 3ನೇ ಶ್ರೇಯಾಂಕದ ಆಟಗಾರನನ್ನು ಮಣಿಸಿ ಕ್ವಾರ್ಟರ್ ಫೈನಲ್ ತಲುಪಿದರು.
ಮೊದಲ ಗೇಮ್ನಲ್ಲಿ 13-13 ಅಂಕಗಳವರೆಗೂ ತೀವ್ರ ಪೈಪೋಟಿ ಎದುರಿಸಿದ ಲಕ್ಷ್ಯ ನಂತರ ಆಕ್ರಮಣಕಾರಿ ಆಟ ಪ್ರದರ್ಶಿಸಿ 5 ಅಂಕಗಳ ಅಂತರದಲ್ಲಿ ಗೆಲುವು ಸಾಧಿಸಿ ಮುನ್ನಡೆ ಪಡೆದರು. 2ನೇ ಗೇಮ್ನಲ್ಲಿ ಇಬ್ಬರು ಸ್ಟಾರ್ ಆಟಗಾರರು ರೋಚಕ ಹೋರಾಟ ನಡೆಸಿದರು. ಒಂದು ಹಂತದಲ್ಲಿ ಆ್ಯಂಟನ್ಸೆನ್ 17-16ರಲ್ಲಿ ಮುನ್ನಡೆ ಪಡೆದುಕೊಂಡಿದ್ದರು. ಆದರೆ ಲಕ್ಷ್ಯ ಸ್ಟಾರ್ ಆಟಗಾರನಿಗೆ ಆಘಾತ ನೀಡಿ 3 ಅಂಕಗಳ ಅಂತರದಲ್ಲಿ ಜಯ ಸಾಧಿಸಿ 8ರ ಘಟ್ಟಕ್ಕೆ ತೇರ್ಗಡೆಯಾದರು.
20 ವರ್ಷದ ಲಕ್ಷ್ಯ ಮುಂದಿನ ಸುತ್ತಿನಲ್ಲಿ ಚೀನಾದ ಲು ಗುವಾಂಗ್ ಜು ಅಥವಾ ಹಾಂಕಾಂಗ್ನ ಆ್ಯಂಗುಸ್ ಎಂಗ್ ಕಾ ಲಾಂಗ್ ವಿರುದ್ಧ ಸೆಣಸಾಡಲಿದ್ದಾರೆ.
ಇದನ್ನೂ ಓದಿ:ನಾಯಕತ್ವ ತ್ಯಜಿಸಿ ಒತ್ತಡಮುಕ್ತ ಕೊಹ್ಲಿ ಎದುರಾಳಿಗಳಿಗೆ ಅಪಾಯಕಾರಿ: ಮ್ಯಾಕ್ಸ್ವೆಲ್
