ನವದೆಹಲಿ: ಭಾರತದ ಹಾಕಿ ತಂಡದ 'ಗೋಲ್ಡನ್ ಗರ್ಲ್' ಎಂದೇ ಖ್ಯಾತಿ ಪಡೆದಿರುವ ತಂಡದ ನಾಯಕಿ ರಾಣಿ ರಾಂಪಾಲ್ ದೇಶದ ಅತ್ಯುನ್ನತ ಕ್ರೀಡಾ ಪ್ರಶಸ್ತಿಯಾದ 'ರಾಜೀವ್ ಗಾಂಧಿ ಖೇಲ್ ರತ್ನ' ಗೌರವಕ್ಕೆ ಪಾತ್ರರಾಗಿದ್ದಾರೆ.
ಈ ಬಗ್ಗೆ ಪ್ರತಿಕ್ರಿಯಿಸಿದ ಅವರು, 'ಈ ಪ್ರಶಸ್ತಿ ನನಗೆ ದೊಡ್ಡ ಪ್ರೇರಣೆಯಾಗಿ ಕಾರ್ಯನಿರ್ವಹಿಸಲಿದೆ' ಎಂದು ಸಂತಸ ಹಂಚಿಕೊಂಡರು.
ಪ್ರಶಸ್ತಿ ಘೋಷಣೆಯಾಗುತ್ತಿದ್ದಂತೆ ಬೆಂಗಳೂರಿನ ತರಬೇತಿ ಶಿಬಿರದಲ್ಲಿ ಪ್ರತಿಕ್ರಿಯಿಸಿರುವ ಅವರು, 'ಇದು ನನಗೆ ಮತ್ತು ವಿಶೇಷವಾಗಿ ನನ್ನ ಕುಟುಂಬಕ್ಕೆ ನಿಜವಾಗಿಯೂ ಹೆಮ್ಮೆಯ ಕ್ಷಣ. ಖೇಲ್ ರತ್ನ ದೇಶದಲ್ಲಿ ಕ್ರೀಡಾಪಟುಗಳು ಪಡೆಯಬಹುದಾದ ದೊಡ್ಡ ಪ್ರಶಸ್ತಿಯಾಗಿದೆ. ಪ್ರಶಸ್ತಿ ದೊರೆಯಲು ಬೆಂಬಲಿಸಿದ ನನ್ನ ಕೋಚ್, ತಂಡದ ಸಹಾ ಆಟಗಾರ್ತಿಯರು ಹಾಗೂ ನನ್ನ ಕುಟುಂಬದವರಿಗೆ ಸದಾ ಋಣಿ' ಎಂದು ಹೇಳಿದ್ದಾರೆ.
'ಕಠಿಣ ಪರಿಶ್ರಮಕ್ಕೆ ಪ್ರಶಸ್ತಿ ದೊರೆತಾಗ ಬಹಳ ಸಂತೋಷವಾಗುತ್ತದೆ. ಈ ಪ್ರಶಸ್ತಿ ನನಗೆ ಮತ್ತು ನನ್ನಂತಹ ಅನೇಕ ಕ್ರೀಡಾಪಟುಗಳಿಗೆ ಭವಿಷ್ಯದಲ್ಲಿ ಉತ್ತಮ ಸಾಧನೆ ಮಾಡಲು ಪ್ರೇರಣೆಯಾಗಲಿದೆ. ನನ್ನ ಜೊತೆ ಪ್ರಶಸ್ತಿ ಪಡೆದ ಎಲ್ಲಾ ಕ್ರೀಡಾಪಟುಗಳಿಗೂ ಅಭಿನಂದನೆ ಸಲ್ಲಿಸುತ್ತೇನೆ' ಎಂದು ರಾಣಿ ತಿಳಿಸಿದ್ದಾರೆ.
ರಾಣಿ ರಾಂಪಾಲ್ ಜೊತೆಗೆ 'ದ್ರೋಣಾಚಾರ್ಯ ಪ್ರಶಸ್ತಿ'ಗೆ ಪಾತ್ರರಾದ ಮಾಜಿ ಆಟಗಾರರಾದ ಜೂಡೆ ಫೆಲಿಕ್ಸ್, ರೊಮೇಶ್ ಪತಾನಿಯಾ ಹಾಗೂ 'ಧ್ಯಾನ್ಚಂದ್ ಪ್ರಶಸ್ತಿ'ಗೆ ಪಾತ್ರರಾಗಿರುವ ಅಜಿತ್ ಸಿಂಗ್ ಅವರಿಗೆ ಹಾಕಿ ಇಂಡಿಯಾ ಅಭಿನಂದನೆ ಸಲ್ಲಿಸಿದೆ.
ಮಹಿಳಾ ಹಾಕಿ ತಂಡದ ದೀಪಿಕಾ ಪುರುಷರ ತಂಡದ ಅಕ್ಷ್ದೀಪ್ ಸಿಂಗ್ 'ಅರ್ಜುನ ಪ್ರಶಸ್ತಿ'ಗೆ ಭಾಜನರಾಗಿದ್ದಾರೆ.
