ಮುಂಬೈ: ಇದೇ ತಿಂಗಳು ದುಬೈನಲ್ಲಿ ಮುಗಿದಿದ್ದ ಇಂಡಿಯನ್ ಪ್ರೀಮಿಯರ್ ಲೀಗ್ ಬರೋಬ್ಬರಿ 120 ರಾಷ್ಟ್ರಗಳಲ್ಲಿ ಪ್ರಸಾರವಾಗುವ ಮೂಲಕ ದಾಖಲೆ ಬರೆದಿತ್ತು. ಇದೀಗ ಭಾರತದ ಬಹುದೊಡ್ಡ ಫುಟ್ಬಾಲ್ ಲೀಗ್ ಆಗಿರುವ ಇಂಡಿಯನ್ ಸೂಪರ್ ಲೀಗ್ ಕೂಡ 82 ರಾಷ್ಟ್ರಗಳಲ್ಲಿ ಪ್ರಸಾರ ಕಾಣಲಿದೆ.
ಕೊರೊನಾ ಮಧ್ಯೆಯೂ ಶುಕ್ರವಾರದಿಂದ ಆರಂಭಗೊಳ್ಳುತ್ತಿರುವ ಬಹು ನಿರೀಕ್ಷಿತ 7ನೇ ಆವೃತ್ತಿಯ ಇಂಡಿಯನ್ ಸೂಪರ್ ಲೀಗ್ (ಐಎಸ್ಎಲ್) ಕ್ರಿಕೆಟ್ಗಿಂತ ಕಮ್ಮಿಯಿಲ್ಲ ಎಂಬುದನ್ನು ಸಾಬೀತುಪಡಿಸಲಿದೆ. ಕೋವಿಡ್ ಕಾರಣ ಗೋವಾದಲ್ಲಿ ನಡೆಯಲಿರುವ ಟೂರ್ನಿ ಬರೋಬ್ಬರಿ 82 ಪ್ರದೇಶಗಳಲ್ಲಿ ನೇರಪ್ರಸಾರಗೊಳ್ಳಲಿದೆ.
ವಿಶ್ವದಾದ್ಯಂತ ಅತಿ ಹೆಚ್ಚು ಅಭಿಮಾನಿಗಳನ್ನು ಫುಟ್ಬಾಲ್ ಕ್ರೀಡೆ ಹೊಂದಿರುವುದರಿಂದ ಟಿವಿ ಮತ್ತು ಡಿಜಿಟಲ್ ವೇದಿಕೆಗಳಲ್ಲಿ ಐದು ಪಾಲುದಾರರ ಮೂಲಕ ವಿಶ್ವದಾದ್ಯಂತ 82 ದೇಶಗಳಲ್ಲಿ ಪಂದ್ಯವನ್ನು ನೇರಪ್ರಸಾರ ನೀಡಲು ಮುಂದಾಗಿವೆ.
7ನೇ ಆವತ್ತಿಯ ಐಎಸ್ಎಲ್ ಯುಎಸ್ಎ, ಆಸ್ಟ್ರೇಲಿಯಾ, ಯುರೋಪ್, ಸೆಂಟ್ರಲ್ ಏಷ್ಯಾ, ಸೌತ್ ಈಸ್ಟ್ ಏಷ್ಯಾ, ಏಷ್ಯಾ ಪೆಸಿಫಿಕ್ ದೇಶಗಳಲ್ಲಿ ಲೈವ್ ಕಾಣಲಿದೆ.
2020-21ರ ಐಎಸ್ಎಲ್ ಆವೃತ್ತಿಯಲ್ಲಿ 11 ತಂಡಗಳಿದ್ದು, ಒಟ್ಟು 115 ಪಂದ್ಯಗಳು ನಡೆಯಲಿವೆ. ಈ ಆವೃತ್ತಿಯಲ್ಲಿ ನೂರು ವರ್ಷಗಳ ಇತಿಹಾಸವಿರುದ ಎಟಿಕೆ ಮೋಹನ್ ಬಗಾನ್ ಮತ್ತು ಎಸ್ಇ ಈಸ್ಟ್ ಬೆಂಗಾಲ್ ತಂಡಗಳೂ ಸೇರಿಕೊಂಡಿರುವುದು ಐಎಸ್ಎಲ್ಗೆ ಮತ್ತಷ್ಟು ಬೆಂಬಲ ದೊರೆತಂಗಾಗಿದೆ. ನಾಳೆ ಉದ್ಘಾಟನೆಗೊಳ್ಳುವ ಪಂದ್ಯದಲ್ಲಿ ಎಟಿಕೆ ಮೋಹನ್ ಬಗಾನ್ ಮತ್ತು ಕೇರಳ ಬ್ಲಾಸ್ಟರ್ಸ್ ತಂಡಗಳು ಮುಖಾಮುಖಿಯಾಗಲಿವೆ.