ನವದೆಹಲಿ: ಭಾರತ ಫುಟ್ಬಾಲ್ ತಂಡದ ನಾಯಕ ಸುನೀಲ್ ಚೆಟ್ರಿ ಎಎಫ್ಸಿಯಲ್ಲಿನ ಅತ್ಯುತ್ತಮ ಮೂವರು ಸ್ಟ್ರೈಕರ್ಸ್ ಆಯ್ಕೆಗಾಗಿ ಘೋಷಣೆ ಮಾಡಿರುವ 13 ಆಟಗಾರರ ಪಟ್ಟಿಯಲ್ಲಿ ಕಾಣಿಸಿಕೊಂಡಿದ್ದಾರೆ.
36 ವರ್ಷದ ಚೆಟ್ರಿ 2013ರಿಂದ ಎಎಫ್ಸಿ ಕಪ್ನಲ್ಲಿ 4 ಆವೃತ್ತಿಗಳಲ್ಲಿ ಭಾಗವಹಿಸಿ 18 ಗೋಲು ಬಾರಿಸಿದ್ದಾರೆ. ಚರ್ಚಿಲ್ ಬ್ರದರ್ಸ್ ನಂತರ 2016,2017 ಮತ್ತು 2018ರ ಆವೃತ್ತಿಯಲ್ಲಿ ಪ್ರತಿಷ್ಠಿತ ಏಷ್ಯನ್ ಲೀಗ್ನಲ್ಲಿ ಬೆಂಗಳೂರು ಎಫ್ಸಿ ಪರ ಆಡಿದ್ದರು.
2016ರ ಫೈನಲ್ನಲ್ಲಿ ಇರಾಕ್ನ ಏರ್ಫೋರ್ಸ್ ಕ್ಲಬ್ ಆಫ್ ವಿರುದ್ಧ ಫೈನಲ್ನಲ್ಲಿ ಆಡಿ, ಸೋಲು ಕಂಡು ಬೆಂಗಳೂರು ಎಫ್ಸಿಯನ್ನು ರನ್ನರ್ಸ್ ಅಪ್ ಸ್ಥಾನಕ್ಕೆ ತಂದಿದ್ದು ಚೆಟ್ರಿಯವರ ಅತ್ಯುತ್ತಮ ಸಾಧನೆಯಾಗಿದೆ.
"ಆಧುನಿಕ ಭಾರತದ ಫುಟ್ಬಾಲ್ನ ಐಕಾನಿಕ್ ಆಟಗಾರ ಮತ್ತು 72 ರಾಷ್ಟ್ರೀಯ ತಂಡದ ಗೋಲುಗಳು ಚೆಟ್ರಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಗ್ಗುರುತು ನೀಡಿವೆ. ಜೊತೆಗೆ ಸುನೀಲ್ ಎಎಫ್ಸಿ ಕಪ್ನ ಕಾಂಟಿನೆಂಟಲ್ ಕ್ಲಬ್ ಸ್ಟೇಜ್ನಲ್ಲಿ ನಿಯಮಿತವಾಗಿ ತಮ್ಮ ಗುಣಮಟ್ಟವನ್ನು ತೋರಿಸಿದ್ದಾರೆ" ಎಂದು ಎಎಫ್ಸಿ ತನ್ನ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ ತಿಳಿಸಿದೆ.
"ಅವರು 2016ರ ಫೈನಲ್ ಪ್ರವೇಶಿಸಿದ್ದ ಬೆಂಗಳೂರು ಎಫ್ಸಿಯ ನಾಯಕತ್ವ ವಹಿಸಿದ್ದರು. ಹಾಲಿ ಚಾಂಪಿಯನ್ ಆಗಿರುವ ಜೊಹೋರ್ ದಾರುಲ್ ತಾಜಿಮ್ ತಂಡವನ್ನು ಅಂದು ಸೆಮಿಫೈನಲ್ನಲ್ಲಿ ಬಗ್ಗುಬಡಿಯುವಲ್ಲಿ ಇವರ ಎರಡು ವೈಯಕ್ತಿಕ ಗೋಲುಗಳು ಪ್ರಮುಖ ಪಾತ್ರವಹಿಸಿದ್ದವು. ಅವರ ಈ ದಶಕದಲ್ಲಿ ಪ್ರಭಾವಶಾಲಿ ಆಟಗಾರರಲ್ಲಿ ಒಬ್ಬರು" ಎಂದು ಎಎಫ್ಸಿ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.
ಚೆಟ್ರಿ 115 ಪಂದ್ಯಗಳಲ್ಲಿ 72 ಗೋಲುಗಳೊಂದಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರಸ್ತುತ ಸಕ್ರಿಯ ಆಟಗಾರರಲ್ಲಿ ಹೆಚ್ಚು ಗೋಲು ಗಳಿಸಿರುವ ಪಟ್ಟಿಯಲ್ಲಿ ಪೋರ್ಚುಗಲ್ ನಾಯಕ ಕ್ರಿಸ್ಚಿಯಾನೋ ರೊನಾಲ್ಡೊ(102) ನಂತರದ ಸ್ಥಾನದಲ್ಲಿದ್ದಾರೆ.
ಇದನ್ನು ಓದಿ:ಸ್ಟೋಕ್ಸ್ ಐಪಿಎಲ್ನಲ್ಲೂ ಬೌಲರ್ಗಳನ್ನು ಇದೇ ರೀತಿ ಹೆದರಿಸಲಿದ್ದಾರೆಂದು ಭಾವಿಸುವೆ : ಜೋಸ್ ಬಟ್ಲರ್