ನವದೆಹಲಿ : ವೆಸ್ಟ್ ಇಂಡೀಸ್ನಲ್ಲಿ ನಡೆದ ಅಂಡರ್-19 ವಿಶ್ವಕಪ್ನಲ್ಲಿ ಭಾರತಕ್ಕೆ 5ನೇ ಟ್ರೋಫಿ ತಂದು ಕೊಟ್ಟಿರುವ ಯುವ ನಾಯಕ ಯಶ್ ಧುಲ್, ತಾವು ವಿರಾಟ್ ಕೊಹ್ಲಿಯಂತೆ ಬ್ಯಾಟರ್ ಆಗುವುದಾಗಿ ಶಾಲಾ ದಿನಗಳಿಂದಲೂ ಹೇಳುತ್ತಿದ್ದರು ಎಂದು ಅವರ ಕೋಚ್ ರಾಜೇಶ್ ನಗರ್ ಹೇಳಿದ್ದಾರೆ.
2022ರ U19 ವಿಶ್ವಕಪ್ನಲ್ಲಿ ಭಾರತ ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸುವ ಮೂಲಕ ತಮಗೆ ಸ್ಫೂರ್ತಿಯಾಗಿರುವ ಕೊಹ್ಲಿ ಹೆಸರಿರುವ ಪಟ್ಟಿಯಲ್ಲಿ ತಮ್ಮ ಹೆಸರನ್ನು ಬರೆಸಿಕೊಂಡಿದ್ದಾರೆ. ಭಾರತ ಇಂಗ್ಲೆಂಡ್ ವಿರುದ್ಧ 4 ವಿಕೆಟ್ಗಳ ರೋಚಕ ಜಯ ಸಾಧಿಸುವ ಮೂಲಕ ವಿವಿಯನ್ ರಿಚರ್ಡ್ಸ್ ಸ್ಟೇಡಿಯಂನಲ್ಲಿ 5ನೇ ಬಾರಿ ಕಿರಿಯರ ವಿಶ್ವಕಪ್ ಎತ್ತಿ ಹಿಡಿದಿತ್ತು.
ವಿಶ್ವಕಪ್ನಲ್ಲಿ ನಾಯಕತ್ವವಹಿಸಿ ದೇಶಕ್ಕೆ ಟ್ರೋಫಿ ಗೆದ್ದುಕೊಟ್ಟಿರುವ ತಮ್ಮ ಶಿಷ್ಯನನ್ನು ನೋಡುವುದಕ್ಕೆ ಎದುರು ನೋಡುತ್ತಿರುವುದಾಗಿ ಖಾಸಗಿ ಮಾಧ್ಯಮಕ್ಕೆ ನೀಡಿದ ಸಂದರ್ಶನದಲ್ಲಿ ನಗರ್ ತಿಳಿಸಿದ್ದಾರೆ.
"ನನಗೆ ಯಶ್ ಭಾರತಕ್ಕಾಗಿ ವಿಶ್ವಕಪ್ ತಂದುಕೊಡಲಿದ್ದಾರೆ ಎನ್ನುವ ವಿಶ್ವಾಸವಿತ್ತು. ಆತ ಗೆಲುವಿಗಾಗಿ ಸದಾ ಹಸಿವಿನಿಂದ ಇರುತ್ತಾನೆ. ಅವನ ಬಗ್ಗೆ ನಾನು ತುಂಬಾ ಹೆಮ್ಮೆ ಪಡುತ್ತೇನೆ. ನಾನು ಹೆಮ್ಮೆಯ ಕೋಚ್. ಆತ ತಂಡವನ್ನು ಮುಂದೆ ನಿಂತು ಮುನ್ನಡೆಸಿದ್ದಾನೆ ಮತ್ತು ಇಡೀ ತಂಡ ಕೂಡ ಅದ್ಭುತ ಪ್ರದರ್ಶನ ತೋರಿದೆ. ಇದೊಂದು ಉತ್ತಮ ತಂಡ. ಅಂಡರ್ 19 ವಿಶ್ವಕಪ್ನಲ್ಲಿ ಭಾರತದ ಪ್ರಾಬಲ್ಯ ಮುಂದುವರಿದಿದೆ" ಎಂದು ನಗರ್ ತಿಳಿಸಿದ್ದಾರೆ.
ವಿರಾಟ್ ಅಗ್ರೆಸಿವ್ ಬ್ಯಾಟಿಂಗ್, ಧೋನಿಯ ಕೂಲ್ ಕ್ಯಾಪ್ಟೆನ್ಸಿ
ನೀವು ಗಮನಿಸಿರಬಹುದುಸ ಯಶ್ನಲ್ಲಿ ವಿರಾಟ್ ಕೊಹ್ಲಿಯ ಕೆಲವು ಲಕ್ಷಣಗಳಿವೆ. ಬ್ಯಾಟಿಂಗ್ ಮಾಡುವ ವೇಳೆ ಆಕ್ರಮಣಕಾರಿಯಾಗಿರುತ್ತಾರೆ. ಅವರು ಚೆಂಡನ್ನು ಆಕ್ರಮಣಕಾರಿಯಾಗಿ ದಂಡಿಸುತ್ತಾರೆ. ಅವರಿಗೆ ಆ ಸಾಮರ್ಥ್ಯವಿದೆ. ಇನ್ನು ನೀವು ಫೀಲ್ಡಿಂಗ್ನಲ್ಲೂ ಕೂಡ ಅವರಲ್ಲಿ ವಿರಾಟ್ ಕೊಹ್ಲಿಯ ಛಾಯೆಗಳನ್ನು ಕಾಣಬಹುದು. ಆತನ ಫೀಲ್ಡಿಂಗ್ನಲ್ಲಿ ಯಾವುದೇ ಅವಕಾಶಗಳನ್ನು ಕೈಚೆಲ್ಲುವುದಿಲ್ಲ. ಆತ ಯಾವಾಗಲೂ ನಾನು ವಿರಾಟ್ ಭಯ್ಯಾ ಅವರಂತೆ ಕ್ರಿಕೆಟರ್ ಆಗುಬೇಕು ಎನ್ನುತ್ತಿರುತ್ತಾರೆ ಎಂದು ನಗರ್ ಹೇಳಿದ್ದಾರೆ.
ಆದರೆ, ನಾಯಕತ್ವದ ವಿಚಾರದಲ್ಲಿ ಅವರು ಧೋನಿಯಂತೆ ಶಾಂತತೆ ಮತ್ತು ಸಂಯೋಜನೆಯನ್ನು ಹೊಂದಿದ್ದಾರೆ. ಆತ ಕೂಡ ತನ್ನ ಸಹ ಆಟಗಾರರನ್ನು ಬೆಂಬಲಿಸುತ್ತಾರೆ, ಯಾವಾಗಲೂ ಅವರ ಬೆನ್ನಿಗೆ ನಿಲ್ಲುತ್ತಾರೆ ಮತ್ತು ಸಲಹೆ ನೀಡುತ್ತಾರೆ. ನಿರ್ಧಾರಗಳನ್ನು ತೆಗೆದುಕೊಳ್ಳಬೇಕಾದರೆ ಅವನು ತುಂಬಾ ತಾಳ್ಮೆ ವಹಿಸುತ್ತಾನೆ. ಹಾಗಾಗಿ, ಯಶ್, ಧೋನಿ ಮತ್ತು ವಿರಾಟ್ ಕೊಹ್ಲಿ ಸಂಯೋಜನೆ ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ:ಐಸಿಸಿ U19 ವಿಶ್ವಕಪ್ 'ಅತ್ಯಂತ ಮೌಲ್ಯಯುತ ತಂಡ'ಕ್ಕೆ ಯಶ್ ಧುಲ್ ನಾಯಕ, 3 ಭಾರತೀಯರಿಗೆ ಸ್ಥಾನ
